大家知道日本人會點過新年嗎？其實，日本迎接農曆過年嘅方式類似香港，同樣要喺過年前大掃除，為門口佈置門松與綁上注連繩等裝飾品迎接新年。至於飲食方面，亦係相當講究！本文就要為大家介紹，日本人都會喺正月期間食嘅「御節料理」（おせち料理，Osechi-Ryouri）！
日本賀年菜「御節料理」
日本家庭過新年嘅方式同香港農曆過年有少少似，同樣都有食傳統賀年菜嘅習俗，而呢類料理喺日本就被稱為「御節料理」。事實上，「御節料理」並非一道特定食物，而係類似香港嘅賀年佳餚，通常用一層層嘅精美「重箱」盛載。原本，御節料理係指於季節變更、或重要節日時向神明奉獻嘅料理，一年之中唔只限食一次，後來逐漸演變成專指日本新年嘅「正月料理」，通常於新年頭三日，亦即係1月1日到3日之間享用。由於御節料理使用嘅食材保存期限都較長，放喺雪櫃內箱幾日都唔會容易腐爛，因此可以當作順便體貼辛苦咗一整年嘅母親們，喺過年期間終於可以好好休息喇！
具有象徵意義嘅精美設計
前面都有提到，御節料理一般會被裝於一層一層嘅盒內，內裡裝滿多款具有象徵意義嘅精美菜餚。傳統御節料理共有五層，分別係第一層(一の重)、第二層(二の重)、第三層(三の重)、第四層(与の重)與第五層(五の重)。應該會有人注意到，第四層點解唔係「四」呢？背後原因同中文相同，因為日文「四」嘅發音與「死」相同，命名係為咗避開「四」與「死」嘅唔吉利聯想。至於每一層會放啲咩食材呢？隨著地區及各家庭習慣，食物亦會有所不同，下面一於為大家介紹最基本嘅擺放方式與食材！
- 第一層（一の重）：慶祝菜餚。一般會使用代表吉祥·幸福嘅食材，例如黑豆，數子（鯡魚卵）以及「祈求豐收嘅魚類」，例如：沙丁魚乾。
- 第二層（二の重）：醃製物、涼拌菜等開胃菜。
- 第三層（三の重）：燒物，例如魚蝦海鮮。
- 第四層（与の重）：煮物。
- 第五層（五の重）：咩都唔放
點解第五層咩都唔放？理由有多種說法，其一係「象徵幸福源源不絕，根本裝唔完！」，亦有人認為「因為神明賦予畀世人嘅幸福會放喺第五層，所以應該咩都唔放！」
每種食材都象徵唔同意義
- 黑豆：祈願新一年能夠健康成長。
- 數子（鯡魚卵）：數子有「子女眾多」雙關意思。象徵子孫滿堂。
- 沙丁魚乾：祈求五穀豐收之意。
- 蝦子：代表長壽。而蝦身紅色亦被認為係護身符顏色。
- 鯡魚海帶卷：象徵新一年幸福快樂（日語「海帶」與「歡喜」發音相近）。
- 栗子泥：祈求財源廣進。
- 紅白魚糕：祈求平安。
近年，百貨公司或餐廳推出嘅御節料理多半都只有一層至三層，想要買到正統「五層」御節料理，要特別訂製先有松會享用得到呢。
Comments