大家有無聽過一種叫做「益力多」嘅飲品呢？所有喺日本出生長大嘅人都一定識嘅「益力多」，超越時代與國界，成為幫助大家打造健康愉快生活嘅重要一份子。今時今日，「益力多」嘅乳製品喺包括日本在內嘅全球40個國家同地區熱賣，每日銷售量大大話話有成約4千萬樽！了解益力多有幾勁之後，話唔定你都會想即刻飲返樽！
誕生約90年！落力將健康帶俾更多人
「益力多」約於90年前誕生，佢嘅出現，源自益力多始創人代田稔嘅心意。喺當時嘅日本，因為衛生條件差而有好多小朋友因傳染病而死亡。代田稔著眼於乳酸菌嘅力量，通過研究，成功強化培養出對人類健康有益嘅乳酸菌，而呢種益生菌後來更被命名為「活性乳酸菌代田株」。出於想將呢種力量盡可能帶俾更多人嘅強烈願望，「益力多」乳酸菌飲品終於喺1935年正式誕生！
活性乳酸菌代田株可以活著直達腸道嘅小秘密
一般嘅乳酸菌喺到達腸道之前，就已經俾具有強力殺菌性能嘅胃液同消化液膽汁所殺死。不過經過強化培養嘅活性乳酸菌代田株，可以抵受胃酸同膽汁，以生存狀態一直到達腸內。通過增加益菌同減少害菌嘅數量嚟改善腸道環境，係經過精心選拔出嚟嘅特別乳酸菌嚟㗎。
進入下面呢個網站，可以了解更多有關活性乳酸菌代田株嘅知識
「益力多」名字由來嘅小秘密
「益力多」（Yakult，「ヤクルト」）呢個名，其實係嚟自世界語中嘅單字「Jahurto」（ヤフルト），意思係乳酪咁解。世界語喺19世紀末被提倡成為世界共通語嘅語言，由於健康係全世界人共通嘅願望，而始創人亦希望為人類健康作出貢獻，於是就以世界語嚟命名產品。
進入下面呢個網站，可以了解更多有關「益力多」嘅歷史
容器嘅小秘密
「益力多」嘅樽仔擁有獨特嘅弧形形狀，令人只要睇一眼就即刻可以認得出佢係「益力多」。其實呢個設計，旨在令包括小朋友到老人家在內嘅每個人都可以輕鬆拎住樽身，又唔會一口氣飲哂，可以逐少逐少咁慢慢享用。另外，顧及到衛生層面，呢個大細亦讓人可以一次飲完一樽，而且即使每日飲都唔會覺得厭。
大家嘅健康好幫手！益力多小姐嘅小秘密
雖然而家「益力多」喺日本個個都識，但喺發售初期，大家對維持腸道健康嘅意識都仲係好低，而要喺呢種環境下宣傳產品嘅價值，都真係唔容易㗎。因此品牌認為，逐家逐戶上門拜訪、一邊介紹產品一邊販售嘅推銷手法，就係最有效可以傳達產品價值嘅方法。另外，佢哋相信如果上門推銷員係負責管理家人健康嘅家庭主婦嘅話，就會同主婦客層更加啱傾同更易獲得共鳴，於是就喺1963年成立咗「益力多小姐」組織。佢哋上門推銷時，唔止會關心客人嘅健康狀況，亦都會用心傾聽、同客人交流，以獲得良好嘅印象同信任。果然呢一招非常見效，喺仲係好少女性踏入社會工作嘅年代，益力多小姐就已經遍佈全國。
60年來 一直將活性乳酸菌代田株同笑容帶俾大家
到咗今年，益力多小姐已經誕生咗60年。直到2023年6月尾為止，喺日本約有33,000位益力多小姐為各個家庭同各間公司送上「益力多」。當然，如果大家去日本旅行時見到益力多小姐，都可以同佢買「益力多」㗎。就算喺超市買唔到嘅送上門專用產品，只要有現貨都一樣可以買得到。如果街上行過見到益力多小姐，就真係好彩喇！ （付款方式基本上只接受現金）
活躍於全世界嘅益力多小姐
益力多小姐活躍嘅舞台，唔單止喺日本國內。1964年，益力多首次喺台灣拓展海外業務。藉住呢個機會，益力多小姐亦一齊進軍海外。自此，佢哋主要喺亞洲同中南美洲等地推動女性踏出社會。到咗而家，全球更有超過八萬位益力多小姐落力工作！所以話，益力多小姐唔止創造咗就業機會，仲為鼓勵女性踏出社會上作出重大貢獻𠻹！
進入下面呢個網站，可以了解更多有關益力多小姐嘅資訊
遍佈全球嘅「益力多」
各位讀者可能都有喺自己地區嘅本地超市或者便利店見過「益力多」嘅產品。其實「益力多」自創業初期起就秉持為人類健康作出貢獻嘅使命，到咗而家已經深受全球40個國家同地區嘅客人愛戴。由於已經深深地融入當地人嘅生活當中，甚至有唔少人以為佢係自己國家嘅產品𠻹！值得一提嘅係，細細樽嘅設計係世界各地共通嘅特點嚟㗎。
堅持創造符合不同時代嘅「價值」
即使「益力多」而家喺全球有大約每日共4千萬樽嘅銷量，但係佢哋依然秉承住創辦人代田稔嘅初衷，作為健康護理公司致力於研發產品，協助大家保持健康。而經過不斷研究開發下所誕生嘅，就係「益力多1000」「Ｙ１０００」喇。
喺日本成為熱話嘅「益力多1000」同「Ｙ１０００」
針對壓力同睡眠問題而製造嘅「益力多1000」同「Ｙ１０００」，喺社交媒體上人氣熱爆。截至2023年6月，喺日本國內嘅累積銷量更已經超過15億樽，成為社會現象。佢哋嘅特點，係擁有益力多史上最高濃度、每1毫升有10億個活性乳酸菌代田株。有報告指出，喺短暫性精神受壓嘅情況下，佢哋有可以減輕壓力同埋改善睡眠質素嘅功效。
「益力多1000」同「Ｙ１０００」嘅容量分別為100毫升和110毫升，兩種產品都宣稱具有相同功效。
由於「益力多1000」係送上門專用嘅產品，基本上會由益力多小姐親自送到屋企或公司。而「Ｙ１０００」則可以喺超市、便利店或者自動販賣機等等買得到。目前兩種產品都只有喺日本國內發售，所以如果你嚟日本旅行時見到「益力多1000」同「Ｙ１０００」，不妨試飲一下啦。
益力多對健康嘅貢獻同對美味嘅追求，今後仍會堅持下去。
Comments