位於四國嘅愛媛縣以壯觀城堡及寺廟聞名，並以綠意盎然嘅松山市作為首府，但令該縣真正聲名遠播嘅則係溫泉。道後溫泉係日本最古老嘅溫泉之一，就連幾個世紀以來嘅日本皇室成員都曾經喺到浸過溫泉！淨係有機會體驗咁神聖嘅溫泉，就足夠值得去愛媛縣旅行啦！
除咗著名溫泉，愛媛縣仲有好多風景秀麗嘅城鎮，呢啲城鎮相比起東京等繁忙大城市，無疑可以令人暫時放慢腳步。好多遊客都會經由首府松山進入愛媛縣，為求感受當地嘅悠閒魅力及極具吸引力嘅觀光名勝，又或到大洲等地感受懷舊日本氣氛。
愛媛縣景點從南到北遍佈各地，要一次過制霸相當有難度。今次就等編輯部為大家介紹愛媛縣必睇重點啦！
10大推薦旅遊景點
我哋會按愛媛縣北部至南部順序作介紹。
1. 島波海道（今治市）
「西瀨戶自動車道」（ 暱稱「島波海道」）從廣島縣尾道市一直延伸到愛媛縣今治市，由10座大大小小橋樑連接而成，係一條日本非常著名嘅單車徑，有唔少遊客都會嚟到租車並體驗單車樂㗎！
該區名物料理為「燒豚玉子飯」，只需要將燒豬肉片與熱騰騰嘅荷包蛋放喺白飯上並淋上特製醬汁即大功告成，係一道簡單又好食嘅丼飯料理。散步或踩完單車後覺得攰時食到呢道味道濃郁嘅料理的話，保證您胃口一定大開！
2. 松山城（松山市）
松山城天守係日本「現存十二座天守」之一，並入選為「日本100名城」及「日本歷史風土100選」。如果您鍾意參觀日本城堡，咁就一定就唔可以錯過松山城！城堡內部歡迎參觀，係一項非常有趣嘅體驗。
3. 少爺列車 & 從水龍頭流出嘅橙汁（松山市）
「少爺列車」係一列行駛於松山市區內嘅蒸氣火車，模仿夏目漱石於松山市工作時乘搭嘅火車設計而成。火車頭轉換方向時需要透過工作人員人手移動，夠晒特別！
喺以遊客為主嘅旅遊區，更有部分水龍頭只要扭開就會有橙汁流出嚟，喺街上散步觀光時不妨多多留意！您亦可以喺愛媛縣松山機場及松山市內嘅紀念品店發現到呢種水龍頭。柑橘類水果係愛媛縣特產，記得一定要試試佢嘅鮮榨果汁喇！
4. 道後溫泉（松山市）
道後溫泉擁有超過3000年歷史，係日本最古老嘅溫泉。特別係有大約120年歷史、3層樓高嘅木造建築物「道後溫泉本館」，即使您對溫泉無興趣都一樣非常值得參觀！
相關文章：於愛媛縣道後溫泉感受傳統日本懷舊氣氛
5. 下灘站
下灘站係JR四國予讚線其中一站，位於香川縣高松站與愛媛縣宇和島站之間。車站係多套電影及電視劇嘅取景地，好多遊客經過車站時都會落車並把握時間影相。呢到除咗有一座車站建築物以及大海景色以外就無任何其他景點，簡單又寧靜嘅風景就係最大特色。
6. 別子銅山（新居濱市）
別子銅山係一座從江戶初期到昭和時代期間持續超過400年、世上數一數二大規模嘅銅山。銅山小鎮人口曾多達1萬人，城內甚至仲有醫院、學校及娛樂設施等設施；其後則作為大自然中嘅近代產業遺跡完整保存至今。東平地區內更可欣賞到被稱為「東方馬丘比丘」嘅絕景𠻹！
7. 「仁淀藍」誕生地—日本最清澈溪流「面河溪」 （久萬高原町）
仁淀川水質清澈蔚藍。遊客嚟到位於上游嘅面河溪的話，即可欣賞到極夢幻嘅蔚藍河水。
8. 佐田岬半島
佐田岬半島係日本最狹長嘅半島，由於島上一整年都吹著強風，因此半島上建有風力發電所。半島附近嘅國道197號被稱作「佐田岬旋律之路」，非常適合鍾意揸車兜風嘅您。沿著海拔約200米嘅山脊道路自駕的話，您更可以欣賞到大大個無敵海景！
9. 內子町（喜多郡內子町）
內子町內林立著多幢傳統風格嘅町家及富商宅邸並以建造當時風貌保存至今。遊客可以喺小鎮內感受日本懷舊風景之美。其中又以區內嘅木蠟資料館「上芳我邸」最值得參觀，建築物由當地富豪宅邸嘅一部分改建而成，豪華氣派令人讚嘆。鎮上設有和服租借店，您可以一嚐穿著和服於街上散步嘅滋味。
10. 大洲 Ozu
少彦名神社分布於日本全國各地，而喺大洲地區內就有唔少少彦名相關傳說及地方，特別係面向肱川嘅大洲少彦名神社。沿著山坡前進，一路上您可以見到鳥居、參籠殿、拜殿、中殿及本殿（御陵）等歷史建築。
購物和免稅
道後溫泉商店街
如果想搵愛媛縣紀念品，咁去道後溫泉商店街就啱晒！商店街以手工藝品聞名，您可以喺到搵到一種名為「伊予絣」嘅傳統染色靛藍織物。織物於現代被用於製作衣服及玩具等各式商品，非常適合您買嚟當作愛媛工藝品。其他推薦紀念品則仲有從220年前就開始生產嘅「砥部陶器」。
高島屋
高島屋係一間日本百貨公司，如果想喺松山享受難忘購物體驗，咁高島屋就絕對不容錯過！作為一座大型購物中心，百貨公司內分為多個商品區域，例如男女時裝、飾品及家庭用品等，同場更有一座大型摩天輪，方便遊客欣賞城市景色。
如何前往愛媛
乘搭飛機
愛媛縣最主要嘅機場係松山機場。從東京羽田機場、名古屋小牧機場、大阪伊丹機場、福岡機場、沖繩機場都有班機直飛松山。由愛媛縣松山機場直達松山站嘅巴士票價為300日圓，前往道後溫泉嘅巴士票價則係450日圓。
乘搭電車
愛媛縣松山站位於JR予讃線上，您可以先乘搭山陽新幹線到岡山，再從岡山轉乘電車到松山，全程約3小時、車資6,630日圓。另一種方式係從東京站乘搭Sunrise Seto(日出瀨戶號)夜行寢台列車，於坂出站轉乘前往松山嘅Ishizuchi Express（石鎚號列車）。
乘搭巴士
您可以從松山乘搭JR四國巴士前往四國各地。由高松至松山嘅「少爺高速巴士」票價為3,900日圓、車程約3小時。從高知到松山有「南國高速巴士」，車程同樣約3小時、車資3,500日圓；從德島則有「吉野川高速巴士」可以到松山，車程超過3小時、車資4,300日圓。另一選擇係從岡山乘搭「Madonna高速巴士」，車程3小時、車資4,300日圓。
從東京出發嘅旅客可以乘搭夢幻高松-松山巴士，車程10小時，票價因座位級別而異，價位為12,000日圓到14,300日圓之間。
Comments