西元1596年豐臣秀吉於大阪興建大阪城，使得大阪早於江戶時代以前及初期以嚟，就已經係日本一個非常重要嘅商埠城市。城市除咗供應大米、清酒、陶瓷以及裝飾等商品之外，亦擔當著將上述種種物品從京都海運至江戶（東京）嘅重要角色。
大阪同東京一樣可以被細分成唔同區域，每一個區都有自己與眾不同之處。例如中之島位於淀川河上，係大阪文化及行政中心；位處大國町嘅電子產品購物區「電電城」相當於東京秋葉原；而梅田、心齋橋同難波則係購物與夜生活勝地。
大阪大致上可分為南北兩區。北區係主要商業區，範圍為JR大阪與梅田站附近；南區則係購物與休閒娛樂區，以難波及心齋橋為中心地帶；另有庶民色彩豐富嘅道頓堀位於兩者中間。
前往大阪：
要前往大阪其實十分方便。大阪有兩個機場－關西國際機場（Kansai International Airport）及以國內線為主嘅伊丹機場（Itami Airport），所以如果您係從海外過嚟，您將會抵達關西國際機場。離開機場後轉乘關西機場特快 「HARUKA」列車 （50分鐘；2,360日圓，需轉1次車） 或南海機場急行列車 （60分鐘；1,100日圓，需轉1次車）即可到達大阪站。
除咗以上急行列車，您亦可以選擇乘坐JR 關西機場快速列車（70分鐘；1,200日圓，無需轉車）。
旅遊景點：
道頓堀（Dotonbori）
道頓堀係沿著道頓堀運河南岸嘅一個大型繁華鬧區。大阪有美食家天堂之稱，而整個道頓堀區就擠滿咗數以千計嘅餐廳以及娛樂設施，非常受本地人歡迎。四周亦佈滿專門上演人形浄瑠璃嘅文樂劇場、表演傳統藝術嘅落語劇場，以及戲院等多個大眾娛樂設施。
大阪城（Osaka Castle）
十六世紀末期，著名武將豐臣秀吉成功統一日本並興建大阪城。其後城堡於十七世紀屢次戰役中被燒毀，惟經歷重建後再次被毁、天守閣燒成灰燼。最終大阪城於二十世紀初再次被重建，現時第一至第七層陳列並展出各種武器、盔甲以及當時使用過嘅民俗物品；第八層則改建成展望台之用。
梅田藍天大廈（空中庭園展望台）Umeda Sky Building
位於藍天大廈最頂層嘅空中庭園展望台係大阪最受歡迎嘅地標之一。梅田藍天大廈係一幢以世上十分罕見與特殊嘅建築形式建造而成嘅半空相連雙子摩天大樓，大樓有一個360度開放式設計嘅屋頂供遊客欣賞城市全景。此地亦係一個非常浪漫與風景優美嘅睇日落熱門景點。上圖就係攝自頂層展望台。
建議參觀季節︰
春天
大阪氣候溫和，如果想睇到大阪公園被一片美麗櫻花海覆蓋的話，最好就係三月至四月中旬到訪，因為剛好呢段時間係櫻花季，各地充滿節日氣氛。惟緊接其後嘅就係四月底至五月初嘅黄金週，建議出發前務必事先預訂酒店，否則好快就會被訂滿。
Comments