【日本祭典】湘南平塚七夕祭

日本每年一到7月7日前後，全國各地會舉行大小唔同規模嘅七夕祭典。其中，你有聽過喺神奈川縣舉行嘅「湘南平塚七夕祭」嗎？呢個祭典，每年會吸引約200萬人次遊客前往參加。究意佢有什麼乜嘢特別之處呢？不如跟FUN! JAPAN一齊感受吓呢個七夕祭典啦。

湘南平塚七夕祭

平塚市最初係為咗振興經濟而開始舉辦祭典，呢個七夕祭典嘅裝飾豪華程度可算日本第一。每逢祭典期間，平塚站附近隨處可見各種裝飾同彩色紙條。平塚商店街到處都可以見到紙燈籠、扇子、公仔同埋用飾品裝飾而成嘅長竹桿，呢啲華麗嘅燈籠，主要係由當地餐廳同商店贊助。到咗夜晚，呢啲裝飾仲會打燈，沿路都有好多舖頭同小食檔攤。

成條商店街都可以見到華麗嘅裝飾，出入口嘅招牌上都寫咗「歡迎來到湘南平塚七夕祭」，歡迎大家去共襄盛舉。

日本將七夕呢日演變成了「祈願」嘅日子，佢地會將心願寫喺細長嘅五色紙箋上，再綁到小竹枝等上面，藉由節節向上嘅竹，將自己嘅心願傳達到天上。所以，嚟到湘南平塚七夕祭，都可以見到浴路都掛滿寫咗心願嘅五色紙。大家有機會去嘅時候，都不妨寫低自己嘅願望。

體驗日本特色檔攤

喺日本祭典上面，經常會見到賣章魚燒、炒麵、棉花糖等平民美食嘅檔攤，仲有以娛樂遊戲為主嘅遊戲檔攤等。當然，喺湘南平塚七夕祭都可以見到呢啲檔攤！現場仲有賣小朋友玩具嘅檔攤，除咗卡通人物面具之外，仲有水溜球、氣球等玩具。

行到攰咗覺得肚餓，推介要去品嘗地道美食嘅檔攤！祭典期間，成條商店街大約有上千個小食檔，章魚燒、什錦燒（包咗蔬菜同肉嘅蛋捲）、炒麵、焦糖蘋果等通通都有，千祈唔好錯過。

日本特有嘅消暑方式 令人不寒而慄嘅「鬼屋」

日本人喺夏天有一種另類嘅消暑方式，就係聽令人毛骨悚然、不寒而慄嘅鬼故嚟降溫。係咪一個好獨特嘅消暑方法呢？「湘南平塚七夕祭典」最特別嘅係，你仲有機會入鬼屋，體驗一下呢個可以嚇到毛管洞嘅降溫方式，門票由100日圓至500日圓不等。(資訊係採訪當時價格，實際價格依檔攤而定)

小編都好奇咁入咗鬼屋參觀，喺鬼屋「撞鬼」之後，又再返到商店街上同真實嘅人類相聚。如果將來機會喺7月頭去日本嘅話，推薦可以將參加「湘南平塚七夕祭」列入行程計劃！

【祭典相關資訊】

• 祭典名：湘南平塚七夕祭（Shonan Hiratsuka Tanabata Festival）
• 地點：神奈川縣平塚紅谷町（JR平塚駅北口商店街）
• 日期：每年7月7日前後(詳細舉辦日期請上官網查詢)
• 時間：早上～21:00（最後一日20:00完結）
• 入場費：免費
• 交通方式：JR平塚駅北口步行2分鐘