日本生活最叫人期待嘅季節之一，就係賞花季！花期比本州稍遲嘅北海道櫻花由4月下旬開始陸續盛開，一路直至5月下旬都係賞櫻機會。經過漫長冬天休眠後綻放嘅北海道櫻花，望上去實在係格外美艷！
編輯部推薦北海道5大遲開櫻花景點
1. 五稜郭公園
以星形城廓聞名嘅公園到咗每年4月下旬，就會有約1600棵染井吉野櫻以及八重櫻盛開綻放。櫻花會將星形城廓填滿，遠睇就好似一座櫻花城堡。遊客除咗可以乘坐出租小船環遊護城河賞櫻之外，仲可以於晚上欣賞點燈後嘅夜櫻景色，另外，您亦可以於指定區域內嘅櫻花樹下享用「成吉思汗」燒肉（日式燒羊肉料理）大餐。櫻花季尾聲後，護城河水面更會佈滿飄落花瓣，景致別有一番雅韻。
五稜郭公園
- 每年櫻花季：4月下旬～5月上旬
- 夜間點燈時間：櫻花季期間19:00～21:00、週六日～22:00
- 營業時間：護城河內側：5：00～19：00（護城河外側可自由進入參觀）
- 地址：北海道函館市五稜郭町44
2. 松前公園
松前城及其周圍一帶以大約250種、1萬棵櫻花聞名，公園北側嘅櫻花園內種有嘅140種櫻花甚至會先後於一個月內相繼綻放！獲「日本櫻之會」列入100大賞櫻名所之一嘅公園更會於4月28日～5月13日舉行「松前櫻花祭」，祭典期間物產展等各式各樣活動輪流上場，保證可為入場者送上一個難忘賞櫻回憶。
松前公園
- 每年櫻花季：4月下旬～5月中旬
- 夜間點燈時間：櫻花季期間日落～20:30
- 地址：北海道松前郡松前町松城
3. 圓山公園
從JR札幌站乘搭地鐵20分鐘即可到達嘅圓山公園與相鄰嘅北海道神宮齊齊並列為賞櫻名所，因此每年都會吸引大批賞櫻人潮前來造訪，享受春天到來。花季期間，您除咗可以於園內欣賞櫻花，亦可以順便遇上盛開梅花。順帶一提，公園管理事務所亦有提供燒肉用具租借服務㗎！
圓山公園
- 每年櫻花季：4月下旬～5月中旬
- 地址：札幌市中央區宮丘
4. 北海道廳舊本廳舍
建於札幌市中心嘅「北海道廳舊本廳舍（紅磚廳舍）」為同時具備紅磚建築與盛開櫻花嘅觀光名所。５月上旬先有霞櫻、中旬再有鮮豔粉色花瓣嘅八重櫻輪流綻放，因此遊客總共係會有2次賞花嘅最佳時機！
北海道廳舊本廳舍（紅磚廳舍）
- 每年櫻花季：5月上旬～5月下旬
- 地址：北海道札幌市中央區北3條西6
5. 中島公園
從JR札幌站乘搭地鐵約5分鐘，就可以嚟到與車站直接相通嘅中島公園，交通非常方便。喺呢個充滿豐富大自然風景嘅公園裡，您可以欣賞到各種樹木同時萌芽、洋溢春天氣息嘅美景。而最推薦嘅賞櫻景點，則非「日本庭園」枝垂櫻莫屬－粉色小花隨風搖曳嘅日本式風情絕對係不容錯過！由於園內種植咗各種櫻花，因此開花時間會因品種而異、賞花期間相對較長。欣賞完陸上嘅櫻花後，您仲可以搭船欣賞水邊嘅櫻花𠻹！
中島公園
- 每年櫻花季：5月上旬～5月下旬
- 地址：北海道札幌市中央區中島公園1
Comments