東京澀谷一帶，無論去幾多次都總有新發現！2020年夏季，喺呢個日本時尚潮流嘅發源地，誕生了一個地標性存在嘅複合商業設施——「MIYASHITA PARK」！
今次小編將主力介紹「RAYARD MIYASHITA PARK」嘅1樓至3樓區域，並精選出6間可以了解得到「現今澀谷」嘅店鋪，記得要將文章睇到最尾喔。
※本文中提及嘅價格（含稅）皆為2023年4月時嘅資訊。由於內容或會出現變更，最新資訊請查閱各店舗嘅官方網站。
竟位於東京・澀谷嘅「MIYASHITA PARK」係咩地方？從澀谷站出發嘅交通路線係？
「MIYASHITA PARK」位於澀谷區域和原宿表參道區域嘅中間位置，係一個將公園、商業設施、酒店和停車場等設備集結於一身嘅複合商業設施。
從澀谷站徒步3分鐘即可抵達，從「東京Metro」明治神宮前〈原宿〉站出發亦只需徒步約8分鐘，地理位置相當優越。
「RAYARD MIYASHITA PARK」內擁有約90間店鋪，分為「South」（南街區）和「North」（北街區），當中包括咖啡店、時裝店和餐廳等種類繁多，從美食到揀選手信等購物景點包羅萬有，可以滿足遊客於旅途中嘅各種需求，絕對係一個旅遊好去處喔。
然而，要遊遍呢個處處充滿精彩位嘅建築物內部，確實需要花費唔少時間。因此，今次FUN! JAPAN編集部精選出好幾間心水店舖！大家不妨參考一下再出發！
RAYARD MIYASHITA PARK 推薦店鋪①：THE SHIBUYA SOUVENIR STORE（South 2F）
正如店名所示，「THE SHIBUYA SOUVENIR STORE」係一間擺放著經精心挑選過嘅商品之店鋪，展示著東京和澀谷獨有嘅特色紀念品。從以澀谷地標忠犬八公為主題嘅商品，到與澀谷有聯繫嘅藝術家和創作者合作嘅限量版合作商品，擺滿讓人愛不釋手嘅手信、紀念品！你可以參考店內嘅暢銷排行榜，盡情享受選購手信、紀念品嘅樂趣！
澀谷檸檬捲（10條裝）/ 972日圓
由「Lemon Rice」專賣店「Lemon Rice TOKYO」與創立於1630年嘅福岡縣名菓「千鳥饅頭總本舖」合作推出嘅商品「澀谷檸檬捲」（澀谷檸檬ロール），係長期嘅銷售排行榜冠軍。據聞唔少人迷戀其脆脆餅乾嘅外層，搭配著甜酸檸檬嘅內餡，所誕生嘅絕妙好滋味。
Shibuya Miyashita Coffee（10g×5包裝） / 681日圓
據聞以摩艾石像和忠犬八公作設計理念嘅滴漏咖啡，深受多位粉絲喜愛。大家亦不妨買返香港，再邊嘆咖啡邊欣賞可愛嘅插畫，療癒日常疲憊吧！
- 營業時間：11:00～21:00
- 官方網站：https://infoshibuya.stores.jp/
RAYARD MIYASHITA PARK 推薦店鋪②：HIGHTIDE STORE（South 2F）
由九州福岡嘅文具雜貨品牌「ZIGHTIDE」所開設，位於東京嘅唯一直營店「HIGHTIDE STORE」。店內販售著原子筆、筆記簿、記事簿、手機指環扣、剪貼板、袋仔、手巾仔等約1,500種商品。商品不僅外觀精美，亦非常實用，因此唔少人會將其視為時尚配飾嘅一部分。
呢款具有多種顏色選擇嘅收納用品，只係放喺房做擺設都覺得興奮！仲可以提高整理整頓嘅效率添～
充滿著昭和懷舊風情嘅鎖匙扣和紙膠紙，每一款都可愛到令人難以選擇！
- 營業時間：11:00～21:00
- 官方網站：https://hightide.co.jp/
RAYARD MIYASHITA PARK 推薦店鋪③：and wander（South 2F）
相信身處喺夏天以濕熱著稱嘅香港讀者們，都想揀返啲可以抵抗炎熱溫度並能保持舒適為主嘅服裝吧？今次，小編就要介紹一個可以為大家解決以上服裝挑選嘅煩惱——「and wander」。
呢個日本戶外品牌，提供了功能性卓越嘅服裝和裝備，適用於日常穿著、旅行以及健行等各種戶外活動。該品牌創始人曾於「ISSEY MIYAKE」工作，因此喺時尚性方面亦無可挑剔！
sil daypack / 16,500日圓
呢款「sil」系列嘅袋絕對係旅行嘅好拍擋，具有出色嘅耐久性和防水性能。唔單止可以輕鬆摺疊成小巧嘅收納形狀之外，更令人驚嘆嘅係重量僅165克嘅輕量設計！
CORDURA typewriter LS over shirt / 26,400日圓
呢款使用CODURA材質嘅打字機恤衫「Typewriter Shirt」，衣襟上配有登山扣「Carabiner」（*1），可以掛上鎖匙或小物品，非常適合日常使用！
*1：指帶有開合金屬環嘅環扣裝置，常用於露營等戶外用品
- 營業時間：11:00～21:00
- 官方網站：https://www.andwander.com/
RAYARD MIYASHITA PARK 推薦店鋪④：MIYASHITA CAFE（South 2F）
想要享受甜品、零食時，強烈推薦前往發祥自福岡嘅軟雪糕專門店——「Daimyo Softcream」嘅新概念店「MIYASHITA CAFE」。
採用九州新鮮搾取嘅牛奶為原料，使用全球頂級嘅雪糕機製作而成嘅「大名軟雪糕」，以濃郁牛奶味和有如忌廉般滑順口感為其特色，即使係食完凍嘅食物會頭痛、或唔多鍾意食凍嘢嘅人，都可以安心享用。
（左1）Strawberry Short（いちごショート）/649日圓
（左2）Cream Soda（クリームソーダ）/693日圓
呢款放上原粒士多啤梨嘅雪糕「Strawberry Short」，係店舖嘅招牌美食。雪糕筒更加入富含天然礦物質，並有助於排毒嘅天然竹炭製作，好味得嚟又健康！
- 營業時間：11:00～21:00（L.O.21：00）
- 官方網站：https://miyashitacafe.business.site/
RAYARD MIYASHITA PARK 推薦店鋪⑤：THE MATCHA TOKYO（South 2F）
喺「MIYASHITA CAFÉ」隔離有一間名為「THE MATCHA TOKYO」嘅店舖，專門提供抹茶飲品和美食。店舖更選用鹿兒島產和京都宇治產，並且係100％有機嘅抹茶。你可以嚐試純粹嘅「抹茶」，享受茶葉馥郁嘅香氣，仲可以飲多杯將帶有澀味嘅抹茶與牛奶相結合嘅「抹茶Latté」，比較一下兩者嘅味道。「抹茶」嘅沖泡過程將由工作人員進行即場表演，記得要準備好相機大影特影啦！
（左1）Japan Premium（ジャパンプレミアム）/ 594日圓
（左2）抹茶Latté （抹茶ラテ） / 702日圓
當中，最受歡迎嘅係保持適當嘅茶澀味並凝縮著豐富嘅好滋味「Japan Premium」。不妨搭配著豆沙包和窩夫享用，感受一個充滿抹茶風味嘅下午茶時光。
- 營業時間：11:00～21:00（L.O.20:45）
- 官方網站：https://www.the-matcha.tokyo/
RAYARD MIYASHITA PARK 推薦店鋪⑥：Miyashita Naru（North 3F）
最後一站，可以前往具有當地風情嘅居酒屋「Miyashita Naru」（ミヤシタ 成ル），為全日旅程作美好終結。
呢間餐廳最大特色，莫過於店員會喺鐵板吧檯上為你烹調。你可以親眼目睹食材喺你面前被烹煮嘅過程，帶來絕佳嘅現場感！另外，你亦可以選擇來自酒莊並真空封裝嘅「真澄」（長野）、「大信州」（長野）和「貴」（山口）等日本酒，搭配著美食享用，絕對會為你帶來無比幸福感。
（左）自選出汁玉子燒（選べるだし巻き玉子） / 1,510日圓（精選蛋730日圓+魚子醬780日圓）
（右）烤燒賣（4個）/ 650日圓
你可以從3款雞蛋、2款鰹魚出汁、2款配料中，自選組合成日式出汁玉子燒，亦係店舖嘅名物菜式。想要影出吸睛嘅打卡相嘅話，推薦揀選魚子醬配料，皆因有如瀑布流動一樣嘅魚子醬，甚為吸睛！
- 營業時間：11:00～23:00（L.O. フード22：00 / ドリンク22：30）
- 官方網站：https://asia-kitchen.co.jp/miyashita_naru/
MIYASHITA PARK
- 地址：東京都澀谷區神宮前6-20-10
- 營業時間：
- 【商店】11:00～21:00
- 【餐廳・美食廣場】11:00～23:00
- ※請參閱各店舖網站以確認午餐和晚餐時間
- ※營業時間因店舖而異
- 交通方式：從JR山手線、埼京線、湘南新宿線、東京Metro銀座線、半藏門線、副都心線、東急東橫線、田園都市線、京王井之頭線「澀谷」站步行約3分鐘即可抵達
- 官方網站：https://www.miyashita-park.tokyo/
Comments