由於日本係被海圍繞嘅島嶼國家，所以佢有好多風景優美嘅港口城鎮。雖然日本内陸嘅風景都好值得睇，但係如果錯過日本沿海地區幾個最正嘅港口城鎮咁就實在太可惜喇！如果你期待陽光、海浪、沙灘甚至係一啲又有歷史性、又有文化嘅地方，咁你就一定要去日本港口一遊喇！
喺呢度想同大家介紹幾個喺日本值得一遊嘅港口城鎮。
橫濱市（Yokohama）
橫濱市係全日本嘅港口之中可以講係最出名、最大嘅港口。由於橫濱市好近東京，要去橫濱市都唔係件難事。如果想用最短時間同最實惠嘅方式去最好嘅港口，咁橫濱市肯定係不二之選。橫濱市嘅海濱以摩天輪同“港未來21”（Minato Mirai 21）最為出名。“港未來21”裡頭有好多商店、餐廳甚至博物館。除此之外，橫濱市內仲有其他值得造訪嘅地方例如三溪園（Sankei Garden）同規模好大嘅中華街，可以俾旅客有多啲唔一樣嘅旅遊體驗。
大阪（Osaka）
大阪係深受外國旅客喜愛嘅城市之一，但你知唔知其實佢都係一個港口嚟？大阪嘅港口地區“天保山”（Tempozan）有好多魅力景點，包括日本環球影城，仲有同橫濱市相似嘅娛樂區。另外，呢個地方有一樣絕對唔可以錯過嘅，就係大阪水族館“海遊館”。雖然大阪嘅港口區富有好多旅遊價值，但如果你想走進佢哋嘅內陸地區，你都唔會對其他旅遊景點例如大阪城，日式美食餐廳、咖啡店等感到失望。
長崎市（Nagasaki）
長崎市坐落喺日本九州嘅西側沿海地區，係一個風景優美嘅海港。你可以從“哥拉巴園”（Glover Garden）山丘上將整個長崎市嘅風景一眼看盡，仲可以欣賞到佢嗰個好靚嘅海灣島嶼景色。除此之外，你都可以喺長崎觀賞到爲紀念喺第二次世界大戰原子彈轟炸當中喪失生命嘅人們而設立嘅和平紀念碑公園。
函館市（Hakodate）
函館市位於北海道，因函館市連接著兩個灣，令佢嘅港口比普通港口仲要大兩倍。其中函館市最吸引嘅地方就係近幾年不斷被改善嘅海濱，加上街頭表演同海邊嘅風光美景，令人感覺既舒適，又易於投入其中。如果你嚟到海邊附近，一定要去試吓呢個港口好出名嘅新鮮海鮮呀！
釧路市（Kushiro）
日本其中一個最大嘅港口「釧路市」係被釧路河分開嘅港口城鎮。呢度除咗有優美嘅海濱，仲有一啲海鮮市場。如果你較早嚟到呢度嘅話，你仲可以參觀嗰度嘅漁人碼頭，然後行吓個海鮮市場。釧路市海濱仲有一啲手工商店可以俾你買到手信添。
鹿兒島（Kagoshima）
位於九州嘅鹿兒島，因離主要大城市比較遠，可能較容易被旅人遺忘。但其實鹿兒島係其中一個你都絕對唔會想錯過嘅港口城鎮！佢其中一個主要景點就係活火山“櫻島火山”（Sakurajima Volcano）。此外，你仲可以享受喺春天季節時開滿櫻花嘅公園、城堡同博物館。雖然相比起嚟呢個旅程會比較攰，但如果你想去啲比較非主流嘅城市，呼吸吓清新空氣，鹿兒島絕對係一個好好嘅選擇。
Comments