揀啱秋天去東京旅行嘅您有福喇！事關即使身處石屎森林內，都一樣唔愁欣賞紅葉勝地！本文，編輯部就要私心向各位推薦秋日之旅一定要去嘅東京著名紅葉景點—位於青山周邊嘅明治神宮外苑。每逢秋季，明治神宮外苑內過百棵銀杏樹都會同時「染黃」，場面極度夢幻！
關於明治神宮外苑
「明治神宮外苑」簡稱為「外苑」，屬於供奉明治天皇嘅明治神宮嘅一部分。雖說外苑由明治神宮管理，但地理位置卻並非與明治神宮相連。與瀰漫傳統氣息嘅前者相比，後者更似西方國家所見到嘅公園。如果您有時間的話，不妨將兩者都編入行程，體驗截然不同嘅氛圍環境吖。
外苑範圍內設有棒球場、高爾夫球練習場、溜冰場等多個體育設施，亦有提供週末開放嘅單車徑，非常適合享受單車樂。
明治神宮外苑紅葉
總長300米嘅外苑大道兩旁種滿共146棵參天銀杏樹，而且銀杏樹都經過悉心修剪，令樹木能夠得以維持最佳高度讓途人欣賞。每年11月中旬起，銀杏樹就會紛紛轉黃，其後再到11月底至12月頭，就會迎來最佳觀賞時期。金黃色大道再加上襯托銀杏樹嘅博物館建築背景，場面可謂極之迷人，有人甚至會將漫天黃葉形容為「金箔」呢！的而且確，外苑非常適合影相打卡，尤其係秋天時分處處影相位，包保您影到手軟呀！
要留意嘅係，銀杏葉隨時都會凋落，就算您今日見到樹上長滿黃葉，都唔代表您第二日可以睇到同樣景象。不過，如同一匹長長金黃地毯嘅滿地落葉，都係另一番值得細味嘅優美景象吖！
神宮外苑銀杏祭
每年秋季，外苑一般都會於11月底至12月頭舉辦「神宮外苑銀杏祭」 。屆時場內將會由早上10點開放至傍晚6點，而週末及公眾假期更會提早開放30分鐘。祭典期間您會見到多間攤檔屋台出售各式小食，不失為一個機會品嚐日本各地特色小食與新鮮蔬果！如果您正打算到神宮外苑的話，就記得唔好錯過「神宮外苑銀杏祭」喇！
景點資訊- 地址：東京都況區北青山2-1
- 地圖：
Comments