位於日本沖繩縣西南部嘅石垣島，係屬於八重山群島嘅離島。呢座島嶼有獲得知名旅遊指南書最高三星評價嘅川平灣、可以喺碧綠色嘅海洋中進行潛水等體驗、享受壯麗絕景和感受大自然嘅戶外活動而聞名，係日本頂尖嘅南國度假勝地。
本篇文章，將會為大家介紹有關石垣島嘅旅遊景點和住宿區域，以及推薦嘅旅遊時期和交通等資訊！記得要Bookmark低，為下個石垣島之旅做足準備啦！
※文章中所刊登的資訊和價格皆為2023年5月採訪時資訊。
石垣島旅行最重要係選擇適合嘅據點！本文將按照不同區域介紹石垣島嘅旅遊&住宿要點！
由於石垣島上並無電車，所以島內嘅交通方式一般以租車或搭的士為主，如果你唔想喺交通上花費太多金錢嘅話，亦可以乘搭路線巴士或租借電單車等。或者有唔少人認為「如果唔租車嘅話，可能無得喺石垣島上周圍去？」，但如果入住石垣港附近嘅酒店，遊覽島內主要觀光景點嘅話，其實唔使租車都可以玩得盡興喔。
然而，一般以海景為賣點嘅度假酒店，皆位於離港口和市區較遠嘅地方，因此推薦使用汽車作為交通工具。無車又想遊覽多個觀光景點，可謂相當困難，所以如果你無車牌嘅話，建議入住位於市中心嘅酒店，參加旅行團或包車遊覽。
西部（川平灣、度假區）
石垣島No.1旅遊勝地——川平灣，此區域可以從觀景台上俯瞰閃爍著仿如綠寶石般色調嘅大海絕景。另外，呢度除咗係進行潛水等多項海上活動嘅聖地，更加係石垣海濱酒店和石垣首個奢華露營設施「Yokabushi」（ヨーカブシ）嘅所在地。不過，由於巴士班次非常少，所以基本上需要租車或乘搭的士移動喔。
北部地區（海灘地區）
北部地區絕對係絕景嘅寶庫！無論係位於島嶼最北端嘅平久保埼燈塔、能俯瞰平久保半島和石垣海景嘅玉取崎展望台、抑或係被指定為西表石垣國立公園嘅天然米原海灘等，皆為著名景點。此地區更擁有多間可租借嘅別墅型住宿，讓您可享受一個與家人獨處嘅悠閒假期。
然而，由於路線巴士班次較少，如果選擇入住呢個地區嘅住宿，主要嘅交通方式仍然係自駕。此外，北部嘅租借別墅與市區酒店有所不同，周邊可能缺乏超市或便利店，亦有可能無Wi-Fi提供。因此，請仔細研究其設施和周邊環境，再作決定。
東部地區（新石垣機場周邊）
新石垣機場（南方之島 石垣機場）於2013年建成，算係一個相對較新嘅機場，亦係通往石垣島嘅空中大門。機場內設有多間手信舖和餐廳。雖然機場周邊並無酒店或住宿設施，但租車店舖齊全，唔少人會喺機場周邊租車。
南部地區（市鎮街道區域）
講到石垣島觀光嘅據點，就不得不提南部嘅市鎮街道區域。石垣港離島碼頭位於此區，提供前往竹富島、西表島等離島嘅高速船服務。此外，亦擁有超市、便利店、銀行、餐廳、醫院等，日常必需設施可謂一應俱全。
宿泊選擇非常多樣化，從島上價格最實惠嘅民宿和公寓式住宿，到三星、四星級度假酒店應有盡有。此外，喺繁華嘅美崎町周邊，有多間可以品嚐得到石垣牛以及各種石垣美食嘅餐廳。
最佳觀光時期推薦！石垣島嘅天氣、氣溫和颱風季節全面睇
石垣島位於四面環繞著暖流黑潮嘅溫暖海洋之中，氣溫日較差較小，濕度高達75％，因此被稱為「亞熱帶海洋性氣候」。2022年平均日溫度為24.9℃，即使喺夏季7月、8月期間，最高溫度亦只有約33℃左右，冬季12月至2月期間最低溫度約為16至18℃左右，所以全年有唔少日子都可以著住短袖T恤度過呢。此地有著本州嘅「夏天」&「秋天」嘅氛圍。
石垣島嘅海灘開放時期為每年3月初，去到4月尾甚至會出現超過30℃嘅高溫天氣，所以前往當地觀光嘅話，建議喺日本新年過後嘅1月至3月期間出發喔。此外，8月、9月屬颱風季節，喺安排行程上需多加注意。秋季之後，最推薦嘅旅遊時期係11月。呢個時候颱風季過去，天氣涼爽舒適，可以盡情享受石垣島獨有嘅悠閒氛圍。
真係需要租車遊島嗎？石垣島旅遊時嘅交通方式介紹
石垣島內嘅交通方式主要係租車、觀光的士或公共巴士。以下落嚟將詳細介紹各種交通方式。
租車
根據市場觀察，租借一架四人座輕型車， 2日1夜嘅費用大致為12,000至18,000日圓。
然而，就如「【日本沖繩】唔租車都可玩盡沖繩！有效地遊覽沖繩本島的旅遊行程指南」文中所提及到，於本島租車嘅情況一樣，多間租車公司喺疫情嘅影響下倒閉或減少其車輛數量，導致恢復對外通關後出現嚴重嘅租車短缺問題。如果你計劃使用租車服務，建議提前預約，因為抵達當地先至即場安排租車嘅話，分分鐘會無車租喔。
觀光的士
如果想按照個人喜好遊覽多個名勝嘅話，小編推薦使用觀光的士！觀光的士提供從遊覽島上2、3個景點嘅2至3小時行程，到遊覽整個島上所有名勝嘅6至7小時行程等多種選擇，價格會因時間和景點數量而有所不同。以四人座普通車遊覽整個島上名勝嘅6小時行程為例，價格大致為26,000至30,000日圓左右。
路線巴士
近年，喺無車牌嘅年輕族群中，「利用巴士進行島內觀光」變得越來越受歡迎。石垣島嘅路線巴士（東巴士）幾乎涵蓋了整個島嶼，包括機場至離島碼頭區段，共有12條路線，可以前往主要嘅觀光景點。然而，除咗機場線之外，其他巴士嘅運行班次非常少，通常一日只有幾班，所以要注意唔好錯過上、落車時間，或上錯車喔。
※如果使用路線巴士，可以選擇全日任搭嘅1日票（成人1,000日圓）或5日任搭嘅「Michikusa Free Pass」（みちくさフリーパス、成人2,000日圓）等優惠票券，來玩盡石垣島喔。
定期觀光巴士團&離島觀光
如果想以更性價比高嘅方式遊石垣島嘅話，小編推薦參加定期觀光巴士團、離島旅行團喔。
定期觀光巴士提供包含午餐嘅環島觀光旅遊（需預約），而且價格唔會超過5000日圓，非常抵玩。此外，離島碼頭亦有前往西表島、竹富島、小浜島、黒島、鳩間島等石垣島南部島嶼嘅渡輪航班，建議可以嘗試前往離島觀光。
另外，亦有一日遊覽多個離島嘅離島旅行團，例如竹富島、由布島嘅水牛車觀光與「玻璃船」、西表島嘅「紅樹林遊船」等遊船行程、划艇體驗等，讓您能夠有效率地享受八重山嘅觀光樂。
Comments