就嚟又到聖誕節！聖誕節係基督教徒慶祝耶穌誕生嘅盛事，但日本人大多數係無宗教，不過就係一個鍾意熱鬧，乜嘢節日都過嘅民族。特別係聖誕節對日本人嚟講，都係一個超重要嘅節日，不過同歐美國家嘅慶祝方法就完全唔同！今次要嚟介紹日本人有啲獨特嘅過聖誕節方法，鍾意日本嘅朋友，話唔定都已經見識過當中部分例子…?!
點解日本人聖誕食炸雞？仲要係連鎖快餐店嘅炸雞？！
講到聖誕節，就當然係食火雞啦！不過因為日本並唔係咁容易買到火雞，所以每逢到聖誕節，大家會用周圍都買得到嘅燒雞或者炸雞代替。
以上嘅講法尚可以理解，但日本人聖誕買最多嘅聖誕節(火)雞，竟然係某間K字頭嘅炸雞專門快餐店炸雞！係咪難以置信呢？喺聖誕節呢個重要節慶，竟然仲要喺快餐店門口大排長龍，等一兩個鐘去買炸雞，外國人睇咗眼裡應該會覺得好有趣。不過據聞聖誕節辛辛苦苦排隊買到炸雞食嘅話，會特別好食。你要唔要都試吓呢？！
聖誕節係同情人度過嘅浪漫節日！？
喺歐美地方，聖誕節係同屋企人一齊過嘅最重要節日之一，但係喺日本，聖誕節就係同情人一齊過嘅浪漫節日。每年喺聖誕節前嘅一個月，日本各地嘅餐廳、酒店都會開始推出情侶套餐等，通常都係好快就預約滿座嘅狀態！無論係訂酒店、餐廳，定係送高級昂貴嘅禮物畀情人，都係日本嘅主流；而仲係單身嘅人士，都會努力喺聖誕節之前搵返個伴！「一定要喺聖誕節之前搵到戀人」，可能就係日本年輕人嘅聖誕宣言！
但係，如果去到聖誕節仲係獨身嘅話…？聖誕節就唔使過啦！？
唔通日本嘅聖誕節都只係為咗情侶而設？叫獨身人士點算好…？「我覺得自己是零…」
細心體貼嘅日本人當然準備周到！為求單身人士福利，日本甚至會餐廳特別喺聖誕節當日拒絕情侶入店用餐、又或者如果肯喺聖誕節打工嘅人，會有較好嘅待遇、較高嘅時薪等！有唔少毒身(獨身)嘅網民都係喺屋企獨自度過聖誕節，所以網上都會熱哄哄咁話「獨身聖誕節萬歲！唔使過聖誕節！」。喺日本，聖誕節有可能喺單身人士最唔想過嘅節日吧！
其實有過節嘅氣氛唔係25號聖誕節當日，而係24號平安夜！
聖誕節正日係12月25日，然而喺日本，大多數嘅人都會揀喺12月24日度過。當日某家著名連鎖炸雞快餐店會大排長龍，大家爭相購買炸雞返屋企過節。對於情侶嚟講，則係一齊度過浪漫嘅一日，而獨身人士就係同朋友互相安慰慶祝嘅日子。其實喺24日平安夜各地狂歡之後，25日反而顯得一片寧靜，有啲店家甚至會已經收起聖誕節嘅相關商品，悄悄咁換上日本新年裝飾嘅門松、松樹擺設等。想體驗日本嘅聖誕節氣氛嘅話，25號就已經太遲啦！只有24日平安夜先至可以感受到日本濃濃嘅聖誕氣氛喔！
聖誕節點解要食士多啤梨忌廉蛋糕？
美國嘅聖誕節一般會食甜品同曲奇，德國就食德式蛋糕，各國喺聖誕節食嘅野都有啲唔同。而喺日本，大家一般會喺聖誕節食有士多啤梨裝飾嘅忌廉蛋糕，原因係某間糖果公司嘅宣傳廣告做得相得成功。自從廣告出街之後，每年聖誕節食士多啤梨忌廉蛋糕就變成習慣。相似嘅習慣，仲有朱古力公司為咗情人節推出朱古力禮品，之後就變成習俗一直流傳落嚟，其實好多節日習俗都係受到廣告宣傳嘅影響呢！
聖誕蛋糕一般都係喺平安夜食用，25日過後嘅聖誕蛋糕，就係賣剩嘅倉底貨。以前日本社會嘅女性喺24歲以前結婚係好普遍，日本人會以25日過後嘅聖誕蛋糕，嚟形容過咗25歲未嫁嘅剩女…由此亦可見，日本聖誕節同戀愛關係密切！
睇完以上關於日本聖誕節嘅介紹，你有咩感想呢？喺聖誕節，日本嘅大街小巷都裝飾著絢麗爛漫嘅燈飾，非常靚，好浪漫同埋好有聖誕氣氛！不妨喺呢個時候，同親朋好友一齊到日本旅遊，感受濃厚嘅聖誕氣氛！當然，亦唔好唔記得去某連鎖快餐店買炸雞啊，至少都去見識吓排隊嘅人龍嘛！
Comments