從新宿站乘坐JR中央線快速線不出5分鐘就能到達嘅中野，係一個以「次文化之鄉」著稱嘅著名地區，圍內遍佈著出售日本漫畫、動漫、遊戲、人物模型等各種商品嘅店鋪。
今次，編輯部將為您介紹中野百老匯內經營超過30家店舖嘅「Mandarake」。從經典到罕見商品，我哋將為您一一剖析日本漫畫動漫愛好者天堂內您可以搵到嘅各種相關商品，以及最適合您日本之行嘅完美紀念品！
中野百老匯內經營超過30家店舖！Mandarake內漫畫、動漫、人物模型、遊戲都應有盡有
Mandarake係一間創立於1980年（昭和55年）、專門經營二手商品嘅專門店，產品範疇包括漫畫、動漫等次文化。創立當時，佢只喺中野百老匯2樓一間面積約6平方米嘅小型二手書店，儘管規模細小，但呢間專門經營漫畫嘅專門店成功得到愛好者支持，並喺成立幾年內已經能夠擴大店舖數量。1994年於開設澀谷店後，再於1996年開設大阪店（現時為梅田店），唔單止經營漫畫等二手書銷售，仲包括動漫、遊戲、Cosplay等次文化。
現時，中野百老匯內有33間Mandarake商店，專門銷售少年漫畫、少女漫畫、專門書籍、動漫周邊、人物模型、古董玩具，遊戲，寶可夢卡片・貼紙，特攝相關CD・DVD・藍光光碟、古董精品及模型火車等。商店散佈在1樓至4樓，你可以一邊喺中野百老匯內漫步、一邊享搜索各類型產品。
接下來，編輯部將會逐層介紹大受外國遊客歡迎嘅舖頭！
中野百老匯內Mandarake及必睇分店全面介紹！
中野百老匯館內充滿各種大小商店、結構獨特，整體就好似一座小迷宮！要參觀超過30家Mandarake分店可謂一項艱鉅任務，因此我哋特別精選出部分特別受歡迎、又或推薦可作為漫步地標嘅分店！有時間的話，最好當然係每一層都慢慢行啦～
1F Mandarake 門：南邊入口一入就到！Mandarake之旅起點
當您從南口走入中野百老匯，從車站穿過中野Sun Mall購物街後，馬上就會見到1樓嘅「Mandarake門」喺你右手邊。店面採用特設櫥窗，展示出多款與名作動漫（包括吉卜力）相關嘅商品。
據店員所講，櫥窗內嘅產品會經常替換，與其話係一間專門店，呢到更似係一家公告每家分店活動嘅情報基地。Mandarake之旅第一站，就從呢到開始！
2樓 Mandarake 卡片館、Special 4、Galaxy
嚟到2樓，您或者會發現外國遊客特別多，全因呢到有出售高價人物模型、扭蛋玩具及夾公仔遊戲獎品嘅「Special 4」、出售Pokemon或龍珠等熱門動漫卡片、角色文具、貼紙嘅「卡片館」，以及Famicom、Super Famicom等遊戲機二手遊戲軟件或攻略指南嘅「Galaxy」！
首先，「Special 4」入口會有各種美少女人物模型迎接您光臨，當中更包括來自「美少女戰士」及「新世紀福音戰士」熱門女性角色呢！
店內貨架擺滿各種熱門作品嘅模型，如美少女動漫及「ONE PIECE」、「Fate」等人氣作品。入口附近，仲放有鑰匙扣或罐徽章等周邊精品，方便隨意購買，最適合買作日本旅行紀念品。
「卡片館」內擺滿各種人氣集換式卡牌，如寶可夢卡牌（Pokeca）及龍珠英雄！
此外，同場仲有80年代席卷日本社會嘅聖魔大戰朱古力食玩，以及人氣角色圖案底墊，保證無論大人細路都會睇到相當興奮。
隨著遊戲機近期掀起熱潮，經營遊戲軟件及相關產品嘅「Galaxy」亦正吸引越來越多粉絲關注。
分店按遊戲機劃分為各個貨架，從最新遊戲機如Nintendo Switch到復古遊戲軟件如Famicom至Super Famicom都應有盡有。
受到電影「超級瑪利歐兄弟電影版（The Super Mario Brothers Movie）」全球賣座以及遊戲「薩爾達傳說:王國之淚（The Legend of Zelda: Tears of the Kingdom）」獲列入健力士世界紀錄等影響，近期尋找流行遊戲系列初期作品嘅遊客亦據聞有所增加。
場內擺滿熱門遊戲角色公仔，更會播放經典遊戲片段，對打機愛好者嚟講實在係無法抗拒！
2樓亦有仲有專門出售特攝相關DVD・藍光碟嘅「UFO」、女性同人誌嘅「LIVE館」及Cosplay館等等，如果你對日本宅文化有興趣，記得要抽時間慢慢行喔。
順帶一提，中野百老匯1樓扶手電梯直達3樓，所以如果你想從1樓去2樓就需要行樓梯哦！
3F Mandarake本店、Special2、Special3、Special8
如果你從中野百老匯北門附近嘅扶手電梯直接上到3樓，你就會喺右邊見到一間叫做「La之一族」的商店。而舖頭所在走廊嘅對面，就排著一間又間書店、玩具店、手錶專賣店，以及Mandarake本店、本店2、Special2、Special3、Special8、Special9等等。
本店入口整面都係書櫃，還放滿咗巨型怪獸面具及各種漫畫相關物品，可謂一大打卡位！
本店主要經營二手漫畫書籍，並按作者及出版商分類展示。櫥窗內排列著一本本珍寶藝術書籍、作者親筆簽名書籍，以及發行量有限嘅次文化書籍。由價錢低於100yen嘅二手漫畫，到人氣作品完整套裝以及最新流行作品都包羅萬有，如果你想高CP值入手漫畫，記得首先嚟到本店睇睇喇！
Special 2則係一間專門銷售高達相關商品嘅專門店。店內有各種新舊高達模型任君選擇，所有高達迷都值得一睇！
採訪期間，小編發現最多外國遊客嘅係「Special 3」以及「Special 8」。
特別係Special 3店內擺滿多款動漫玩具或毛公仔，即係window shopping都睇到唔捨得走！戰隊系列等特攝作品玩具亦相當豐富，店內外有唔少客人都睇櫥窗睇到相當入神。
與2樓Special4以美少女動漫模型為主相反，Special8則係一間以少年漫畫等公仔模型嘅專門店。店內以不附帶原裝盒等平價商品為大多數，就算係對日本動漫唔太熟悉嘅遊客，都一定聽過店內出售嘅著名作品！
4F Mandarake Henya、海馬
最後嚟到4樓，首先要介紹嘅係外觀相當獨特嘅「Henya（変や）」。入口以多座巨大鳥居設計而成，左右兩邊則擠滿擺滿大小公仔模型嘅櫥窗。而經過入口一排排鳥居後，先發現原來鳥居兩邊都放滿模型櫥櫃呢！再行入少少，你會發現自己身處有如科幻電影般嘅空間，周遭被古董玩具、精品以及企業吉祥物周邊包圍，整體感覺就好似一間放滿私人寶藏嘅秘密基地般，叫人相當興奮！
云云商品當中，更有第二次世界大戰前嘅物品或錢罌等，絕對喺其他舖頭搵唔到，保證各位一定會驚訝中野竟然會有如此不可思議嘅空間。
另一邊廂，海馬則係專門經營寫真集與專門書籍嘅店舗。店舖賣場分為百老匯通左右兩邊，並以時裝、藝術寫真集等次文化書籍按分類上架。罕見寫真集或日本古書都有出售，如果你係對日本文化或文藝感興趣的話，記得唔好錯過喇！
- Mandarake
- 地址：東京都中野區中野5-52-15
- 交通：JR中野站北口徒步5分鐘
- 營業時間：12:00-20:00
- 定休日：年中無休
Comments