難得去到日本旅行，當然唔可以放過「食好西」嘅機會啦！除咗壽司、天婦羅、拉麵等必食日本美食之外，「鰻魚」亦係日本非常著名嘅料理，日本人更深信喺「土用丑之日(一年中最熱嘅時節」食用鰻魚的話，就可以成年都咁精力充沛𠻹！日本部分地區亦則因為可以捕獲天然鰻魚、或因當地特殊鰻魚烹調式而深受老饕喜愛，不過您又知唔知除咗鰻魚飯之外，其實鰻魚可以仲有好多種唔同食法呢？而家就立即將本文bookmark低，下次有機會去進鰻魚專門店的話，就可以馬上區別每種食法有咩唔同喇！
鰻重&鰻魚丼
鰻重與鰻魚丼係最常見嘅鰻魚料理，由烤過嘅鰻魚淋上甜甜蒲燒醬而成。「鰻重」以高級方形漆器盛載，「重」盒內會先鋪上白飯，然後再放上烤好嘅鰻魚並淋上醬汁；「鰻魚丼」則以碗盛載，係一款將鰻魚當作主菜嘅蓋飯料理。兩者喺價格方面亦有分別，普遍嚟講丼飯嘅價錢會比較大眾化；而「鰻重」嘅食材以及價錢就較為高級。不過就算食唔起「鰻重」，退而求其次轉食「鰻魚丼」都係個唔錯嘅選擇嚟㗎！
名古屋食法 ：一碗鰻魚飯變出三種食法！Hitsumabushi（ひつまぶし）
名古屋流行一種名為「鰻魚三吃」（ひつまぶし / Hitsumabushi）嘅食法，顧名思義即係一次過享用三種唔同鰻魚飯風味。首先將碗內嘅鰻魚飯切成十字形4等份，並用飯羹潷起碗內食材。
「第一食」先品嚐原味；
「第二食」再喺鰻魚飯撒上香蔥、芥末、紫菜又或少少山椒粉，稍微攪拌後品嚐；
「第三食」則係將高湯倒入碗內，伴以「第二食」嘅配料一同進食；
而最後一份鰻魚飯，就是希望大家喺品嚐過「三食」後揀選自己最鍾意嘅一種食法再品嚐一次。
鰻魚串燒
如果您並唔鍾意特別食飯，咁就可以考慮選擇串燒！鰻魚串燒可謂相對較少見，而且每個部位口感都各有唔同。有緣遇上的話，記住唔好錯過喇～
鰻魚手握壽司
喺日本，只要您隨便走入一間壽司舖，都相信您一定會搵到「鰻魚手握壽司」。重點係，壽司每碟平均價錢只需約100～200日圓，相較其他鰻魚料理嘅定價親民得多，而且一樣咁好食！
同場加映：酥脆零食「鰻魚批(うなぎパイ)」
「鰻魚批」係靜岡縣濱松町嘅特產，知名度高得可謂日本全國無人不知。佢嘅外觀就如一般千層酥批，由於外型類似鰻魚因而得名。千層批用上由鰻魚骨熬成嘅湯汁、製成粉末後混入麵團烘焗，最後更於表層塗上蒲燒鰻魚醬汁，難怪喺日本各大手信排行榜中人氣一直高企，有機會記住要試試喇！
Comments