大家嘅手袋入面都裝咗乜嘢呢？由出街必備品，到便利用品、小工具等等，好多人都會有自己獨特嘅必攜用品。今次我地就嚟睇吓，係東京出版社工作嘅雜誌編輯K小姐嘅手袋入面裝咗啲咩！由手袋嘅物品，可能可以窺看到少少日本編輯嘅生活方式啊～！
無帶呢樣就出唔到街！「3大必備品」
「交通IC卡、銀包、手提電話。呢三樣係一定要放喺手袋入面嘅必備品。」特別係交通IC卡(圖中左下，呢張交IC卡係PASMO)，除咗係定期車票之外，仲有電子錢包嘅功能，只要增值就可以係便利店、車站內嘅賣店，的士或者藥妝店用嚟付款，非常方便。而銀包就每年新年都會換新嘅。
搭車返工中途亦同時工作！「工作用品」
K小姐返工嘅搭車時間(通勤時間)，單程要成1小時40分鐘。「電車入面都係我嘅辦公室。搭車返工時會確認收到嘅原稿，而返屋企嘅搭車時間，就會溫習5年前開始自學嘅中文。」所以K小姐完全無試過喺車入面瞓著而落錯車嘅情況。完全唔浪費每分每刻，連通勤時間都自我增值！
日本上班女性，經常要保養！「健康＆美容用品」
K小姐：「手袋入面無帶就會好不安。」指嘅係咩？答案係即棄式口罩（圖中右上）。春天防花粉，冬天防感冒，仲可以掩飾瞓過頭無化妝嘅樣。喺日本，大家經常會使用即棄式口罩。另外，夏天嘅話，仲會常備抹汗用嘅濕紙巾（圖中左面），同埋喺乾燥冬天要用嘅，潤唇膏同潤手霜！
日本人總會有備無患？！「緊急用品」
圖中嘅物品令人會覺得「真係有呢個必要嗎？」由右邊開始係購物環保袋、頭痛藥、即棄式一日用隱型眼鏡。環保袋據說通常係用嚟放取材時用嘅相機，同埋收到嘅文件資料。另外為咗應對「萬一忽然頭痛」、「萬一跌咗隱型眼鏡」嘅突發狀況，所以頭痛藥同即棄式一日用隱型眼鏡亦到常備喺手袋入面。
喺東京工作嘅雜誌編輯，手袋入面非常充實！
你鍾意我地呢篇介紹嗎？為咗有效利用交通時間，隨身帶住書籍、健康美容產品嘅東京編輯，無論係工作定私生活都非常充實！
你仲想睇邊種日本女生嘅口袋呢？歡迎留言話我睇知～
Comments