有別於其他國家，日本2月14日情人節一般係由女生送禮（朱古力）畀男生。或者呢種同西方文化唔同嘅情人節，會令人覺得對女生好唔公平，只！不！過！其實日本都有一套獨特嘅解決方法—就喺喺情人節後一個月嘅「白色情人節」，由男生向女生送上回禮！
起源
據說喺情人節一個月後回禮呢個概念，最早係來自一家賣棉花糖嘅公司，所以「白色情人節」最初係被稱為「棉花糖日」！呢個主意好明顯係一種促銷手法，不過後來亦無人介意，反正大家有糖食都開心嘛。後來，其他蛋糕餅家都一齊跟上步伐，令「回禮」文化逐一步擴大，更令呢一日被命名為「白色情人節」。而「白色」原意，就係指糖粉，以及各種糖果嘅主要原料。
現代白色情人節有乜規則？
規則好簡單，就係喺情人節幸運地從女生收到朱古力嘅男生，要回送三倍價值嘅禮物畀女生。日文嚟講就係「三倍奉還（Sanbaigaeshi）！」
不過實際上由於價錢唔係咁容易判斷，所以男生們亦可以買自己想送嘅回禮。一般嚟講，回禮畀朋友或同事嘅話，大概都係細細件嘅禮物仔就OK，例如鎖匙扣、杯，或者係「朋友朱古力（tomochoko／友チョコ）」。
不過呢，如果男生夠好運收到親手製嘅朱古力「本命朱古力（honmei choko／本命チョコ）」， 咁就可能要花費多啲係回禮上（可能係珠寶、服飾、貼身內衣等），而且通常呢啲都係送畀有Feel嘅對象。男生們應該都知道，喺呢種交換禮物嘅過程中，男女邊一方應該要付出更多吧？
回禮習俗
依據日本傳統習俗，如果收到其他人送嘅禮物，就必須回禮，無論係婚禮、過年、甚至喪禮都一樣。以婚禮嚟講，禮金大約係30,000日圓，通常係進入婚禮場地時畀，然後就會收到一部分嘅回禮（okaeshi）。另外一個例子就手信（omiyage），喺公司如果有人請假，喺放完假返工時都會帶份手信返工分畀同事。唔遵守呢啲約定俗成嘅規矩，就會被認為係無禮貌，所以喺日本係非常容易感受到「回禮」習慣！
上面介紹嘅白色情人節習俗，其實係一個又有效又唔太直接嘅表白方式。以傳統保守嘅日本社會嚟講，呢個習俗畀年輕人有機會突破彼此關係，所以試一吓白色情人節去回禮都幾好㗎～雖然對於部分人嚟講，回禮可能係一件唔想做，但又唔可以唔做嘅事，但同時亦好多人都會主動出擊。直到而家，唔只日本流行白色情人節習俗，台灣、中國以及韓國亦都多咗人慶祝白色情人節，韓國甚至更創造咗一個4月14日「黑色情人節」畀單身人士𠻹！
Comments