從新宿站乘搭JR中央線快速列車唔使5分鐘，即可抵達中野。呢個地區有多間以日本漫畫、動漫、遊戲、模型等次文化商品為主題嘅店舖，更被譽為「次文化之城」。
今次，小編親身走入位於次文化嘅中心地帶——「中野百老匯」嘅2樓，於2023年4月開業並由村上隆親自打造嘅純喫茶店「Coffee Zingaro」（純喫茶ジンガロ），以及4樓嘅「Tonari no Zingaro」，為大家進行深入報導，一探充滿昭和復古風，兼搭配最先端嘅技術、藝術嘅中野新聖地！
由村上隆親自打造的純喫茶店打卡位滿載！充滿昭和復古風並搭配最新技術的藝術空間
純喫茶店「Coffee Zingaro」結合現代藝術家村上隆嘅創作風格與「昭和復古」元素，形成獨特嘅藝術空間，瞬間成為話題性十足嘅咖啡店。原址係名為「Bar Zingaro」嘅店舖，因疫情而暫時停業，於4月進行翻新後以「Coffee Zingaro」（純喫茶ジンガロ）之名重新開張。店內裝修設計由曾參與「恵比專橫丁」和「澀谷橫丁」等知名商店設計，「浜倉的商店製作所」嘅浜倉好宣負責。
特點1：昭和復古招牌&枯山水景觀等充滿日本特色且獨特的內裝設計
純喫茶店「Coffee Zingaro」店內帶有濃厚嘅昭和年代風情※，彷彿回到1970～80年代嘅日本當時嘅「純喫茶」店（指不供應酒精嘅咖啡店），同時近未來嘅感覺亦巧妙地融入其中。當抵達店舖門口，會見到充滿昭和復古風格嘅招牌，和微笑小花嘅霓虹燈裝飾，相當吸睛！
※喺日本，近年於年輕一代所掀起嘅熱潮，將曾於昭和時代（1926-1989年間）期間流行嘅店鋪和雜貨等重新復興，能感受當時氛圍嘅事物。
天花板懸掛著好多色彩繽紛的玻璃燈，又有一個枯山水景觀嘅設計從吧櫃座位延伸至店內較入位置，仲有一座朱紅色嘅橋，將流行元素和日本風格融為一體，營造成一個獨特且不可思議嘅空間。
特點2：大玩遊戲機檯！盡享經典遊戲作品超過癮！
座位使用皮革製梳化和花卉圖案地氈，牆上則採用陶瓷磁磚等元素，忠實再現昭和時代純喫茶店嘅氛圍。最引人注目嘅係所有座位都配有內嵌遊戲機嘅電視遊戲機檯！
日本1970年代至90年代左右，非常流行遊戲機檯座位。可以購買店內專用嘅「小花代幣」（一個500日圓），投入代幣後就可以玩「街頭霸王」和「鐵板陣」等經典復古遊戲。
遊戲機檯座位唔單止受到曾為純喫茶店遊戲機檯嘅愛好者世代歡迎，亦擄獲年輕一代人士嘅歡心，加上代幣圖案非常可愛，唔少人會買多幾個帶返屋企留念添。
特點4：可以欣賞村上隆的藝術作品
店內後方牆壁、早期電視機造型嘅螢幕上，可以欣賞得到村上隆於疫情後推出嘅NFT藝術作品。螢幕右手邊嘅牆壁上，更有展示村上隆首次銷售嘅NFT作品「Murakami.Flowers」。以70年代電視遊戲風格嘅像素圖案，去呈現村上隆嘅代表次作「花」之藝術，於店內或4樓嘅「Tonari no Zingaro」店，可以購買得到以上述像素圖案作品所設計嘅商品。
據說村上隆創作NFT作品嘅契機，係因為疫情期間網上遊戲大熱，大家喺遊戲中可以好似現實一樣，享受與朋友一同欣賞煙花等活動。本人被呢種於數位世界中尋找美感並享受互動交流嘅情景所啟發。
純喫茶店「Coffee Zingaro」融合昭和復古風和最先進嘅NFT網路技術，成為現實與數位世界交流互動嘅場所，既吸睛又好玩。
特點5：可愛又好味道！多款正宗甜品和精心調製飲品任你挑選！
介紹完外觀和內裝之後，最令人感興趣嘅當然係店內甜品&飲品款式啦！「Coffee Zingaro」提供以小花為主題嘅甜品和飲品，當中，甜品由「Tonari no Kaikado」（となりの開花堂）嘅甜品師傅負責開發，而咖啡則使用店內烘焙嘅咖啡豆製作，相當講究！
今次小編就決定嘗試人氣嘅「小花布甸」&「Caffè Latte」（牛奶咖啡）！
附上小花曲奇餅嘅布甸，為純喫茶店經典風格嘅較硬身布甸，聽聞係由甜品師傅於焗爐裡蒸煮60分鐘後，一個接著一個手工製作而成。用匙羹𢳂一啖放入口中，可以品嚐到濃郁蛋香和滑口感。
飲品餐牌除咗小編點咗嘅「小花Caffè Latte」之外，仲有各種類型嘅咖啡飲品可供選擇，包括「抹茶Latte」、蜜瓜雪糕梳打、咖啡雪糕梳打、香蕉奶昔和康普茶等，種類非常豐富。而甜品餐牌中，「小花咖啡啫喱」和「小花Pancake」，更加係人氣打卡之選！另外，仲可以上網買大受歡迎嘅小花曲奇罐等等，「Coffee Zingaro」咁多精彩位，記得唔好錯過！
從典型日本小物到時尚商品服飾！盡在「Tonari no Zingaro」
位於中野百老匯4樓嘅「Tonari no Zingaro」，係一間可以購買村上隆商品和服飾嘅專門店。
特別受歡迎嘅係表情豐富兼搭配各種色彩嘅「Flower Cushion」（咕𠱸），分別有直徑60cm和30cm兩種尺寸可供選擇，因此有唔少人會購買不同尺寸和顏色，去搭配家居裝飾。「Flower Cushion」有多款有趣設計，例如表面和背面不同圖案、擁有笑臉和其他不同表情嘅選擇，為大家帶來無限驚喜！另外，仲會有藝術作品中常見嘅親子熊貓造型，令人花多眼亂。
入口處嘅收銀櫃台前櫥窗中，陳列著製菓品牌「Tonari no Kaikado」嘅「Murakami.Flowers彩虹曲奇罐」、砌圖、鎖匙扣，以及可以養育萌寵「Ohanachan」嘅「Flower Go Walk」小花電子雞等產品。當中，仲有唔少經典日本風格嘅商品，非常值得親身前往一探究竟！
4F原來係純喫茶店「Coffee Zingaro」舊址！？通道上嘅卷閘亦係不可錯過嘅打卡位
原來4樓仲有其他可以享受村上隆世界嘅精彩打卡位！包括「Tonari no Zingaro」對面嘅純喫茶店「Coffee Zingaro」舊址，以及通道上嘅卷閘。
「Coffee Zingaro」舊址門上掛著「CLOSE」（關門）嘅標牌，玻璃窗上貼著「店舖搬遷通知」嘅日文版、英文版注意事項。但其實，原本4樓嘅店鋪搬到去2樓成為現時嘅「Coffee Zingaro」呢件事，完全屬於虛構嘅故事情節！換言之，呢度係一個經過精心設計嘅虛構場景，使用仿古加工技巧，營造出類似真正喫茶店舊址氛圍，增加吸睛嘅打卡元素！
另外，要留意通道嘅卷閘上繪畫有「Kaikai Kiki」和小花！以色彩繽紛笑容滿面嘅小花，和擁有喜怒哀樂不同表情嘅「Kaikai Kiki」作背景，影返張靚相留念，絕對會成為你引以為傲嘅精彩打卡位！
純喫茶店「Coffee Zingaro」, 「Tonari no Zingaro」
- 地址：東京都中野區中野5-52-15 中野百老匯2樓（Coffee Zingaro）、4樓（Tonari no Zingaro）
- 交通：從JR中野站步行約6分鐘
- 營業時間：（Coffee Zingaro）12:00〜19:00、（Tonari no Zingaro）12:00〜17:00
- 定休日：（Coffee Zingaro）週二和週三、（Tonari no Zingaro）休息日非固定
相關文章
Comments