日本新年參拜最受歡迎嘅神社寺廟5選~東日本篇~

一提到日本新年必做嘅重要事項就係新年參拜（初詣、Hatsumode）。喺新一年嘅開始會到神社寺廟參拜，向神明表達對前一年嘅感謝，並祈求新一年一切順順利利。日本人通常會喺1月7日之前就去新年參拜。喺呢個期間有好多神社同寺廟會舉辦各種活動，參拜之餘，仲可以感受日本新年氣氛！

歷年新年參拜人數日本第一嘅明治神宮

明治神宮係供奉明治天皇同皇后昭憲皇太后嘅神社，係東京知名具代表性嘅神社之一。明治神宮位於東京都市中心，人造樹林如天然林般自然生長，從每棵樹都可以感受到神秘力量。俗話話「好嘅開始就係成功嘅一半」，嚟明治神宮新年參拜，保證可以神清氣爽咁開始新嘅一年！

而且新年參拜期間，明治神宮內嘅廣場每年都會擺攤。每年都一定會有炒麵、御好燒、章魚燒等等攤販，特登嚟攤販探個究竟嘅都大有人在！

相關資訊

• 新年開放參拜時間：
• 12月31日 6:40～1月1日19:00
• ※跨年夜至元旦清晨，成晚都會開放參拜
• 1月2・3日 6:40～18:30
• 1月4日 6:40〜18:00
• 地址：東京都涉谷區代代木神園町1-1
• 交通方式：JR原宿站徒步1分鐘
• 地下鐵千代田線・副都心線明治神宮前站徒步1分鐘
• JR代代木站徒步5分鐘
• 都營大江戶線代代木站徒步5分鐘
• 小田急線參宮橋站徒步5分鐘
• 地圖：
  

擁有1080年悠久歷史嘅成田山新勝寺

成田山新勝寺每年都有300幾萬人次到訪參觀，係全日本數一數二嘅新年參拜景點之一。因為離機場近，到訪嘅外國遊客都好多。喺江戶時代，大家虔誠篤信寺內主要供奉嘅不動明王，通稱「お不動さま（ofudousama）」，喺歌舞伎表演中演繹不動明王嘅舞台亦大受歡迎。廣闊嘅寺廟境內，除咗眾多殿堂以外，仲有綠意盎然嘅公園以及好個開運寶地以及好運能量景點，到處都係必睇必行嘅地方，嚟到呢度隨時可以行成日！新年參拜之後仲可以享受呢度嘅特產鰻魚。參拜道路沿途聚集咗好多名店，最適合順便盡情品嘗傳統美味！

相關資訊

• 新年開放參拜時間：
• 1月1日 0:00～19:00
• 1月2日 6:00〜18:00
• 1月3〜7日 6:00〜17:00
• 1月8日之後 5:30〜17:00
• ※寺廟境內全天開放
• 地址：千葉縣成田市成田1
• 交通方式：JR成田線成田站徒步約10分鐘、成田本線京成成田站徒步約10分鐘
• 地圖：

想消災解厄，就去「川崎大師」！

川崎大師於1128年創建，神社主要供奉弘法大師，自古以嚟以「除厄弘法大師（厄除けのお大師さま）」之名而為人熟悉。寺廟內每日都會進行消災解厄以及諸願實現嘅護摩祈願儀式，而喺正月嘅時候，神社往往都會擠滿為求新年消災解厄、順順利利、家宅平安、交通安全、生意興隆而到訪嘅參拜者！

新年正月期間，表參道同仲見世大道上嘅商店都會營業。川崎大師特產「Tontoko糖」屬必食名物！

相關資訊

• 新年開放參拜時間：
• 12月31日 6:00～1月1日18:30
• 1月2、3日 6:00〜19:30
• 1月4日 6:00〜18:30
• ※寺廟境內全天開放
• 地址：神奈川縣川崎市川崎區大師町4-48
• 交通方式：從京急川崎站轉乘大師線,然後喺川崎大師站落車徒步8分鐘
• 地圖：

祈求生意興隆，就去新宿花園神社！

去新宿新年參拜，首選絕對係花園神社。花園神社於江戶時期之前就已經係總鎮守，備受當地人民虔誠篤信，屬於一座歷史非常悠久嘅神社。而且神社同演藝界亦有深厚淵源，眾多知名藝人都會前去參拜，因此每年新年參拜成為咗演藝界相關人士或者係經商人士祈求生意興隆嘅熱門景點。新宿有好多餐飲店或者係商業設施喺元旦一月一日就開始營業，參拜完之後去行街購物，享用一餐美好午餐就perfect！

相關資訊

• 新年開放參拜時間
• 12月31日 8:00～1月1日22:00
• 1月2日 8:00〜19:00
• ※神社境內全日開放
• 地址：東京都新宿區新宿5-17-3
• 交通方式：
• 東京地鐵丸之內線・副都心線・都營新宿線「新宿三丁目站」E2出口直達
• JR、小田急線、京王線「新宿站」東口徒步約7分鐘
• 地圖：
  

想食腐皮壽司？就去豐川稻荷神社

豐川稻荷神社大約喺600年前開創，係眾多武士同文人嘅信仰。喺江戶時期平民百姓深信參拜稻荷大神，可以保佑生意興隆、家宅平安，稻荷信仰因而擴展至日本各地。豐川稻荷神社係日本三大稻荷神社之一，每年都有幾百萬人前嚟參拜。喺豐川稻荷神社門前，有好多商店販售名產豐川腐皮壽司（稲荷寿司 ），仲有「芥末腐皮壽司」同「什錦腐皮壽司」等等種類豐富，參拜完之後，不妨品嘗一吓腐皮壽司，盡情享受佢嘅美味啦。

相關資訊

• 新年開放參拜時間：
• 12月31日 23:45～1月1日21:00
• 1月2、3日 5:00〜21:00
• 1月4日之後 5:00〜19:00
• ※神社境內全天開放
• 地址：愛知縣豐川市豐川町1番地
• 交通方式：JR飯田線豐川站或乘搭名鐵豐川線｢豐川稻荷站｣落車徒步5分鐘
• 地圖：

※本篇文章刊登於2017年12月※2020年12月22日更新※