有無喺日劇或者日本電影裡面睇過？日本聯誼活動大探究

喺日本，男女互相認識嘅活動被稱作「聯誼」，相信應該好多人都已經喺日劇或電影裡面見過。聯誼即「聯合交誼」嘅簡稱，係一種由兩個或以上嘅團體共同舉行嘅聚會，促使男生同女生互相認識交流。至於日本嘅上班族又係點樣聯誼嘅呢？今次我哋就會根據實際經驗，向大家介紹聯誼嘅「鐵則」。

鐵則1：聯誼男女人數一定要相同！

聯誼之最基本規則－男女人數一定要相同。一般情況下，聯誼都會以3對3，或者5對5嘅人數進行。每個禮拜都會參加一次聯誼嘅東京上班族A小姐就話：「就算聯誼當日有人臨時取消，都一定要搵到其他代替嘅人，令男女人數保持相同」。如果男女人數不同，就可能會出現有人無法湊成一對嘅情況。

鐵則2：選擇有包廂嘅餐廳而唔係大眾居酒屋！

聯誼活動通常都會事前就決定好要喺邊一間店舖舉行。主辦人會事先聯絡參加者集合地點同活動地點，而大部分聯誼活動都會喺包廂入面進行。根據A小姐所講，選擇包廂嘅原因係：「萬一坐喺隔離枱嘅係公司前輩或者同事，就會非常尷尬」。另外，聯誼活動亦經常會揀喺澀谷或新宿等交通方便嘅地方舉行。

鐵則3：流程為「乾杯→自我介紹→互相交換LINE ID」

當大家點好飲品並乾杯之後，就會開始進行自我介紹。有時候會由主辦人會逐一介紹每位參加者，有時候則係由每個人自己自我介紹，講姓名同職業等。自我介紹環節後就到傾計時間，參加者會先同坐喺附近嘅人傾計，話題通常都圍繞出身地、工作地點、興趣、假日休閒活動等大小事。而喺聊天過程中，雙方就會趁機判斷對方係唔係啱傾，同埋係唔係心儀類型。如果雙方有意，就會喺聯誼結束前互相交換LINE ID，主辦人亦會建立LINE群組方便大家完咗活動都可以互相交流分享。