當世界遺產遇上MR混合實境影像，會擦出咩火花呢？2023年11月23日～11月26日為期四日，喺沖繩世界遺產「中城城跡」將舉辦一個期間限定嘅晚間公開紀念活動！巴士半日遊將以首里城作啟程站，然後走訪中城歷史之路「Hanta 道」，大嘆夕陽美景與夜景，最後抵達中城城跡，於特定區域體驗MR混合實境影像嘅奇幻世界，行程既精彩又緊湊！一於把握良機，齊齊嚟感受沖繩獨特嘅琉球歷史文化和絕美風景啦！
關於沖繩世界遺產「中城城跡」
據聞沖繩約有300多座城跡，而其中一座保留得相對較完好嘅城跡就係「中城城跡」。唔單止被列為日本國家指定史跡、日本100名城，更加係沖繩世界遺產嘅一部分。
中城城跡位於沿海嘅丘陵地，係一個天然要塞。其城牆由琉球石灰岩根據地形堆疊而成，組成連立式山城，由低至高層層遞進，營造出優美嘅弧度。呢個建築手法，更係當時最頂尖嘅建築技術。
歷經歲月洗禮嘅中城城跡，所殘存嘅城郭散發出一股既寧靜又神秘嘅色彩，置身此處，宛如踏入吉卜力動畫嘅奇幻世界一樣，非常夢幻。企喺城牆上，仲可以遠眺太平洋及周邊海域小島，將絕美景觀盡收眼簾。
關於歷史街道百選「中城Hanta道」
「中城Hanta道」（中城ハンタ道）係當時琉球王國時代，連繫各村莊與城鄉嘅主要幹道，由首里城出發，經過中城村中城城，一路通往連勝城方向，全長約6.2公里。
「Hanta」喺沖繩話入面代表「懸崖」嘅意思，由於呢條路會穿越好多山脊與懸崖，因而得名。「中城Hanta道」沿途遺留下多個文物古蹟和遺址，亦可以欣賞到豐富多變嘅地形、村落以及中城灣迷人嘅海景。現時，經已演變成一條非常適合行行山、散散步嘅歷史路線。
「中城Hanta道」嘅推薦景點之一：東太陽橋
正所謂一日之計在於晨！只要迎接晨光，就可以全日都擁有絕佳狀態。位於「中城Hanta道」上嘅「東太陽橋」，其實係一個不為人知嘅能量景點，唔單止可以欣賞到日出和美麗嘅海景，仲可以一睹絕美夕陽景色啊！
「世界遺產中城城跡嘅晚間特別公開紀念活動！夜遊中城Hanta道與深度體驗琉球文化」MR混合實境影像嘅半日巴士夜遊行程
今次，世界遺產「中城城跡」特別策劃咗一個為期四日嘅晚間特別公開紀念活動，透過巴士半日遊嘅方式，帶大家乘搭專屬包車，以參觀首里城為啟程站，走訪「中城Hanta歷史道路」景點，最後去到中城城跡，更可走入平時不設開放入內嘅夜間區域，體驗世界遺產與MR混合實境影像融合下，所打造出令人感到驚喜與感動滿載嘅景觀。
2023年11月23日～11月26日期間限定嘅「世界遺產中城城跡嘅晚間特別公開紀念活動！夜遊中城Hanta道與深度體驗琉球文化」半日巴士夜遊行程，活動相當別出心裁，歡迎個人及團體參加！特別推薦畀計劃喺呢段期間前往沖繩旅遊嘅朋友仔，齊齊嚟體驗一下沖繩琉球文化歷史，與大自然結合科技後，所帶嚟嘅魅力和感動啊！
活動行程與購票方式
- 日期：2023年11月23日(四)～11月26日(日)
- 參加費用：4,500日圓
- 巴士行駛時間：一日2個班次，報到集合時間為14:30、15:30
- 集合地點：沖繩單軌列車「首里站」站前巴士站
- 行程時間：約6小時
- 半日遊行程網站：https://nakagusuku-nightwalk.com/index-zh.html
活動行程（以每日第一班次為例）
- 14:30 首里站前巴士站集合
- 15:00 首里城參觀（30分鐘）
- 16:10 東太陽橋（中城Hanta道參觀）
- 17:00 中城城跡參觀（城內參觀）
- 18:00 中城城跡晚間體驗活動（MR體驗）
- 20:30 抵達沖繩單軌列車「縣廳前站」，解散
報名請點選下方圖示前往報名頁面：
注意事項
- ・費用包括：行程中作移動嘅觀光巴士車費、中城城跡入場費、MR晚間活動等體驗費用、晚餐便當（連飲品）、旅行保險。
- ・晚餐可於中城城跡內享用。
- ・費用不包括：前往集合地點和解散後回程嘅交通費、飲品以及個人禮品等費用。
- ・中城城跡地勢高低起伏，路面崎嶇，再加上夜間視線有限，請務必穿著合適嘅活動服裝和鞋款（如運動休閒款式等），並遵從工作人員指示前進，以避免受傷。
- ・一旦預約確認，將不予退款。
- ・請全程遵守世界遺產參訪規定，並聽從工作人員指示。
- https://www.nakagusuku-jo.jp/attention
Comments