大家嘅手袋裡面裝啲咩呢？今次「打開日本女生手袋」系列文章介紹嘅手袋主人，就用咗好多日本雜誌附送嘅禮品，而且仲有袋中袋？有咩原因呢？令人意想不到！呢個、嗰個、仲有嗰一個都係雜誌送？！等我地一齊嚟睇吓30代日本OL嘅手袋吧！
手袋同袋中袋都係贈品？！
呢位手袋主人喺手袋入面，一個一個咁拎咗各種細袋仔出嚟，究竟邊個係雜誌附送嘅呢？呢？
「本身個手袋就係雜誌送嘅…」，無諗過呢個咁靚嘅手袋竟然係雜誌贈品！
「呢個手袋係時尚雜誌Marisol同Russet聯名企劃嘅產品。而呢個袋仔就係InRed附送，因為想要個袋先買本雜誌。仲有姆明谷嘅人物，阿美好可愛吧！其實呢個化妝袋同另一個個迷你側孭袋係套裝，不過個則孭袋我就無用，送咗畀一個鍾意阿美嘅前輩。然後呢個係Marisol同Beams嘅聯名袋仔，都係用嚟裝啲細細件嘅嘢。日本嘅女性雜誌，有好多又吸引又豪華嘅贈品，誘惑太多，真係令人困擾呢！哈哈！」
「仲有，呢個袋仔入面係放咗電車定期券同散紙，然後呢個白色嘅銀包係媽媽同嫲嫲送畀我嘅生日禮物。」
無論邊個袋仔都保持住狀態良好，睇得出用得好小心呢。
１個人用４個銀包？
仲有令人吃驚嘅係，手袋主人拎出好幾個銀包。首先係FURLA嘅長型銀包，因為呢個長型銀包容易被刮花，所以放入手袋時仲用防塵袋裝住。跟住係放家用支出嘅銀包，另外仲有散紙包，仲有卡片包用嚟裝印花卡、儲分卡。的確散紙同儲分卡好多，唔想放係主要用嘅銀包入面，分開放比較好。但點解連家用支出都要分開另一個銀包呢？
佢咁樣答：「每個月嘅生活費同零用錢金額都係設定好，所以依支出分類嚟分銀包，唔好混埋一齊，唔使驚唔小心洗多咗。生活費係用白色嘅銀包，呢個係我嫲嫲喺我成年生日嘅時候，唔知送咩禮物就畀咗封利是我，我就用咗利是錢去買呢個銀包，所以都算係嫲嫲送畀我嘅生日禮物。用咗咁多年都好舊，但對我嚟講係好有感情同紀念價值，所以唔捨得丟。至於散紙包，其實我以前無用散紙包嘅習慣，不過幾年前媽媽送咗個散紙包畀我之後就開始用。咁本來個銀包就唔使咁漲，將散紙分開放之後輕鬆好多。」
清潔感倍增嘅紙巾袋同口罩袋
手袋入面有幾個黑色嘅袋仔，分別有眼鏡盒，隨身紙巾嘅袋，仲有口罩同藥袋添！日本人好習慣用一次即棄式口罩，大部分都係會直接放入手袋或者膠袋入面，不過佢就有個罩專用嘅收藏袋。同一個袋入面仲放咗膠布、感冒藥、頭痛藥等，差唔多好似個迷你緊急藥箱咁。
佢補充話：「其實呢個放口罩嘅袋都係朋友送，同朋友去有樂町的Lumine百貨時見到，我隨口講咗句『竟然有啲咁嘅袋仔！』，朋友就記住咗，之後生日時就送咗畀我。眼鏡平時唔太用，但係因為有散光，所以喺公司開會時，睇螢幕上嘅資料或去睇電影、演唱會時就用戴眼鏡。」
睇完今次嘅內容，大家覺得點樣呢？今次嘅受訪者嘅手袋雖然放咗好多嘢，但用咗唔同袋仔整理之後，就好一目瞭然！令人印象深刻。而且連入面嘅袋仔都好有品味，適合成熟嘅OL。歡迎大家喺右方留言給我地，話畀我地知您嘅感想吧！
Comments