世界各地都可以見到有唔少人揸日本車，但係其實日本開始生產製造汽車嘅歷史遠比歐美國家起步遲。日本之所以成為汽車大國嘅其中一個理由就係會依照各個國家同地域嘅特性嚟設計車款。舉例喺東南亞同印度高銷量嘅車, 都係可以行駛喺崎嶇道路嘅車款, 同日本車款相比, 車嘅底盤同地面嘅距離都會多啲。相反, 東南亞地區唔需要嘅裝備，又會喺日本賣嘅車款出現。今次就特別介紹喺亞洲好少見, 但喺日本就好常見嘅有趣裝備啦！
寒冷嘅日本冬日下帶給你溫暖嘅暖氣座椅
大家都知日本嘅冬天比起東南亞各國更凍, 冬天時東京嘅氣溫低過零度都有，喺呢個時候暖氣座椅就特別有用喇。座椅曖氣嘅溫度可以自由調校。以前只有高級汽車先會有呢個裝備，最近100萬円以下嘅輕型車都內置咗喇，仲好受歡迎添。座椅暖氣功能對東南亞國家嘅人嚟講，可能唔多需要, 但係喺日本好凍嘅時候，就要用呢個功能，真係好舒服㗎！
節省到燃料費嘅功能
日本人買車時，會考慮其中一個因素就係一公升燃料可以行到幾多公里。所以廠商製造汽車時, 大部份都會安裝節能按鈕。當你㩒個節能按鈕時，汽車嘅能源動力就會被制限，咁就可以減少到汽油或者柴油嘅使用量。當然呢個功能都唔算係可以提昇汽車性能，只係當你唔小心太大力踩油時，車嘅加速都唔會好猛烈。實際上用咗呢個功能，意外地慳到油㗎！
先進嘅安全系統
日本現時好流行嘅selling point係「預防車禍發生」嘅先進安全系統。當初只係為咗避免車同車互相碰撞而開發，但呢個系統現時已經有好大進步，前方嘅監視鏡頭會一直監測，當有人或者單車突然出現喺前面條路時，會自動煞車。如果煞唔切車，軚盤會自動操作去防止撞擊。呢個喺目前汽車製造商間係好激烈嘅競爭, 因為大家都應該會想買部可以預防車禍發生嘅車啦係咪?
空氣清新器
想坐一部舒適嘅車, 其中一個不可或缺嘅裝備就係冷氣喇。喺日本嘅車，唔單止係冷氣咁簡單，仲配備淨化空氣嘅裝置，即係空氣清新器。有呢個功能嘅車款現時越嚟越多。當你前方嘅貨車排出嘅廢氣入咗部車時，有呢個功能就可以喺短時間內消除臭氣。呢個功能可以睇得出日本人真係好重視舒適度呢！
紅燈偵測系統
呢個係好新嘅功能。我諗唔少駕駛者都試過, 當遠方交通燈明明顯示綠燈，但係開到嘅時候就變咗紅燈，咁樣就真係好可惜。而最近新登場嘅功能就可以話俾駕駛者知「仲有幾秒會變紅燈」呢個資訊。車嘅側邊會有裝置去分析情報，所以會知道「就算現時係綠燈，但係開到時會變紅燈，所以加速都係無用嘅」，又會話你知「時速幾多可以喺變黃燈前通過」之類嘅即時資訊。
以上呢啲舉例都只係一部分咋。仲有好多係日本國內發售嘅車有配備，但東南亞國家嘅車無嘅又便利又有趣嘅裝備呀。而配備呢啲功能嘅日本新款車都陸續可以租借到喇。下次去日本自駕遊嘅各位，都可以揀呢啲車款試試體驗吓呀！
Comments