日本47個都道府縣每個地區都有不同特色，無論係街道建築、歷史文化、傳統工藝、美食等等都各具色彩。日本居民根據成長地區嘅文化、風俗民情等等發展出獨特嘅當地人民性格， 日文稱之為「縣民性」。FUN! JAPAN編輯部推出【日本47都道府縣特輯】系列，介紹每個都道府縣不為人知嘅另一面，而今次要介紹嘅係每年「全球人口排名榜」名列前茅嘅東京！
即刻去睇睇擁有新宿、澀谷、原宿和秋葉原等人氣觀光景點嘅東京，有咩不為人知嘅一面啦！
原來「東京出身」人士非常罕見⁉ 拆解點解咁多地方縣民選擇上京入讀大學或就業的箇中原因
東京係全球人口密度最高嘅地區之一。2022年更成為全球主要城市中排名第一，人口密度高達6,399.46（人/㎢），亦成為全國人口數量最多嘅地區（根據全國47個都道府縣嘅人口排名榜）。澀谷十字交叉路口、平日朝早人來人往嘅車站、人潮擁擠嘅電車車廂等，皆為東京人口眾多嘅象徵。
然而，儘管東京總人口多，但係真真正正喺「東京土生土長」嘅東京人其實並唔多。
由於關東地區擁有發達嘅公共交通系統，所以有唔少來自居住喺埼玉縣、神奈川縣等關東近郊人士，會喺東京市內返工返學。此外，亦有唔少來自較遠城市嘅人，因為對大都會東京有憧憬，所以喺揀選升學、就業或因工作調動等情況下，會選擇前往東京。
尤其值得注意嘅係，從高中畢業後前往東京就讀大學嘅情況非常普遍。事實上，根據過往曾實施嘅「大學入學時各都道府縣人口流入、流出者人數相關調査」資料顯示，東京遙遙領先於其他47個都道府縣，即使與大阪、京都、福岡等人氣地方相比，亦佔據著絕對優勢。
順帶一提，小編喺東京某大學就讀時，曾經問過學校嘅學術小組和社團嘅同學們：「你係咪東京出身？」 ，結果得知所有人都係從外地搬到東京。從以上情況可以得知，外地出身者嘅比例非常高。
拜拜性情粗暴嘅江戶人形象！東京人善於關心他人並擁有一顆高自尊心
正如上述所言，東京吸引了來自各地嘅人們聚集。因此，那些長期居住喺東京嘅人，視野更為廣闊，亦更善於關心他人。
提到大家對東京人嘅印象，可能會聯想起「性情粗暴」、「易怒」等昔日江戶人嘅氣質。然而，現今嘅東京，來自其他地方的移居者佔據了近一半嘅人口，加上眾多來自海外嘅遊客等因素影響，擁有江戶人氣質嘅當地居民經已變得不太常見。
一般而言，東京人具有思想靈活、機智聰明，能夠與任何人融洽相處等印象。然而，有時亦會聽見有人話「東京人性格冷漠」，可能係因為東京人即使笑容可掬、表面熱情，但內心和真實想法難以被看透......
此外，由於學業和工作等競爭都相當激烈，東京本地居民基本上都以嚴格和重視實力為本。首都圈集中了許多知名私立學校和名門學府，所以東京人從幼年時期就習慣競爭，並擁有一定嘅自尊心。因為平日接觸各種背景嘅人，所以能夠巧妙地分辨真實想法和應酬之間嘅區別，同時具備了喺各種競爭中鍛煉出來嘅不畏失敗和挫折等精神力量以及自尊心。以上提及到嘅特質，皆為東京人擁有嘅身份特徵。
歷史悠久嘅東京著名住宅區——原來呢度係真正東京人居住嘅地方！
唔少人喺上京或決定長期滯留時，最令人關注嘅就係居住區域，總會煩惱唔知住邊區至好！喺日本首都東京其實擁有唔少古老嘅高級住宅區、以及可以享受下町文化嘅居住區域喔。
以下落嚟，會為大家介紹部分著名且歷史悠久，可遇見東京土生土長「真正東京人」比例相對較高嘅住宅區！下個東京之旅，不妨將以下地區納入散策名單內吧！
城南五山地區（品川區、港區）
城南五山係指花房山、池田山、島津山、御殿山和八山等，位於從JR山手線目黑站到品川站之間嘅三角地帶嘅五個高級住宅區總稱。從名稱中「山」一詞便知，以上區域皆位於高地，昔日為大名宅邸和大名出身嘅住宅區。
順帶一提，池田山以昔日為大名府邸後院，其後改建而成嘅日式庭園——池田山公園，以及現任上皇后美智子陛下嘅出生地「Nemunoki之庭園」（ねむの木の庭公園）而廣為人知。
松濤地區（澀谷區）
松濤地區位於人氣觀光區澀谷嘅徒步範圍內，係一個安靜嘅住宅區，有唔少名人和知名人士嘅豪宅亦林立於此。該地區擁有松濤美術館、戶栗美術館以及各種藝術畫廊和文化設施，為其特徵之一。
成城地區（世田谷區）
富裕階層眾多嘅世田谷區中，尤其係小田急線嘅「成城學園前」車站周邊地區，係一個歷史悠久嘅高級住宅區，位於一座豪宅林立嘅丘陵上。當中，成城學園擁有100多年歷史，讓該地區極具學園城市氛圍。除此之外，更散佈著喜多見不動尊等史跡。據悉，除咗日本著名民俗學者柳田國男曾參與該地嘅建設項目之外，亦曾經為北原白秋等文化人物嘅居住地，該地區亦因此而名聲大噪。此外，同樣位於世田谷區嘅田園調布地區，亦係日本著名嘅高級住宅區之一。
南麻布、元麻布地區（港區）
南麻布、元麻布係日本著名嘅高級住宅區。徒步可抵達麻布十番商店街，有著多個坡道和寺廟，設有世界各國嘅大使館和國際學校，彰顯著多元嘅國際氛圍。
從有多間美術館、電影院和餐廳嘅六本木亦可以徒步抵達。呢度擁有著名廚師餐廳、名人常光顧嘅隱藏餐廳，係一個享譽盛名嘅美食之地。
白金、白金台地區（港區）
或者有部分日本通嘅讀者，望見白金、白金台等地名，或者會浮現出「シロガネーゼ」（Shiroganēze）呢個日文詞彙吧。呢個日文詞彙係出自某本人氣女性時尚雜誌，意思係指居住喺白金、白金台地區嘅全職家庭主婦。特別指喺集合了時尚咖啡店和精品店嘅「Purachina街」（プラチナ通り）內，進行購物嘅全職家庭主婦其姿態，亦被視為富裕女性嘅象徵式名詞。
長久以來居住喺東京嘅人，對於白金地區嘅印象，一般會聯想到「學術氛圍」、「公園眾多」、「豪宅區」等印象，皆因該地區位於港區南部，北鄰南麻布，西鄰澀谷區嘅惠比壽。
此外，該地區周邊有聖心女子學院、東京大學醫科學研究所等學校和研究機構，而白金台站周邊亦有東京都庭園美術館等美術館，為其增添多一層學術氛圍。
日本橋、人形町地區（中央區）
日本橋，自江戶時代便作為城下町而繁榮興盛。最初為德川家康開創江戶幕府時所建嘅居民之街，並成為五街道之起點，被視為商業、金融等嘅中心地區。
如今，東京證券交易所、寫字樓、老字號百貨公司，以及壽司、天婦羅、鰻魚、西式料理等傳統名店依然林立，使得日本橋以其金融、商業、職人之街道等特色而聞名。
此外，人形町亦以保留下町情懷嘅街區而聞名，充滿風情嘅商店街、工房和百年老字號店鋪遍佈於此。另外，有極高機率可以喺度遇到真正嘅東京人呢。
上野櫻木地區（台東區）
擁有上野、淺草、稻荷町、御徒町等地嘅台東區當中，位於高地上嘅上野櫻木地區，以其古老嘅高級住宅區而聞名。
由於位於上野恩賜公園附近，亦靠近東京都美術館和東京國立博物館，因此喺感受文化、藝術和豐富大自然嘅同時，亦可以順路前往附近以商店街和美食街廣為人知嘅谷根千（谷中、根津、千駄木）地區，享受融合了古老歷史嘅日本下町，與美食和藝術相結合嘅獨特文化。
Comments