岩手縣位於日本太平洋沿岸美麗宜人嘅東北地區。岩手縣首府盛岡市以可口麵條而聞名，係該縣必去地方之一。
岩手縣有幾處自然秀麗嘅旅遊景點，當中包括沉浸於古老日本民間傳說中嘅古樸小鎮遠野市（Tono），其他不容錯過嘅地方亦包括風景勝地北上市（Kitakami），尤其係喺櫻花綻開嘅季節，場面更加係非筆墨所能形容。如果您喺冬季到訪，您則可以考慮到著名嘅安比高原渡假區玩樂，進行滑降或越野滑雪活動。
由於岩手區域較少遊客到訪，因此如果您想體驗日本人農村生活，岩手將會係一個唔錯嘅選擇。岩手之旅亦將意味著您能夠目睹日本農業發展嘅一面，遠離繁囂大城市、享受大自然生活。
前往岩手縣：
乘搭飛機：
花卷機場（The Hanamaki Iwate Airport）位於岩手縣花卷市，主要服務國內航線，間中亦有國際航班來往其他亞洲城市。其中一個前往岩手嘅方法，就係先飛到東京羽田機場或成田機場，然後再轉乘火車。若持有JR鐵路通票或JR東日本鐵路通票，您就可於岩手縣內乘坐任何JR列車。
乘搭火車：
東北新幹線被廣泛認為係去岩手最容易以及最快嘅方法，乘坐小町號（Komachi）列車約兩個半小時左右即可到達，費用為13,840日圓。您亦可乘坐來往東京與新青森嘅隼號（Hayabusa）列車，來往東京與盛岡嘅車資為14,340日圓。
乘搭巴士：
您可以從東京乘坐夢幻盛岡號（Rakuchin）夜行巴士到盛岡市。車程約7個半小時，車費由7,850日圓起。
旅遊景點：
北上市（Kitakami）
位於北上市立公園嘅「展勝地」（Tenshochi Park）係坐擁沿著北上川河畔盛放嘅一萬棵櫻花樹嘅北上市景點之一。公園裡有一條綿延兩公里嘅小路，櫻花季時兩旁將開滿成排美不勝收嘅櫻花樹。您亦可以選擇乘坐觀光船從水上欣賞櫻花，將全景一覽無遺。
遠野市（Tono）
魅力十足嘅遠野位於岩手縣中心地帶，係一塊風景秀麗嘅小山區，並擁有悠久農業歷史。遠野亦以眾多當地傳說以及關於超自然動物、鬼魂或靈魂等嘅故事著名，因此遠野有著講故事之深遠文化，遊客可以有機會喺市內各處睇到相關表演。您更會發現該區擁有多條純樸民俗村落，以及於當地博物館進行嘅講故事表演。
安比高原滑雪渡假區（Appi Kogen Ski Resort）
安比高原滑雪場距離首府盛岡市約50公里，係東北地區其中一個最著名嘅滑雪勝地。滑雪場內有數條雪道適合初學者至高手使用，當中包括長、短雪道以及未加修飾嘅雪地，令滑雪者可以有更多元化體驗。雪道沿著前森山（Mount Maemori）以及西森山（Mount Nishimori）中間延伸，遊客於山上可眺望到四面八方嘅美景。
盛岡市（Morioka）
岩手縣首府盛岡市座落於風景優美嘅山區之中。盛岡市內有數條河流、三面環山，除咗以優雅景緻聞名之外，市內烹飪傳統亦值得一提。盛岡最著名嘅「盛岡三大麵」分別為碗仔蕎麥麵（Wankosoba）、炸醬麵（Jajamen）以及冷麵（Reiman），市內各餐廳都會供應以上三款麵類，可見岩手縣係日本一大重點農業區。
購物和免稅地點：
盛岡 Aeon Mall：
盛岡Aeon Mall以日式美食為主打，場內有一系列高級店舖以及百貨公司。Aeon Mall裡亦有一間大型超市，再連同各式餐廳與cafe，遊客如想喺同一個地方享受以上種種，Aeon Mall絕對會係你最佳之選。
盛岡 Fesan：
盛岡FesanMall提供各類型產品，而位置就正正為係R盛岡站旁，交通十分方便。商場雖然唔算市內最大，但就有多間品牌進駐提供多元產品，同場更設有地下美食廣場。
北上 Twin Mall Plaza：
位於北上市嘅Twin Mall Plaza分為南北翼兩座，Twin「雙子」之名因而得來。Twin Mall Plaza 提供一系列廣泛價格範圍嘅品牌種類，適合唔同使費預算嘅遊客。 另外，Plaza亦係一個同時銷售本地與海外產品嘅集中地。
交通優惠套票：
如選擇乘坐火車前往盛岡，購買JR鐵路或JR東日本鐵路通票會係一大明智做法，因為pass已包含基本列車票價，乘坐隼號（Hayabusa）或小町號（Komachi ）列車時無需再另外付費，有助您大大節省交通費用。
建議造訪季節：
如果想趕上欣賞北上市櫻花，您可以喺四月下旬、開花後大約兩個禮拜嘅時間到訪。屆時兩旁櫻花樹將形成一條櫻花隧道，壯觀景象只有櫻花季節先有機會睇得到。至於若想去安比高原滑雪場滑雪的話，就要留意十二月尾到五月初嘅滑雪季節。想充分利用冬季時間嘅你，於上述期間到訪就最適合不過。
Comments