新潟縣被大海和山脈環繞，同時以生產優質米而聞名。除咗美味嘅海鮮和米製食品之外，仲有唔少大受當地縣民喜愛嘅B級美食。今次，小編會為大家介紹新潟5大拉麵、巴士總站嘅咖喱、「Italian」等新潟縣代表性嘅B級美食喔！
何謂「B級美食」？
除咗眾所皆知、被譽為旅遊必食嘅美食之外，即使係同一個縣，亦會根據不同區域而誕生出不一樣嘅當地美食。呢種當地美食多數以當地食材烹煮，無任何華麗嘅技巧或裝飾，屬於當地居⺠熟悉嘅好味道，通通被日本人稱為「B級美食」。
新潟B級美食特徴
新潟縣，作為稻米之鄉，擁有眾多優質米和以米作原料製作嘅米菓、米餅等當地特產。然而，新潟嘅B級美食與米並無太大嘅關聯性。
當中，最具代表性嘅係新潟5大拉麵。部分日本人會稱新潟為「拉麵王國」，因為各地區嘅拉麵皆有著不同風味，你可以喺新潟品嚐到豐富多彩嘅特色拉麵。
另外，講到新潟B級美食，不得不提以西餐為基礎嘅B級美食。1874年，一位從日本海渡航而來嘅意大利廚師，喺新潟開設了日本首間西式餐廳「意大利軒」。由於該店嘅繁榮，對新潟產生了深遠嘅影響，亦令新潟成為擁有多間西式餐廳嘅地方，繼而誕生出唔少西式嘅B級美食。
新潟5大拉麵
被稱為「拉麵王國」嘅新潟縣，南北長向呈細長形，各地區都有著獨特風味嘅拉麵文化，更被統稱為「新潟5大拉麵」。
新潟濃厚味噌拉麵
新潟濃厚味噌拉麵係新潟市內具代表性嘅拉麵。由於味噌湯非常濃郁，於點餐後會附上一碗帶有湯汁嘅大碗一同上菜，希望顧客能夠根據個人喜好調整味道。當中，其發祥地「Komadori」（こまどり）為當地著名店舖。
新潟清爽醬油拉麵
新潟清爽醬油拉麵同樣為新潟市內所誕生嘅另一款當地代表性拉麵。以醬油為基底，湯頭清澈透明，味道簡單純粹，名副其實地清爽喔。據聞呢款拉麵起源自於屋台攤販，著名店舖為「三吉屋 本店」。
燕背脂拉麵
燕市係一個以製造金屬西式食器而聞名嘅地方。燕背脂拉麵係希望工作繁忙嘅職人們，於工作期間嘅空餘時間，都可以享受到美味拉麵而誕生。使用不易軟化嘅粗麵條、豐富嘅豬背脂（豬背部ㄧ整塊豬皮油）、唔易變涼嘅湯底，以及以碎洋蔥作為配料為其特徵。著名店舖包括發祥地嘅「杭州飯店」。
三條咖喱拉麵
三條咖喱拉麵係於曾以金屬工業聞名嘅三條市廣為流傳嘅拉麵。呢款拉麵由一位出身於三條市，曾於東京西餐廳學藝嘅廚師所開發，深受金屬職人們喜愛，當中，不易冷卻嘅咖喱醬汁為其特徵。既有直接將咖喱醬汁擺放於拉麵上嘅款式，亦有湯頭本身就帶有咖喱味道嘅款式，以及如沾麵般將麵條蘸入咖喱醬汁中食用嘅款式，種類變化相當豐富。有著「正廣」等著名店舖。
長岡生薑醬油拉麵
長岡生薑醬油拉麵於被深厚積雪覆蓋嘅長岡地區所誕生，係一款加入了生薑，讓身體感到溫暖嘅獨特拉麵。以醬油為基底嘅湯頭中，充滿了生薑嘅香氣和風味，讓食客能夠充分體驗到其特殊魅力。著名店家包括發祥地「青島食堂」等。
Italian（イタリアン）
「Italian」係一道加入蕃茄醬或肉醬等配料所製作而成嘅炒麵料理。喺新潟縣內嘅咖啡店即可品嚐得到，當中，以「Mika dzuki」（みかづき）和「Furendo」（フレンド）等店舖最廣為人知。「Mika dzuki」係於新潟市內展開業務嘅咖啡連鎖店，而「Furendo」則為於長岡市內展開業務嘅咖啡連鎖店。然而，關於至於邊間先至係「Italian」嘅發祥地呢一點，經常引起爭議。下次有機會嘅話，不妨試勻兩間，睇吓邊間啱口味啦。另外，仲有一個點要注意，就係喺日本部分地區，會將使用蕃茄醬作調味嘅意大利粉稱為「Italian」，但與新潟嘅「Italian」並非同一款食物喔！
巴士總站的咖喱
位於新潟車站附近嘅萬代城市巴士總站內，店名為「名物 萬代蕎麥麵」（名物 万代そば）所提供嘅咖喱飯，於數年前開始成為人氣話題。呢款咖喱飯因為喺日本嘅綜藝節目上被熱愛咖喱嘅搞笑藝人推薦而備受矚目，現時甚至會有縣市外嘅遊客特地去朝聖品嚐。當中，以豬骨湯為基礎嘅黃色咖喱醬料為其特徵。另外，即使揀選一般份量（470日圓），亦如上圖般，份量相當驚人。雖然係以站立食用形式提供，無法悠閒享用，但利用旅途中緊湊嘅移動時間內去品嚐嘅話，可謂最好不過啦！
名物 萬代蕎麥麵（名物 万代そば）
- 地址：新潟市中央區萬代1-6-1 巴士中心大廈1樓
- 營業時間：8:00～19:00
- 定休日：無休
洋風炸豬扒丼
新潟縣長岡市以「長岡祭大煙花大會」聞名，而其特色美食就係「洋風炸豬扒丼」。呢款B級美食係將豬扒放喺裝滿飯嘅碟上面，再淋上醬汁。當中，有兩種不同風格嘅醬汁可供選擇，一種係以蕃茄醬為基礎嘅「洋食系」，另一種則以多蜜醬汁（Demi-Glace Sauce）為基礎嘅「食堂系」。因此，建議前往餐廳之前，預前了解所選擇嘅餐廳係提供邊款醬汁風格，以便作出選擇喔。
雖然創造出洋風炸豬扒丼嘅「小松Parlor」（小松パーラー），於第二代主廚去世而結束營業，但兩位徒弟分別開設了「餐廳Nakata」（餐廳ナカタ）和「洋食 松Kitchen」（洋食 松キッチン），秉持著創業當時嘅原始風味。
餐廳Nakata（レストラン ナカタ）
- 地址：新潟縣長岡市坂之上町2-3-6若滿都大廈2樓
- 營業時間：11:00～21:30
- 定休日：星期四
洋食 松Kitchen（洋食 松キッチン）
- 地址：新潟縣長岡市喜多町707 道之驛長岡花火館美食廣場
- 營業時間：11:00～20:00
- 定休日：依設施公告為準
Comments