對好多人嚟講，「成年」係一件非常重要嘅大事，因為「成年」令我哋有權利做各種未成年時無法體驗嘅事情。同時，「成年」亦代表我哋要對自己未來所做嘅事負更大責任。對日本年輕人而言，成年係人生中一項非常特別嘅大事。日本會趁年輕人踏入20歲成年時盛大慶祝一番，各個城市、鄉鎮都會為當地「新成人」舉辦慶祝典禮。此外，日本1月嘅第2個禮拜一亦被定為「成人之日」。下面一於同大家介紹有關日本成年嘅大小事，就等我哋嚟睇吓日本到底係點樣慶祝「成年」，以及成為成年人所代表嘅意思啦！
有關成年之二三事
日本法定成年年齡為20歲，對日本年輕人而言，成年有著非常重要嘅意義。日本人要滿20歲先可以飲酒、食煙，而喺日本社會中，飲酒具有「成為成年人社會一份子」嘅特殊涵義。日本飲酒風氣盛行，好多人認為飲酒係一種促進與其他人交流嘅社交手段。近年，如此文化雖然已逐漸改變，不單只社交聚會減少，年輕人飲酒份量亦大不如前，但普遍日本人依然都會認為成年係一件人生大事。喺2015年前，日本人要等到20歲先擁有投票權，而現時則已經下調至18歲。除此之外，成年亦包括更多其他意義，例如係唔需要經過父母允許就能簽署合約、能夠參與賭馬等賽事，「成年」代表年輕人已成為獨立大人！
2025年的成人之日是哪一天？
2025年1月13日（星期一）是日本的成人之日。這一天是日本的公眾假期，日本的大多數公司都會放假。
成人式
日本會喺每年嘅「成人之日」舉辦成人慶祝儀式，各地政府都會邀請「新成人」參加活動。大部分年輕人會選擇出席家鄉舉辦嘅「成年式」，藉此機會同中小學朋友聊天敘舊。好多人亦會順便舉辦同學會，並喺成人式結束後去小酌一番。
「成人式」通常會喺地區禮堂舉行，不過因各個地區而異，舉辦地點亦會有所不同。部分地方嘅成人式會喺較為特別嘅場所舉行，例如千葉縣浦安市成人式會場，就係東京迪士尼度假區！市長及「新成年人」代表會喺典禮上發表演說，有時更會以跳舞及音樂表演助興。此外，多數地區亦會向「新成人」送上紀念成年嘅小禮物。
女生會穿著特別和服出席典禮
「成人之日」最特別嘅地方，就係女生會喺當日穿著名為「振袖」嘅特別和服參加典禮。對未婚女性而言，振袖可以話係最高級嘅禮服，華麗長袖叫人令人留下深刻印象。
為咗參加成人式，大家都會選擇租借或買一套振袖。基本款振袖通常要索價10萬至15萬日圓，有特別設計嘅款式就更加昂貴。即使係選擇租借，通常價錢都唔會同直接買一套嘅錢差太多，更高級嘅振袖甚至可能要價100多萬日圓呢！此外，部分女生亦會著上祖母或媽媽流傳落嚟嘅振袖或和服。
典禮當天，參加「成人式」嘅女生通常會先前往美容院，交由專家穿上和服並化妝。大多男生會穿著西裝，不過有部分人亦著上男性和服「袴」出席。如果到日本旅行時正好遇上「成人之日」，或者您都會有機會喺各地見到女生們穿著充滿傳統特色嘅振袖呢！
Comments