日本超人氣動畫「東京復仇者」係一部改編自熱銷超過7,000萬冊嘅大熱漫畫「東京卍復仇者」，並於2021年開始播放嘅電視動畫。2023年1月，續集「聖夜戰鬥篇」開始播放，以真人電影及舞台劇等多種媒體平台成功於日本社會引起連番話題。
由2023年10月開始，描繪東京卍會史上最大且「最後」抗爭嘅「天竺篇」將接力播出。而從11月27日開始，「東京卍復仇者繪製新體驗展：最終世界線」亦已鐵定舉行。作品風頭一時無兩，人氣不只局限於日本國內，連帶海外粉絲數量亦直線上升！
本篇文章中，FUN! JAPAN編輯部將會詳細解釋「東京復仇者」精彩重點，即睇其極具日本動漫風格嘅必睇之處啦！
電視動漫「東京復仇者」劇情及精彩之處解說
本動漫系列主角為一個生活正處於谷底嘅兼職員工—花垣武道。某一日，武道得知佢中學時期唯一女朋友—橘日向被惡勢力「東京卍會」殺害。第二日，正企喺月台上嘅武道忽然被人從後面推落路軌，當佢以為自己必死無疑之際，下一秒睜開雙眼時卻發現自己竟然返回到12年前嘅中學時期。回到過去人生巔峰嘅武道於是決定展開佢嘅人生復仇，拯救女朋友並改變佢一直逃避嘅性格！
作品最大吸引之處，係描寫角色之間嘅熱血劇情。喺原本日本動漫文化中大受歡迎嘅不良少年類型題材上，再加入回到過去嘅穿梭時空元素，成功創造出全新故事設定以及嶄新情感。
本作另一大受海外粉絲喜歡嘅原因，在於觀眾可以透過身穿特攻服（飛車黨制服）嘅角色窺探日本不良少年（日文稱為「Yankee」）文化。作品上映後，唔少動漫相關活動等場合都可以見到好多海外cosplayer扮演呢套系列嘅角色呢！
故事背景設定以東京澀谷為主要場景，作品內亦出現新宿、六本木等熟悉地名，令「東京復仇者」不單對於動漫迷嚟講係一部充滿心動瞬間嘅動漫，對喜愛日本嘅人而言亦非常有親切感。
「東京復仇者」故事舞台設於東京澀谷
故事主軸圍繞主角為咗拯救日向而試圖解開「東京卍會」謎團嘅成長故事。劇中，主角武道一邊追尋「東京卍會」成立背後嘅故事，亦一邊探索原本團結嘅幫派點解會變成最惡幫派。
東京及神奈川等著名地名穿插整個故事，其中一個象徵性地標東京澀谷，就係由中心領導人物佐野萬次郎（Mikey）所領導嘅「東京卍會」成立之地。
創始成員Mikey、龍宮寺堅（Draken）、場地圭介、三谷隆、林田春樹（Pa-chin）以及羽宮一虎一行6人齊集神社、手持護身符祈求團隊內每個人都願意為大家賭上生命嘅一幕，描繪出成員之間嘅深厚情誼，屬作品其中一個難忘場景。
另外，創始成員於澀谷十字路口上排隊拍照慶祝團隊組成，又或講述Draken出生及長大嘅熱鬧街景等，澀谷一地於劇中多種情節中都被設定為與「東京卍會」有著深厚聯繫嘅地方。
而新宿站，則係武道遇上事故後回到過去嘅起點。新宿同時亦係「愛美愛主（Moebius）」與及「芭流霸羅（Valhalla）」2個「東京卍會」對抗幫派嘅地盤。
除此之外，主要活躍於橫濱嘅「天竺」幫派，以及於不良界甚有名氣、來自六本木嘅兩兄弟・灰谷兄弟等，遊客絕不陌生嘅一個個地名都令觀眾睇到份外投入。
觀眾一邊欣賞本作，不難可以一邊聯想到多處日本實際場景，例如武道與日向約會嘅公園，就吸引唔少粉絲去到電視動畫中描繪嘅地點朝聖！角色們魅力無窮，難怪解會吸引人去到日本街頭聖地巡禮，親眼感受武道或Mikey等眾人眼中睇到嘅風景呢。
兒童餐、原宿pancake、Peyoung醬汁炒麵等各種日本美食都係作品重要元素！
作品每一集中登場嘅日本美食亦係一大亮點，而且每樣食物更係作極具象徵性、代表著劇中重要情節及角色關係。
眾多角色中，擁有強大力量嘅Mikey外型亮麗，不過同時亦擁有可愛一面，與其外表嘅反差成功儲落一班粉絲。例如佢當食銅鑼燒，又或當姐姐Emma餵佢食pancake等可愛場面都非常討人喜歡。
Mikey於連鎖家庭餐廳點選兒童餐一幕亦令人印象深刻。兒童餐於日本一般被稱為「Oko-sama lunch（お子様ランチ）」，係一種將漢堡、番茄醬飯與一口啫喱等小朋友鍾意食嘅食物放埋同一碟嘅菜式。當日本家庭去到餐廳時，小朋友普遍見到餐牌上有兒童餐時都會二話不說叫嚟食喔。
通常，番茄醬飯上都會放有一面小旗作為裝飾，但動畫中Mikey所點嘅兒童餐上並無插上小旗。見到眼前嘅Mikey扁嘴，Draken隨即就話「Mikey你睇，呢到有一面旗喔！」然後從胸前拿出一面旗，而Mikey雙眼亦即時發光！如此令人發笑嘅場景，暗地裡亦強烈地表達出Draken作為彌補Mikey不足嘅重要存在價值。
另一系列中嘅重要單品，要數到「Peyoung」。Peyoung係是一款於1970年代誕生嘅四方形杯狀炒麵，據聞Peyoung一名由「pair」與「young」組成，寄寓著「希望年輕情侶們能一齊分享同一份食物」嘅願望。
喺日本，Peyoung受到廣泛年齡層愛戴，好多人一聽到「杯麵」就會立即諗起Peyoung。而喺作品中，Peyoung則係「東京卍會」創始成員之一場地最愛嘅食物。場地首次遇到松野千冬後邀請對方去自己屋企，但當時屋企就只得一個Peyoung杯麵。兩人分享同食一個杯麵嘅日子，其後就成為嚮往場地嘅千冬嘅珍貴回憶。日後當佢回想起場地為咗Mikey同佢嘅朋友而戰嘅時候，Peyoung就成為一個充滿感動回憶嘅物品。
不良文化、穿越時空...必睇日本獨特動漫設定及文化！
描繪不良青年嘅「不良題材（Yankee）」，一直都係日本動漫中大受歡迎嘅作品題材，多年來產生「熱血高校」或「高校太保」等多部名作。日語中Yankees或不良青年，通常都會被描繪為熱愛出身地及朋友嘅人物，其精髓為透過日式王道青春故事，描繪一眾角色華麗打鬥、共同向最高地位進發，並於途中建立友誼嘅動人故事。
「東京復仇者」角色不僅具有獨特個性，而且服裝及髮型亦非常突出，其風格可以形容為「不良正式」，特別是電單車幫派制服（特攻服 / Tokkofuku）更係一大引人注目之處。制服上皆會刻有眾人隊名、鍾意嘅詞語或圖案等刺繡，作為幫派成員認可標誌，增加敘事戲劇元素。
本作最大特別之處，就係將「穿越時空」元素加入「不良少年」主題，實現你我都曾經至少一次幻想過嘅願望：「重過人生」。「穿越時空（Time-slip）」係日本獨有嘅和製英語詞彙，如果「時空旅行」係指使用機器穿越時間，咁「穿越時空」就屬於完全使用自己能力穿越時間。 武道某一日突然成功返到12年前嘅能力，就係屬於後者。
無論佢穿梭幾多次時空，每次都總係因為某種原因而陷入情況更壞嘅未來，令到觀眾不禁想同武道一齊收集過去散落嘅拼圖碎片。穿越時空設定描繪嘅劇情發展充滿張力，既不乏叫人追看往後情節嘅中毒性，同時亦能體驗各種日本文化及食物—唯獨「東京復仇者」先能夠呈現如此獨特世界觀！
電視動畫「東京復仇者」原創合作產品現已開售！
「東京復仇者」講述主角武道平日過著失敗生活，不過為咗拯救一生中唯一戀人日向以及一眾朋友而踏上復仇嘅故事。
武道屢敗屢戰英姿為觀眾帶來勇氣嘅故事情節，加上一眾獨特角色之間建立嘅友情、充滿神秘要素嘅謎團事件，以及華麗動作場景，成功令作品高潮迭起、話題不斷。而講述「東京復仇者」史上最大且最後抗爭嘅「天竺篇」已於10月開始播放。緊接其後，11月27日開始亦將舉辦「東京卍復仇者繪製新體驗展：最終世界線」。即使原作已結束連載，全球粉絲亦只有增無減！
與此同時，電視動畫「東京復仇者」原創聯乘產品已於FUN! JAPAN SELECTSHOP上架，產品名單包括包括變色玻璃杯、豆皿小碟及原創果汁飲品，所有產品都以主要角色設計而成。
凡係收睇本作品嘅觀眾，都保證一定會搵到你最鍾意嘅角色及互動情節。變色玻璃杯一共提供4款不同設計：「佐野萬次郎x龍宮寺堅」、「花垣武道x橘日向」、「場地克介x松野千冬」和「三谷隆x柴八戒」，歡迎你選購心目中嘅最佳組合帶返屋企！另外，原創果汁飲品則反映出每個角色嘅主題顏色，無疑每個商品都會成為粉絲摯愛！你都快啲選購心水商品，以視覺充分享受「東京復仇者」動畫啦～
Comments