講到日本「麵粉類美食」嘅代表就會諗到「御好燒」。御好燒係將麵粉與水混合成麵糊，加入椰菜等蔬菜、豬肉、魚貝類等食材，於鐵板上煎烤製成嘅美食之一。當中最具代表性嘅御好燒，分別有關西風御好燒與廣島風御好燒兩大派系，亦係當地嘅靈魂食物，喺大阪與廣島嘅主要車站周邊，會見到多間御好燒嘅名店。
另外，講到東京嘅「麵粉類美食」，就係文字燒！用水慢慢溶解麵粉變成湯狀液體，混合食材後放上鐵板煎烤，各自使用「小平鏟」享用美食。今次，小編會為大家介紹日本嘅麵粉類美食、御好燒與文字燒嘅製作方法！
御好燒嘅起源原來係小朋友嘅點心⁉︎
關於御好燒（お好み焼き）嘅起源有多個講法，其中一個係有提及到日本嘅「麵粉類美食」誕生於安土桃山時代。當時日本派遣往唐朝嘅官方使節將中國嘅煎餅※帶返去日本，其後，以茶道聞名嘅日本人千利休製作咗一款以麵粉為主材料，名為「麩燒」（ふのやき）嘅茶點，並被廣傳開去而成為御好燒嘅起源。呢款「麩燒」亦被稱為日本御好燒嘅原型。
之後，從江戶時代到明治時代，「麩燒」於平民中普及，繼而誕生出「文字燒」（もんじゃ焼き） 、「DONDON燒」（どんどん焼き）等麵粉類美食。受西餐熱潮影響，搽上醬汁嘅食物被稱為「一錢洋食」，並作為小朋友嘅點心於全國廣泛傳開。
於第二次世界大戰後日本陷入糧食困境，呢個時期大阪燒作為主食並被普及。當時，將麵粉與水混合成麵糊，加上平價又有份量嘅椰菜等煎烤，然後淋上醬汁，被當作主食食用。喺戰前，御好燒只係小朋友嘅點心，戰後演變成為主食並被普及。喺昭和30年（1955年）左右，根據唔同店舖與地域，所使用嘅各種食材亦有所不同。另外，「御好燒」之名係因為「煎烤客人鍾意嘅食材」而得名。
※用水溶解麵粉後，烤製成類似可麗餅嘅食物
你又鍾意邊款？廣島風格「堆疊燒」 VS 關西風格「攪拌燒」
「御好燒」分為關西風&廣島風兩種御好燒。廣島風御好燒嘅製作方式係，於鐵板、平底鍋上倒上麵糊，先將麵糊以製作可麗餅嘅方式煎成薄片，喺上面擺上一款又一款嘅配料，以「堆疊燒」方式製作，但唔會將椰菜、蝦、豬肉等食材混合於麵糊當中。另一方面，關西風御好燒係將食材與麵糊混合，以「攪拌燒」方式製作，無論係外觀與口感，與廣島風御好燒都完全唔同。
關西風御好燒&廣島風御好燒嘅製作方法、煎烤重點係？
跟住落嚟會介紹一般家庭都可以輕鬆製作嘅關西風御好燒食譜，以及煎烤關西風御好燒&廣島風御好燒嘅重點分享。
關西風御好燒食譜
日本人嘅靈魂食物——「御好燒」，只需攪拌混合後煎烤即可，非常簡單！可自選心儀嘅食材去製作。
御好燒材料
- 麵粉...100g
- 天婦羅粉...15g
- 雞蛋...1隻
- 高湯調味粉... 3茶匙
- 溫水...120ml
- 椰菜...150g
- 紅薑絲...適量
- 沙律油...適量
- ※根據個人喜好，可加入混合海鮮、芝士、明太子、年糕等食材，最後放上海苔、柴魚片會更加好味道。
御好燒製作方式
- 喺容器中放入麵粉、雞蛋、高湯調味粉、溫水，輕輕攪拌。
- 加入椰菜、天婦羅粉、紅薑絲與其他食材，攪拌均勻。
- 於平底鍋上倒上油，以中火加熱。放入②並攤開麵糊煎烤3分鐘左右。
- 將御好燒翻面，加入水1湯匙。冚上蓋後烘烤約5分鐘。
- 打開蓋後將御好燒翻面，再煎烤約2分鐘。
- 將御好燒上碟。淋上醬汁、蛋黃醬、海苔、柴魚片等就完成。
製作美味關西風御好燒嘅重點
如果想煎烤出美味嘅御好燒，就要注意麵糊嘅順滑度，避免使用粗糙嘅麵糊，因此要將麵粉先過篩再使用。另外，據聞喺大阪等當地有唔少家庭會放入磨碎後嘅山藥，令麵糊更鬆軟。
另外，將鐵板上嘅麵糊翻面時，訣竅係要向內翻，咁就無易變形！想要製作出柔軟口感嘅御好燒，訣竅就係煎烤嘅時候唔好按壓麵糊，呢點非常重要！
製作美味廣島風御好燒嘅重點
如果要煎烤出美味嘅「堆疊燒」廣島風御好燒，關鍵係以製作可麗餅嘅方式，將麵糊煎成薄片。喺均勻攤開嘅麵糊薄片上，放上椰菜、芽菜、天婦羅炸渣、青葱、肉類等食材後再翻面，然後放喺另外整好嘅炒麵與薄煎雞蛋上，淋上醬汁與蛋黃醬等即大功告成。
「文字燒」嘅由來係？究竟東京月島名產「文字燒」係一款點樣嘅料理⁉
文字燒是將食材煎烤好，再倒入以麵粉與水混合好嘅液體，於鐵板上煎烤而成嘅美食。雖然材料與御好燒相似，但因為水份非常多，所以用鐵板煎烤後會變成糊狀，需要各自使用專用嘅小平鏟，從鐵板上撈起享用。
「文字燒」（もんじゃ焼き）呢個名嘅由來，係因為喺物資不足嘅時代，買唔到紙等物資嘅小朋友們用將麵粉與水攪拌後嘅麵糊於鐵板上寫字，邊玩邊識字而被命名。文字燒最初被稱為「文字焼き」，及後其平假名嘅「もじ」變成「もんじ」，再演變成「もんじゃ」。現時，東京月島仍有多間文字燒店舖。
製作美味文字燒嘅重點
將麵粉與水按1:17嘅比例混合，加入喼汁，攪拌混合製作成液體狀麵糊。喺鐵板上將椰菜、天婦羅炸渣等食材，整到好似冬甩咁嘅空心圓形，由圓形正中間位置開始倒入液體狀麵糊。麵糊煮好後，將食材混合攤開，用小平鏟邊撈邊食煎烤好嘅部分。可以按個人喜好選擇調味料，亦推薦搭配醬汁、七味粉、醬油、胡椒粉等享用。
享用文字燒嘅樂趣，就係邊整邊食「飯焦（鍋巴）」嘅部分！飯焦係指用鍋、鐵板製作料理時所出現嘅稍微燒焦變成茶黑色嘅焦香部分，煎烤好食材與醬汁嘅香味，令人食欲大增。亦有文字燒店嘅客人為咗製作出「鍋巴」嘅部分，會將液體狀麵糊壓喺鐵板上，讓其成為焦香酥脆嘅「飯焦」後再享用。
不過要注意唔好煎過頭，到時變到成舊炭咁就放唔到入口啦！所以要好好睇住火候，慢慢享用喔。
相關文章
Comments