東京手信多到令人眼花撩亂，唔知點揀至好？唔使擔心！今次小編為你嚴選出5款人氣又吸睛嘅東京手信，總有一款適合你！小編介紹商品內容之餘，仲會親身試食同大家分享食評，當中包括人氣花束脆餅、東京站限定商品等，好睇又好食，等你可以盡情打卡！而且喺東京車站就可以一次通通買齊，唔使左行右搵非常方便！下次去東京時就入手吧！
※刊登資訊和商品價格為2023年７月撰寫文章時嘅情報。相關內容或會有所變更，詳細請透過各店舖嘅官方網站確認。
東京站必買手信推介①：「AUDREY GLACIER士多啤梨花束餅」/AUDREY
「AUDREY GLACIER士多啤梨花束餅」從2014年起就一直受到大眾喜愛，外表就好似一束花一樣，非常吸睛！濃郁奶油和微酸士多啤梨完美融合，為大家帶來令人一咬難忘嘅絕妙口感。打開靚靚嘅包裝盒，裡面一個個獨立包裝嘅草莓花束造型餅就會出現喺你眼前，打卡一流！另外，呢款士多啤梨花束餅有奶油和巧克力兩種口味。
唔單止好睇又好食，而且仲係獨立包裝，買嚟做手信分派畀親朋好友開心Share超級方便，絕對係送禮嘅最佳之選！就咁食當然好味，亦都可以放入雪櫃雪一陣先食，口感就好似變成一款帶有冰涼感嘅甜品咁，都幾過癮㗎。有機會記住試試常溫食同凍食兩種食法啊！如果你想揀一款既時尚又好味嘅零食餅乾做手信嘅話，就一定要入手呢款士多啤梨花束餅啦！
「AUDREY GLACIER士多啤梨花束餅」食評：
外層餅乾捲成花束形狀，超級可愛！裡面有口感綿密嘅濃郁奶油和士多啤梨乾，咬落外層餅乾口感酥脆，搭配上內裡入口即融嘅奶油、酸酸甜甜嘅士多啤梨乾，多層次嘅口感令人非常驚艷！另外，小編發現雪凍之後食嘅話，外層餅乾食落會更加脆口，推薦大家可以試吓啊！
價格：
- GLACIER Milk（原味）8個裝 / GLACIER Chocolate（朱古力味）8個裝 1,296日圓
- GLACIER Milk（原味）12個裝 / GLACIER Chocolate（朱古力味）12裝 1,944日圓
購入地點：
- AUDREY GRANSTA東京店：JR東京站內B1F GRANSTA東京（銀之鈴區域）
東京站必買手信推介②：「CHEESE CHOCOLATE BURGER」＆「STRAWBERRY BURGER」/ CAPTAIN SWEETS BURGER
「CAPTAIN SWEETS BURGER」係一個講究於極具份量感嘅甜品漢堡包品牌。
經典商品中，最受歡迎嘅係「CHEESE CHOCOLATE BURGER」＆「STRAWBERRY BURGER」兩種口味。
外觀就好似快餐店入面嘅漢堡包一樣，就連包裝都採用漢堡包盒嘅形狀，真係超級可愛！再加上充分發揮食材美味嘅組合和多層次口感，獨特風味令人一食就上癮！望住迫真嘅漢堡包造型，鹹味雷達自動開啟嘅時候，咬落卻為你帶來煥然一新嘅甜甜好滋味，令你盡享視覺味覺雙重享受。
「Cheese Chocolate Burger」＆「Strawberry Burger」食評：
鬆脆嘅曲奇餅乾夾上厚實嘅朱古力，份量十足！「CHEESE CHOCOLATE BURGER」夾住嘅係車打芝士朱古力內餡，咬落芝士濃郁香氣於口中彌漫，帶來甜中帶鹹嘅獨特風味。「STRAWBERRY BURGER」外層嘅鬆脆曲奇帶有士多啤梨香氣，裡面夾住嘅係士多啤梨朱古力內餡，入口即可感受到士多啤梨嘅酸甜味與朱古力甜味嘅完美搭配，食落甜而不膩。下次有機會，不妨將呢款驚喜位不斷嘅漢堡包帶返香港啦。
價格：
- 3個裝（盒裝）每盒648日圓
購入地點：
- CAPTAIN SWEETS BURGER東京站 EKI LAB南通路店：JR東京站1F 在來線改札内（南通路區域）
東京站必買手信推介③：夾心餅乾「榛果與木苺」/ COCORIS
「COCORIS」以「品嚐沐浴於陽光下嘅堅果美味點心」為品牌理念。一盒裡面有「榛果」、「木莓」兩種口味嘅夾心餅。使用獨特嘅曲奇餅乾，夾上分別以濃郁榛果醬、風味豐富嘅木莓醬，再搭配西班牙產嘅牛奶朱古力製作成嘅夾心內餡而成。加上，只此東京站內「GRANSTA東京」一間店舖，建議盡早前往，以免去到被搶購一空。事實上，小編採訪當日亦排晒長龍啊。
包裝上唔單止畫有精緻可愛嘅少女插圖，更加係東京站限定嘅稀有商品，有機會去東京站揀手信嘅話，記得去睇睇啊！
夾心餅乾「榛果與木苺」食評：
外層餅乾口感酥脆，榛果夾心擁有濃郁香氣，而木莓夾心則帶有酸酸甜甜嘅水果香氣。
榛果醬和木莓醬，搭配上濃郁嘅朱古力，可謂絕佳組合！咬落即可感受到餅乾與內餡嘅完美平衡，令人食極都唔厭。兩種口味都令人難以忘懷，想一再品嚐！
價格：
- 6個裝 1,296日圓（含兩種口味）
- 10個裝 2,160日圓（含兩種口味）
- 16個裝 3,456日圓（含兩種口味）
購入地點：
- COCORIS GRANSTA東京店：JR東京站內1F GRANSTA東京（中央通路區域）
東京站必買手信推介④：「萩之調 煌 WHITE」/菓匠三全
「萩之調 煌」係著名仙台名菓「萩之月」嘅姊妹商品。使用純淨「白色雞蛋」，經過獨特製法製成「白色奶黃餡」，再包覆喺白色軟綿蛋糕入面，做成方便食用嘅尺寸。
「萩之調 煌」係東京限定商品，唔單止味道出眾，外盒設計仲好有質感，係送俾親朋嘅首選之一。另外，保存期大約為兩個星期，買嘅時候記得留意返啦。
「萩之調 煌 WHITE」食評：
外層軟綿綿嘅蛋糕，搭配上甜度適中嘅白色奶黃餡，甜而不膩，入口瞬間宛如淡雅雪花，於口中輕盈消散，一試難忘！另外，小編發現雪凍之後食嘅話，甜味會更顯溫和，加上冰涼嘅口感，令人欲罷不能，忍唔住食完一啖又一啖。
價格：
- 4個裝1,000日圓
購入地點：
- 菓匠三全 GRANSTA東京店：JR東京站內1F GRANSTA東京（中央通路區域）
東京站必買手信推介⑤：「東京鈴最中」/香爐庵
東京站限定嘅「東京鈴最中」，係以東京站嘅經典著名會面地點——「銀之鈴」為靈感創作嘅和菓子「最中」。
「最中」係指用糯米製成嘅外皮，然後將餡料填入外皮中嘅日本傳統和菓子。最中外皮較薄，放入口之後，可以感受到外皮與內餡融為一體嘅濕潤口感。市面上有各種唔同形狀嘅「最中」，如貝殼形或模仿燈籠嘅形狀等，相當有趣。
今次要介紹嘅「東京鈴最中」，造型係可愛嘅小鈴噹，裡面包住紅豆餡和圓形嘅「求肥」（麻糬嘅一種），唔單止外型吸睛，味道亦相當美味。而且可以從一袋（兩個裝）起購買，適合做手信之餘，亦好啱買嚟當小禮物啊！另外，保質期約兩星期左右，買嘅時候要留意返啦。
「東京鈴最中」食評：
柔軟嘅最中皮包住滑順紅豆餡、嚼勁十足嘅求肥。入口瞬間可以感受到滑順嘅紅豆餡散發出一股高雅味道，令人回味無窮。求肥嘅存在令口感更加豐富，讓享受更上一層樓。唔單止適合搭配日本茶享用，亦非常適合搭配咖啡、紅茶等飲品享用啊。
價格：
- 1袋（2個裝）各300日圓
購入地點：
- 香爐庵 GRANSTA東京店：JR東京站內B1F GRANSTA東京（銀之鈴區域）
※本文食評為小編個人觀點，並不代表FUN! JAPAN立場。
東京站入場券相關說明
小編今次介紹嘅手信，通通都可以喺東京站內買齊。東京站並非普通一個車站咁簡單，擁有多間魅力非凡嘅商店和餐廳、「GRANSTA東京」等車站內嘅商業設施。如果你無喺東京站搭電車嘅打算，只想入閘去站內商業設施行個圈嘅話，就買返張「入場券」啦。「入場券」係指唔搭電車，為咗進入車站內區域或月台而購買嘅票券。東京JR站嘅入場券價格為每兩小時150日圓。
相關文章
Comments