立山黑部阿爾卑斯山脈路線被稱為「日本屋脊」，一路橫跨長野縣到富山縣。呢條路線穿越日本阿爾卑斯嘅立山，沿途可以盡情欣賞絕景，體驗非常精彩嘅旅程！
黑部峽谷5個知名景點
如果您擔心成段路咁長，要行山或者行路咁耐，咁就大可以放心啦。因為阿爾卑斯路線提供咗好多交通同體驗方式，有電動無軌巴士、360度架空索道同纜車等。
呢啲唔同嘅交通體驗，加上隨著季節變遷嘅唔同景色，正正就係呢條路線嘅魅力所在，當然除咗坐車之外，仲有其他方式可以體驗呢度嘅美，等我地一齊嚟去探索！
1. 日本最高嘅拱形水庫：黑部水庫
與大自然融為一體嘅黑部水庫於1963年峻工，建造工程歷經咗無數障礙同困難，現今成為日本最高嘅水庫，高186米。喺水庫後面嘅湖泊，水量有2億立方米，排洪時嘅水量達每秒10立方米，每年可以生產10 億kWh嘅發電量！
2. 眺望黑部峽谷最佳地點之一：大觀峰
阿爾卑斯路線上最好嘅觀景點之一，就係位於海拔2,300米懸崖上嘅大觀峰，位於黑部平站與室堂站嘅中間。乘搭黑部峽谷鐵道小火車同立山隧道無軌電車就可以去到大觀峰，喺大觀峰就可以好好欣賞連綿不絕山峰嘅壯麗景色。
3. 海拔2405米清澈湖泊：御庫裏池
呢座蔚藍嘅火口湖嘅壯麗景色，亦係室堂嘅象徵之一。呢座湖泊，冬天會被厚厚嘅白雪覆蓋到６月，只有７月至１０月期間，可以見到深藍色嘅湖水倒映出立山山景。占地範圍為3萬平方米，全湖周長631米，係室堂地區最大嘅湖泊，沿湖畔設置咗悠閒散步區域，可以慢慢咁悠然散步，享受呢片咁靚嘅大自然，據說周圍嘅松樹係雷鳥之家，話唔定仲可以好好彩咁親眼目睹雷鳥蹤影呢！
4. 世界級珍貴濕地：彌陀原
彌陀原和大日平呢片廣遼闊嘅濕地，孕育咗豐富嘅生態系統，係好多生物嘅家園。2012年7月登錄入拉姆薩爾公約（國際重要濕地公約），係呢度可以安心安全咁沿住木板步道行，就可以穿越多個池塘，好好欣賞呢個地區嘅唔同面貌景色。當中有一個由立山火山爆發形成嘅「立山破火山口觀景台」，另外仲有「一之谷道-獅子鼻路線」同埋稱為「餓鬼田」嘅沼澤池塘，呢啲咁獨特嘅景色都係唔可以錯過。最適合造訪時期係夏天，有色彩繽紛嘅蝴蝶陪你一齊欣賞眼前壯觀美麗。
5. 立山大雪牆：雪之大谷
立山室堂平原嘅豪雪堪稱世界上數一數二。所以，每年春天開山嘅時候，道路上嘅積雪被清除後，公路兩側就會形成長達500米嘅雪牆，而壯觀嘅雪牆高成20米，相當於7層樓咁高！
睇相嘅話，好似好危險，但採用人車分道設計，所以行人亦可以通行，畀觀光客近距離欣賞眼前震撼嘅雪白高牆，就算去到六月，雪牆最高高度都仲會有成10米左右。
於立山享受露天溫泉
喺立山黑部玩完成日之後，最好就係浸個溫泉嚟消除疲勞。越中砺波野温泉，係可以享受兩種泉質嘅溫泉，源自八尾同醫王山地層嘅水源，各自都擁有獨特功效，溫度適中唔會過熱，非常適合可以舒適咁浸個溫泉，好好放鬆一下。
由立山前往黑部峽谷嘅交通方式
由JR富山站出發，可以乘搭新幹線前往JR黑部宇奈月溫泉站，落車後步行至新黑部站，乘搭富山地方鐵道本線，於宇奈月溫泉站下車。然後步行到相鄰嘅宇奈月站，喺宇奈月站乘搭黑部峽谷鐵道小火車直達黑部峽谷。
景點資訊
- 名稱：黑部峽谷 (黑部峽谷鐵道的宇奈月站)
- 地址：富山縣黑部市黑部峽谷口11
- 交通方式：JR富山站→[新幹線]→JR黑部宇奈月溫泉站...步行...新黑部站→[富山地方鐵道本線]→宇奈月溫泉站...步行...宇奈月站→[黑部峽谷鐵道]
Comments