起源於北海道札幌嘅「札幌拉麵」、以乳白色豚骨湯為特徵嘅九州福岡「博多拉麵」、以及濃厚嘅「京都拉麵」等等，日本全國各地都有著充滿特色同個性嘅拉麵，無論係麵條粗幼、湯底熬製方法或配料種類都各有不同。今次要向大家介紹嘅，就係嚟到日本一定要食嘅幾款地道拉麵！
味噌拉麵發源地！「札幌拉麵」／北海道・札幌
味噌拉麵係起源於北海道札幌市嘅地道拉麵。煮法為使用豬油以及蒜頭將青菜炒好後，再加到味噌豚骨湯底內一齊煮，最後再放入煮好嘅麵條就完成。熱湯加配料再配搭麵條，就成為一道暖入心嘅料理，呢種煮法亦係北海道札幌獨一無二嘅做法。麵條大多選用捲麵，而配料方面則除咗粟米同牛油之外，亦有店舖會加入蟹或扇貝等海鮮材料。雖然札幌被稱為味噌拉麵發源地，但好多舖頭同時都有提供醬油及鹽味拉麵。
「替玉」加麵服務！「博多拉麵」／九州・福岡
與札幌拉麵齊名嘅日本地道拉麵代表—博多拉麵，以豬骨長時間熬煮而成嘅濃厚湯底為其最大特徵。麵條為幼麵，麵上會加有蔥花與叉燒肉，而一般店舖更會喺座位枱面提供蒜泥、白芝麻、紅生薑等配料，方便食客依喜好適量加入。另外，博多拉麵仲有加麵底「替玉」嘅服務。好多拉麵店現時都已經於全球各地開設連鎖店，例如「博多一風堂」、「一蘭」就係其中例子。
數量為全日本第一！醬油湯底「東京拉麵」／東京
東京嘅拉麵店數量據講係日本第一，各間店舖嘅拉麵特色都各有不同。東京拉麵湯底一般為將蔬菜及豬骨加入雞骨湯中一起熬煮、其後再加入醬油而成嘅口味，麵條則用上捲麵配搭叉燒肉、筍干、蔥、魚板等配料，亦有店家會放入半熟蛋或紫菜。
加入九條蔥與叉燒嘅京都拉麵／京都
京都拉麵可略分為三個種類：豬背脂雞骨湯、深黑濃厚醬油豚骨湯以及燉煮雞湯。麵條多為直麵、而配料則有柔軟嘅九條蔥同叉燒肉、筍干等等。著名連鎖拉麵店有「新福菜館」、「天下一品」、「Masutani（ますたに）」等。
Comments