佐賀縣簡介
佐賀座落於風光怡人嘅九州島內，縣廳位處佐賀市。佐賀縣最為人知嘅特產為以有田町為中心盛產嘅瓷器「有田燒」。
雖然佐賀縣面積比九州其他行政區塊都要細，但遊客依然可以喺呢片美麗土地上發掘各種旅遊方式。文化方面，佐賀縣自古以來就同亞洲各國建立深交，任何考古迷絕不容錯過城鎮上雄偉浪漫嘅歷史遺跡；休閒方面，縣內遍佈眾多溫泉SPA設施，若您想放鬆享受，咁就十分推薦您探訪當地優質嘅溫泉；宗教方面，佐賀縣內留存著眾多古老神社與寺廟，您可以在此體會有別於九州其他縣市嘅獨特色彩。佐賀生活步調緩慢輕鬆，當您對都市塵囂感到疲憊嘅時候，就不妨嚟感受一下慢活優游嘅田野生活啦！
如何前往佐賀：
乘搭飛機：
佐賀縣僅有一個小小嘅機場，以往來東京羽田機場或大阪伊丹機場嘅國內線航班為主，亦有少數國際線班機飛往中國上海。從佐賀機場到市中心，您可以選擇乘搭車程約30分鐘嘅路線巴士，車資約600日圓；另有路線巴士直通福岡機場，花費1,000日圓及70分鐘左右即可抵達。
乘搭火車：
佐賀市座落於JR長崎本線之上，遊客可以乘搭鷗號列車或綠號列車來往佐賀與博多，車資為2,300 日圓、車程約40分鐘；從長崎市往佐賀市之列車需時75至90分鐘，車資為3,740日圓左右；往佐世保之列車則需時65分鐘、車資2,470日圓。
熱門旅遊景點：
吉野里歷史公園（Yoshinogari Park）
吉野里歷史公園最為人熟悉嘅就係區內富含歷史氣息嘅環壕部落遺跡。據考古學家推斷，遺跡為西元前三世紀至西元400年期間、彌生時代留下之產物。遺跡規模十分龐大，內裡唔單只曾發掘出眾多作為儲藏室之用嘅窖屋（彌生時代特有嘅半穴居式建築），仲出土近兩千多座甕棺（大型陶甕，當時用來作為棺材）。根據遺址面積及其出土嘅器具數量，吉野里遺址可謂現今日本國內最大嘅彌生遺址，各位考古迷們絕對不容錯過如此考究日本歷史嘅大好機會！
佑德稻荷神社（Yutoku Inari Shrine）
佑德稻荷神社位於佐賀縣南部嘅鹿島市，為日本國內三大稻荷神社之一。神社所供奉嘅稻荷大神為掌管農作豐收、商業繁盛等範疇嘅神祗，而傳說中狐狸就係稻荷大神嘅使者。佑德稻荷神社於西元1687年建成於佐賀鬱鬱蔥蔥嘅山谷中，聳立於距離地面18米高嘅朱紅色木造高台上嘅主廳底座全為木頭打造，以當時技術嚟講可以話係十分驚人嘅設計，足以媲美京都清水舞台。遊客可以喺呢度一邊欣賞美麗風光，再一邊沿著神社鳥居搭設嘅木棧道，走往本廳入口參拜。
有田町與伊萬里市：
佐賀縣最為著名嘅就係美麗絕倫嘅瓷器製造業。若您都想一窺縣內出產嘅巧奪天工瓷器作品，咁您一定要造訪有田町（Arita）與伊萬里市（Imari）。據說古時豊臣秀吉出兵朝鮮時，曾將瓷工帶返日本並將燒瓷技術傳至佐賀，自此就奠定咗該縣其後400年瓷器工業嘅基礎，令佐賀成為全日本率先發展瓷器工業之城鎮。現時佐賀縣內建有多家陶瓷器歷史文化館，您可以藉由造訪參觀文化館而加深對瓷器文化嘅認識，再順便多買幾個自己鍾意嘅瓷器作品返屋企作為紀念！
購物商場與免稅店：
鳥栖暢貨中心（Tosu Premium Outlets）
鳥栖暢貨中心位於佐賀縣東部嘅鳥栖市，館內聚集咗150家流行品牌，從服飾、手錶、居家用品到圖書文具等都應有盡有，商品範圍相當廣泛。中心內亦有多間免稅店，十分受到國外旅客嘅喜愛。
武雄溫泉博物館（Takeo Onsen Museum）
武雄溫泉博物館為佐賀縣內與西九州地區嘅著名手信購物商場。館內出售著布甸、蛋糕、蕨餅等大量全九州內超人氣零食點心，您甚至更加可以喺到買到瓷器作為手信𠻹。
嬉野茶村（Ureshino Tea Village）
好多人都唔知道其實佐賀縣嘅茶亦係非常出名。嚟到嬉野茶村，您可以參觀當地茶園栽種嘅茶品。除此之外，村內亦提供多種茶包、散茶等茶製品，十分適合買作手信之用。
慳錢小錦囊：
若您想深度探索最完整嘅佐賀市，租借單車暢遊縣內就必定係首選。佐賀站四周有多個熱門旅遊景點，您可以沿著JR佐賀線踩單車，嚟一趟風景之旅。呢種旅行方式唔單只可以為您節省交通費，仲可以讓您沿途欣賞佐賀城市街景，以最方便嘅方式探訪佐賀市各個景點！
建議旅遊時期：
最推薦每年四至五月，或十月至十一月光臨佐賀縣。因上述兩個時期嘅氣候狀況相對涼爽穩定、降雨機率也較細，因此較為適合旅遊。秋天時分佐賀紅葉風情洋溢；而春季則正逢櫻花期，十分適合前往賞櫻。惟六至八月佐賀適逢梅雨季節，空氣往往潮濕又悶熱，若您唔鍾意炎熱天氣，咁就可能唔太適合夏季時期造訪喇。
Comments