日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格， 日文稱之為「縣民性」。FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅就係三重縣。即刻去睇睇擁有紀伊半島東側伊勢志摩絕美風景與伊勢神宮等名勝嘅三重縣，有咩不為人知嘅一面啦！
源自於「蔭年參拜」⁉唔只赤福餅，仲有其他多款麻糬甜品的三重縣！
三重縣伊勢神宮擁有2000多年歷史，亦被當地人暱稱為「御伊勢-San」或「大神宮-San」。
日本最古老嘅歷史書《古事記》和《日本書紀》中，天照大御神被譽為最崇高嘅神明，並奉祀於伊勢神宮。自江戶時代（1600年～1868年）起，伊勢神宮曾多次掀起參拜熱潮，庶民間更流行起「一生中必去一次伊勢參拜」嘅口號。尤其係1830年「文政蔭年參拜」活動中，據說當時曾前往伊勢神宮參拜嘅人士，更高達全國六分之一嘅人口。
古時有別與現代，以前無電車又無汽車，前往伊勢嘅旅程可以話係相當漫長。因此，據聞當時前往伊勢嘅旅人都鍾意方便攜帶、可於路上輕鬆享用、飽足感十足嘅麻糬（日文叫做「餅」）。
正因為擁有呢個歷史背景，從桑名到伊勢嘅參宮街道沿路有多間販售旅途小食嘅麻糬菓子相繼誕生，更被稱為「餅街道」！
三重縣有多款麻糬任君選擇，當中除咗經典手信嘅赤福餅之外，仲有二軒茶屋餅、Henba餅（へんば餅）、太閤出世餅、御福餅等等，現時仍然可以品嚐到各店家所推出嘅多款麻糬菓子，令人食指大動。
中部？東海？近畿？三重縣集各地區之優勢，展現多元風貌
關於三重縣，即使係日本人亦經常會問一個問題：「究竟三重縣屬於邊個地區呢？」。
由於三重縣位於中部地區和東海地區，同時相鄰於愛知、岐阜等屬於中部地區嘅地區，以及京都、滋賀、和歌山、奈良等屬於近畿地區和關西地區等地，因此會出現喺天氣預報中，氣象廳等機構將三重縣劃分至東海地區。而高中棒球比賽方面，三重縣高中則代表東海地區出場比賽等情況。
另一方面，學校教育中「社會科」嘅教材有關三重縣嘅地區劃分，則多數會被劃分為近畿地區。根據以發行教科書和地圖冊而廣為人知嘅帝國書院指出，背後原因係早於1903年發行嘅國定教科書中，利用「7地方區分」※將三重縣劃分到近畿地區。再者，三重縣當地亦有使用關西方言等，實際生活和文化上有緊密聯繫，因此帝國書院制定嘅教材中，將三重縣視為近畿地區嘅其中一個縣份。
另外，當地警察廳等區域機構中，三重縣屬於中部管區警察廳嘅管轄範圍，而喺行政機構中嘅分類亦非統一，相當分散。
關於三重縣屬於邊個地區，當地縣民亦抱著不同意見。有部分高中生棒球賽事嘅年長球迷認為「三重屬於東海地區」，而小學生就提到「學校教話三重屬於近畿地區，地圖書上亦有標示」。另外，伊賀市和名張市位於大阪嘅通勤和通學範圍內，亦可以收睇關西和名古屋兩地嘅電視節目，因此唔少人傾向將三重縣劃分到關西地區。
順帶一提，或者因為呢個爭議已經持續多年，所以三重縣廳官方網站上嘅「三重縣屬於中部地區？近畿地區？」頁面上，一開始就明確表示「我哋認為三重縣既屬於中部地區，亦同樣屬於近畿地區」。
明確表示「同時屬於兩地」嘅理由係因為三重縣既鄰近名古屋又接近大阪，喺生活、文化和經濟等方面都有著緊密聯繫。而且，法律層面上，三重縣被列入近畿圈整備法中嘅「近畿圈」、中部圈開發整備法中嘅「中部圈」範疇中，所以得出同時屬於兩地嘅結論。
行政上同時宣稱歸屬於兩個地區，呢種做法確實非常獨特。再者，能夠融合不同地區嘅優勢，亦係三重縣獨有特色之一。如果有機會接觸到三重縣縣民嘅話，不妨問一句「三重縣應該屬於邊個地區？」吧！
※根據地區區分嘅話，日本分為以下七個地區：北海道地區、東北地區、關東地區、中部地區、近畿地區、中國・四國地區、九州地區
三大商人之一「伊勢商人」的街道！其親切友善嘅個性遺傳自祖先！
自古以來因眾人前來伊勢神宮參拜之故，而繁榮興盛嘅三重縣伊勢，被譽為商人之街。與大阪商人、近江商人※並列為三大商人，因此呢個地方亦被稱為「伊勢商人之街」。
伊勢商人係指喺江戶時代（1600年〜1868年），於江戶、京都開設店舖嘅伊勢國出身商人。當時，江戶街道上除咗「伊勢屋」之外，仲有「越後屋」、「丹波屋」等多間伊勢商人店舖，可謂成行成市，熱鬧非常。另一方面，伊勢商人嘅商業技巧惹來江戶市民嘅妒忌心發作，甚至喺背後將伊勢商人戲稱為「伊勢乞食」。
伊勢商人中，以松阪商人們勢力最為強大。松阪商人們如今雖以松阪牛聞名，當時則販售松阪木綿和茶葉等特產品，再加上可以從前來伊勢參拜人士身上輕易獲取最新資訊，因此松阪商人們紛紛趁機於江戶開設店舖。據聞於江戶時代中期，松阪商人所開嘅店舖更高達50間。
因為伊勢參拜嘅緣故，全國各地擁有不同背景文化嘅人群聚集於呢片土地上，加上三重縣縣民承襲伊勢商人嘅商業特質，所以當地縣民非常重視保持友好和親切嘅態度。只要保持樂觀且親切嘅態度，不僅生意上能容易取得成功，而且考慮到被壯麗伊勢志摩海景所環繞嘅成長經歷，亦能理解三重縣縣民如何培養出溫和、寬容嘅性格。另外，由於三重縣縣民家鄉位於神明所在地附近，所以認為講大話或做壞事會受到懲罰，基本上「好憎講大話」呢件事，因此與三重縣居民溝通時，請注意避免虛假言辭或開太大嘅玩笑啊！
※喺近江國（現今滋賀縣）設有店舖，並前往其他國家進行商業活動嘅商人總稱
相關文章
Comments