日本嘅女性上班族(OL)通常放工都係5點後或者6點後，你覺得佢哋收工後通常會做乜呢？日劇入面成日都睇到日本OL放工後會去聯誼、同男友食飯約會、參加「女子會」、進修增值等，相信佢地生活一定好充實喇。今次就等我哋去實際訪問喺東京返工嘅OL・A小姐，等佢嚟同大家分享吓日本女性上班族放工後會做啲乜！
無得準時收工？！
日本公司嘅放工時間大多數係5點或者6點，但實際訪問後…？A小姐話「基本上好少準時收工」。「NO OT日」嗰日，為咗可以準時收工而要特別努力完成工作。「NO OT日」又係咩嚟？日本有一個政策係實施「NO OT日」，大多設定喺一個禮拜嘅中間, 即係星期三。當然因工作內容或公司嘅雇用型態唔同而可以唔使OT，但基本上正職員工係好難可以準時收工......
一個月兩到三次，同朋友或同事舉辦女子會！
最近喺日本經常聽到「女子會」呢個字。意思就係同大學、高中同學或者同事等，限定只有女生可以參加嘅聚會，聚會時會熱烈討論工作、感情問題、未來嘅想法等等，加埋美食盡情傾心事。A小姐話「如果有煩惱或者不安嘅事，透過聚會可以得到好建議或者會趁機同大家分享自己嘅近況。女生先明白女生嘅想法，亦正正只有女生嘅聚會先可以放膽咁傾，偶而都會喺度受到一啲刺激同啟發。」睇嚟呢個都好似變成舒發壓力嘅一個方法同場合呢。以女性會鍾意嘅餐點為賣點，推出「女子會限定套餐」嘅餐廳最近亦慢慢增多。
係周末進修增值！喺屋企都可以進行嘅增值提升
A小姐話：「我星期日會去做GYM同練瑜珈。以前都係平日收工之後去，但因為工作而去唔到嘅日子太多，所以就改為周末假日先去。」平時收工之後亦會喺屋企做吓拉筋或者簡單嘅瑜珈。亦會透過聽英文嘅電台節目嚟學習英語。我地問咗點解A小姐想增值，「生活只有返工放工嘅話，太無變化太無聊。可以忘記工作煩腦，轉換心情嘅進修增值時間係必須！」睇嚟日本OL生活唔止得工作，亦會適當咁按排自己嘅私人活動，過住多姿多采嘅每一日。
Comments