奧入瀨溪流：日本青森最美溪流之一

您或者唔會信，咁靚嘅美景係渾然天成。呢個美景就係奧入瀨溪流，等您親眼見證。好多人去日本旅遊，都會揀季節變化明顯嘅秋季，但其實奧入瀨溪流呢度，一年四季都有唔同嘅自然之美。

關於奧入瀨溪流

奧入瀨溪流位於日本北部青森縣。全長14.2公里，係唯一一條由十和田湖流出嘅河流。

奧入瀨溪流嘅四季景色各有魅力。其中，秋天紅葉最出名，所以10月初至11月初嘅秋季係最佳旅遊時節。溪流、瀑布同石頭都披住紅色、黃色嘅秋葉，形成色彩繽紛的美景。

由於溪流嘅河寬變化，溪水時而湍急、時而平緩。途中亦有好多瀑布。變化多端嘅景色，正係最吸引人嘅地方。

如果要走完整段溪流，需花5至6個小時。由石戶到子之口嘅路線比較短，全長9公里，約需2.5小時。您可以自己探索自然，亦可以參加導賞團。另外亦可以乘搭巴士，前往奧入瀨溪流沿岸嘅景點。

「星野RESORT 奧入瀨溪流酒店」位於奧入瀨溪流附近。雖然房價比較貴，但為住宿旅客提供獨一無二嘅住宿體驗。每人一晚嘅房價約為23,000円（包晚餐&早餐）。

酒店嘅美食非常多。附設嘅餐廳叫「青森蘋果廚房」。喺青森，蘋果係代表性標誌，而餐廳嘅蘋果汁同蘋果批都非常可口美味。住宿費用已包咗早餐同晚餐自助餐。

另外，酒店亦有提供多種類嘅活動俾住客參加。您可以乘搭巴士遊覽奧入瀨溪流，或者體驗各種活動，包括釣魚、探索大自然、瑜珈等等，甚至仲有講座，講解青森蘋果同溪流歷史。

如果由東京出發，先乘搭新幹線到八戶或新青森，然後再轉搭巴士至燒山。亦可利用酒店提供嘅免費接駁服務。可能需要大約5個小時先到達呢條小溪，但佢位處偏僻，亦意味住您可以縱情享受佢嘅平靜，令你心曠神怡。