大獲好評嘅「打開日本女生手袋 」系列又同大家見面！今次要介紹嘅，係仔仔現正就讀小學嘅潮人靚媽媽嘅手袋。同時身兼媽媽、太太同職業婦女三個角色嘅佢，每日過著忙錄生活，好似無太多時間去特別整理手袋，但事實上呢位媽媽嘅手袋就如圖所見，整體用嘅嘢都較多明亮顏色，一望上去就畀人一種精神爽俐嘅感覺。事不宜遲，就等我哋嚟睇睇呢位面上一直帶住笑容嘅靚媽手袋啦！
重要又一定會用得著嘅物件，就算貴啲都值
手袋拎上手都有少少重量，入面放有錢包等嘅貴重物品。靚媽認為「每日都用到嘅話，就算價錢貴啲都值得買」，所以佢嘅銀包係高級名牌真皮銀包，原因係睇中皮製品用得耐，顏色就會跟住變，越用越有風格味道，變化過程亦令佢覺得非常有趣。真係成熟又時尚嘅講法！ 不過佢同時亦都笑住話：「用有質感嘅物品，總係唔知點解會令人有種扯緊全身嘅嘅緊張感呢！」
因為要帶仔仔戶外活動，所以一定會隨身攜帶應付女性天敵紫外線嘅用品，同埋止汗用品
靚媽育有一名正就讀小學嘅活潑仔仔，幾乎每日都會出街玩或者參加活動。經常身處陽光下嘅佢，當然絕對唔少得防曬啦！呢支喺日本好出名嘅防曬產品ALLIE，就係佢多年以嚟嘅愛用品，唔單只咁，手袋內仲備有扇同毛巾，因為外出時係一定會流汗，所以呢啲用品可以話係必備。而流汗之後，就仲要補防曬，所以一定要隨身帶備大支裝對付紫外線。咁多工夫，唔怪得佢皮膚保養得咁好啦！
各位睇完佢嘅手袋介紹覺得點呢？日本都有「一白遮三醜」嘅講法，呢位媽咪可以話係每日都好勤力咁搽防曬以保持白皙肌膚，不愧係一個潮人靚媽！之後我地仲會介紹佢嘅化妝袋入面裝啲乜！敬請期待！
Comments