弘前城係一座位於青森縣弘前市嘅城堡，並作為日本最北「現存天守12城之一」而聞名。弘前城所在嘅弘城公園內，同時亦有城櫓、護城河、木橋等建築物，不過講到最受歡迎嘅原因，必定要數到此處「日本100大櫻花名勝」頭銜！春天賞櫻、秋天賞楓、冬天白雪皚皚，一年四季各異風貌輪流上演。睇完呢篇有關弘前城嘅介紹，保證您必定會被東北地區唯一現存天守所吸引！
關於弘前城
弘前城舊名「鷹岡城」、「高岡城」。西元1603年，弘前初代藩主津輕為信為管理津輕地區決定建造新城，於是就選址現時「弘前」位置。後來，再1611年由二代藩主津輕信枚規劃5層天守，於其周圍加蓋數個箭樓、城門、石牆、土砲台等，並同時陸續發展周邊城下町建設。從舊時保留至今嘅多座弘前市區武士住宅、商家、寺院等，目前都已獲列為國家重要文化財！
1627年，天守以及本丸御殿等建築因落雷導致城内火藥爆發而被燒毀。人民原本向幕府提出重建申請，惟當時天守被視為戰爭象徵，為避免城堡成為對抗幕府據點，大型天守因此被禁止重建或新建。從此長達200年時間，弘前城內並不存在天守，終於等到1810年後，日本全國現存天守中最遲落成嘅三重建築天守先得以重建，亦即係目前大家所見到嘅外貌。
現存弘前城天守雖然係重建物，卻係東北地區唯一於江戶時代建造嘅天守，屬於日本現存天守12城之一。難怪會成為弘前市著名地標，亦被列為國家重要文化財！
弘前城係「青森移動城堡」！？
弘前城本丸東面嘅石牆，因被發現出現隆起情況，若遇上大地震可能有崩塌危險，因此決定於2015年展開名為「曳屋」嘅大型維修工程（※註1），將重達400噸嘅天守暫時「搬屋」！當局從8月至10月，一共花費3個月時間，將天守原本所在位置移動約70米，改為暫時安置於本丸中央，於青森縣上演真實版「移動城堡」！
※註1：「曳屋」為日本古代工法。意即於建築物底部放入支架（古時使用木頭及繩，再以人力拉動），每日以幾厘米速度將建築物整棟移動，常用於寺院神社等古蹟修復工程。
維修工程預計將持續約10年，本丸將於石牆修復完成後先會被放回原處。由於移動工程於日本國內亦十分少見，因此工程期間弘前公園仍會照常開放部份區域，並設置觀景台讓遊客參觀工程進度。喺未年幾年時間內有機會到弘前城的話，各位將可以更近距離參觀天守面貌！
「弘前公園」一年四季展現不同風貌
自1895年起，弘前城連同天守閣，連帶3座箭樓、5座城門與三重護城河以及周邊豐富自然景觀，共49公頃面積被列入為弘前公園範圍，搖身一變成為弘前市觀光及活動中心。每逢櫻花或紅葉等旺季，來自世界各國觀光客紛紛慕名朝聖，青森縣超人氣旅遊景點當之無愧！
弘前城季節盛事①（弘前櫻花祭）
弘前公園每年4月下旬都會舉辦「弘前櫻花祭」。獲選為「100大日本櫻花名勝」嘅公園範圍内種有約2600棵櫻花樹，品種以染井吉野櫻為主，再加上枝垂櫻、八重櫻等共52種款式。當中最值得一提嘅，就有1882年栽種嘅染井吉野櫻，據聞更係日本最古老嘅櫻花！其他樹齢超過100年以上嘅染井吉野櫻亦多達300棵，每逢櫻花盛開時嘅櫻花絕景可謂相當撼動人心。
弘前城季節盛事②（弘前城雪燈籠祭）
另一於每年2月舉行嘅盛事「弘前城雪燈籠祭」亦不容忽視。活動主要會場為弘前公園，為期5天，屬陸奧地區五大雪祭之一。自1977年首次登場以來，已經成為當地最大型冬季祭典之一。約200件大小不一各式各樣嘅燈籠及雪像，以及300間點上蠟燭嘅迷你雪屋，與浮現於朦朧燈光中嘅弘前城互相輝映，渲染成極夢幻光景！
如何前往弘前城？
從JR弘前站轉乘巴士於市役所前下車後，步行約5分鐘即可抵達。或從JR弘前站徒步約25分鐘。
景點資訊
- 景點名稱：弘前城（弘前公園）
- 地址：青森縣弘前市下白銀町1
- 開放時間： 09:00～17:00（櫻花祭期間為07:00～21:00）
- 開放日：4/1～11/23（11/24～3/31弘前城付費區域免費開放，冬季天守不開放參觀）
- 門票：成人320日圓、小童100日圓、學齡前兒童免費（弘前公園部分區域可免費入場）
Comments