日本47個都道府縣中，關西地區大受訪日觀光客歡迎。本篇文章，將為大家介紹該地區嘅魅力和各個府縣嘅特點！
此外，文章嘅後半部分將深入探討關西地區中經常被比較嘅大阪、兵庫、京都和奈良四個府縣。睇完呢篇文章，或者會令你對下個關西之旅更增添一份樂趣呢！
關西地區概述：首先了解各個府縣的位置和特點吧！
正如代表著日本嘅鐵道公司「JR東日本」和「JR西日本」，分別負責不同區域一樣，日本喺表示地區時常常使用「東」和「西」呢兩個詞彙。「關東地方」與「關西地方」正正係其中一個例子。以下落嚟，將會探討關於關西和關東嘅差異，以及關西各府縣嘅特色。
關西和關東的飲食文化&日常習慣大不同
關西和關東不僅係地區名稱，就連風俗、飲食和文化亦有所不同。例如，喺飲食方面，以日本新年嘅正月料理代表「雜煮」為例，兩者差異非常明顯。喺關東地區，會加入四角形嘅日式年糕，湯底使用醬油調味而成，而關西嘅「雜煮」則大多數會加入圓形嘅日式年糕，並使用白味噌去製作其湯底。另外，玉子燒和烏冬湯底嘅調味等方面，關東和關西都各有不同。
此外，旅遊期間比較容易發現嘅係扶手電梯上嘅站立位置。為防止過度擠迫混亂，日本人搭扶手電梯時有一種習慣，唔急嘅人會企埋一邊。關東地區習慣靠左企，而喺關西地區，則習慣靠右企。
「關西地方」和「近畿地方」呢兩個用詞究竟有咩分別？
雖然並無明確定義，但通常會將包括三重縣在內嘅2府5縣稱為「近畿地方」（近畿地區），呢個名詞經常會被學校教科書和行政機構等使用。
當提到「關西地方」（關西地區）時，通常指嘅係2府4縣（滋賀縣、京都府、大阪府、兵庫縣、奈良縣、和歌山縣），但有時亦會與「近畿地方」表示同樣嘅地區，將三重縣亦計算在內。
日本人氣旅遊名勝！關西地區各府縣的特色和觀光名勝
關西地區係一個非常受歡迎嘅旅遊目的地！以下落嚟，小編將介紹各個府縣嘅特色和著名景點。
- 大阪府：作為關西地區嘅核心存在，係商業和旅遊嘅據點。著名嘅景點有大阪城、道頓堀和日本環球影城（USJ）。
- 京都府：充滿著日本歷史和傳統嘅街道。知名景點有清水寺、金閣寺和伏見稻荷大社。紅葉季和櫻花季亦係旅遊嘅熱門時節。
- 兵庫縣：比起「兵庫縣」，縣內嘅神戶市和姬路市等地名更廣為人知。神戶擁有以夜景著名嘅六甲山、「KOBE HARBORLAND」、神戶港塔，而姬路市嘅姬路城則作為日本首個世界文化遺產而聞名。
- 奈良縣：奈良縣擁有例如法隆寺和東大寺大佛等多個古蹟和佛教寺廟。由於可以輕鬆地乘坐電車從京都和大阪前往，因此唔少人選擇奈良為一日遊嘅旅遊目的地，亦係奈良嘅特色所在。
- 和歌山縣：位於紀伊半島南部，擁有美麗大自然環境和溫暖氣候，有著和歌山城、白濱溫泉、熊野古道、高野山等世界遺產、度假勝地和能量景點。
- 滋賀縣：擁有琵琶湖等迷人嘅大自然景觀。北鄰福井縣、東鄰岐阜縣、東南鄰三重縣、西鄰京都府，自古以來就係交通要點。彥根城和比叡山延曆寺等都係該縣著名景點。
- 三重縣：從該縣東部延伸到南部皆面臨大海，擁有伊勢神宮等多個觀光名勝。隣接岐阜縣、愛知縣等地，有時被歸類為關西或近畿地區，有時則被歸類為中部地區。
即日來回嘅一日遊之旅簡直係家常便飯！大阪、京都、兵庫、奈良四個府縣之間嘅距離感&競爭關係解說！
乘搭JR京都線新快速電車，從大阪到京都只需短短30分鐘即可抵達！而從大阪到三宮則乘搭JR線新快速電車約20分鐘即可抵達。京都到奈良可使用JR線或近鐵線電車，車程大約30至40分鐘。而大阪到奈良則可使用大阪環狀線電車約50分鐘便可輕鬆抵達。
關西地區嘅鐵路交通完善，可以於各縣市之間輕鬆來回。除咗返工、返學、唔少人喺週末期間可以隨意地到其他縣市進行一日遊觀光。然而，大阪、京都、兵庫、奈良呢四個府縣雖然同樣位於關西地區，但其縣民性則各有特色。本文章將會介紹之前曾於「47都道府縣系列」中探討過嘅各府縣特色，包括當地方言、各府縣之間嘅關係等等，為大家進行更詳盡嘅報導！
永遠的競爭對手？大阪 vs 京都 vs 神戶的競爭意識，奈良則保持觀望姿態？
提到關西方言，大家通常稱之為「關西腔」，但如果你向一位關西人問及：「關西腔究竟係點樣嘅方言？」，他們可能會嬲嬲地咁回答話：「就算同樣係關西地區，每區域嘅方言都完全唔同，唔好將所有『關西腔』混為一談！」。
順帶一提，以下係大阪腔、京都腔和神戶腔之間，具有明顯差異嘅具體例子。
「你做緊咩呀？」嘅日文標準語係：「Nani-o-shiteirun-desu-ka/ 何をしているんですか？」
大阪腔：「Nani-shi-ten/ なにしてん？」
- 京都腔：「Nani-shite-haru/ なにしてはる？」
- 神戶腔：「Nani-shi-to~o/ なにしとぉ？」
「你唔嚟咩？」嘅日文標準語係：「ko-nai-no/ 来ないの？」
大阪腔：「Ke-hen/ けーへん？」
- 京都腔：「Ko-hen/ こーへん？」
- 神戸腔：「Ki-hin/ きーひん？」
不同地區有著不同語言嘅表達方式和語調。另外，據當地人表示，關西人相當重視縣民彼此嘅性格和方言，例如大阪代表著活力和元氣，京都則以端莊為特色，神戶則以時尚為主，每個地方都有其獨特之處。
小編向認識嘅大阪人談及到京都嘅時候，曾經聽過對方講「明明同大阪一樣嘅物品，價格卻因為係旅遊勝地而被提高」、「京都人係表裡不一」等，表現一副面對著競爭對手時嘅態度。相反地，談及到神戶時，則對其持有「時尚」、「精緻所以喜歡」等良好印象。另外，談及到對於奈良嘅印象時，卻表示「除咗鹿之外就咩都無」、「奈良嘅人好悠哉」等，即使同為關西地區，對於各府縣嘅印象簡直係大相逕庭。
唔少京都人和神戶人，對於自己嘅出身地充滿自豪感，因此並唔希望將他們與「標準大阪人」混為一談。
特別係京都人，他們對於京都昔日為「日本首都」呢一點特別感到自豪。根據日本索尼生命保險公司所實施嘅「47個都道府縣 生活意識調查2022」結果顯示，京都市民列為對手嘅都道府縣係東京，其中一位女性回答其理由為「因為兩者係昔日首都和現今首都」......
順帶一提，奈良縣民並無參與三府縣嘅競爭。其原因不僅為奈良縣民天性悠哉，更因為喺歷史方面，奈良比京都更早成為首都。奈良擁有多個日本最古老嘅史跡，並認為「鬥嚟鬥去都唔會有咩結果」，選擇以沉著冷靜嘅態度去看待一切，正正係奈良縣民自豪嘅態度呢。
充滿個性和獨特魅力！深入介紹大阪、神戶、京都、奈良當地居民的特色文化！
最後會介紹大阪、神戶、京都和奈良呢四個府縣，向大家徹底報導各地區嘅獨特情報。
日常對話中，大阪人擅長互動和調侃！人與人之間距離感近
作為搞笑藝人嘅聖地，大阪當地居民最鍾意得意有趣嘅事物。當中，要成為被喜愛人物嘅條件之一，就係善於配合和做出相對反應。舉個例子，大阪人嘅靈魂食物，「551HORAI蓬萊」嘅豬肉包，其電視廣告中「有551嘅時候⤴」（551があるとき⤴）呢句台詞，就好似喜劇表演形式「漫才」嘅問答一樣，當被問到「有551嘅時候」（551があるとき）時，只要能夠迅速接下一句「沒有551嘅時候」（551がないとき），就幾乎可以被當成大阪人嘅一份子！
另外，大阪人與他人之間嘅距離感較為親近，即使係初次見面嘅情況下，嬸嬸們都會親切地同你傾返幾句，然後從手袋中拎出糖果話：「請你食糖吖」。
如果想更詳細地了解大阪人，請點這裡
被讚美時要小心！希望你能讀懂京都人之間的言外之意
因為京都人認為說話唔好太直接，會顯得更為優雅，所以讀解同京都人對話中嘅言語，繼而推測出其背後真正想表達嘅內容係非常重要嘅一環。
舉個例子，喺一間懷石料理店中，店員問客人「氣味好香吖，唔知你係用邊款香水呢？」嘅呢種情況下，實際上嘅意思係「入嚟餐廳食飯時，請勿使用過於濃烈嘅香水」。另外，如果你見到一個帶住小朋友嘅父母被稱讚話「嘩，你個小朋友真係精力充沛呀！」，實際上係暗示「請你叫小朋友保持安靜」，正在向父母發出警告喔。其實就連日本人都難以解讀京都人嘅真實諗法！
如果想更詳細地了解京都人，請點這裡
兵庫縣民有時候會表示並非出身於兵庫縣，而係神戶
兵庫縣民被問及出生地方時，常常以城市名如「神戶市」、「西宮市」、「姬路市」、「芦屋市」等回答，他們對城市甚至比對縣市更有自豪感。
特別係作為時尚港口城市嘅神戶市，聚集了世界知名嘅時尚品牌和大型企業，成為整個縣內憧憬之地。當和其他縣民交談時，許多兵庫縣民都感受到「出身來自神戶比起來自自兵庫縣嘅印象來得更好！」。
如果想更詳細地了解兵庫人，請點這裡
奈良人：史跡與生活融為一體
擁有悠久歷史嘅奈良係古墳（古代土墳墓）和陵墓（皇族之墓）嘅寶庫。當你喺呢個縣內漫步時，經常會遇到起伏嘅小山丘和綠意盎然嘅公園，呢種地方幾乎都係珍貴嘅史跡。然而，雖然對遊客嚟講相當獨特，但當地居民卻表示毫不稀奇，所以小朋友們經常喺古墳上或其四周奔跑玩耍等，經已成為日常生活常態。順帶一提，由於挖土時極有機會出現各種意想不到嘅物品，所以喺建造新建築物之前，需要進行挖掘調查亦係常見之事。部分人會惋惜地話，起樓時連續發現遺跡或古墳嘅話，會令佢哋「可能一世都起唔到樓」，亦有人表示擁有珍貴史跡融入到日常生活中嘅狀況，咁先至係奈良呢。
如果想更詳細地了解奈良人，請點這裡
Comments