當今日本社會存在著各種不同目的嘅「〇活」，例如「婚活」（尋找結婚對象嘅活動）和「就活」（尋找工作嘅就職活動），但最近日本又興起兩個熱門詞語，分別係「我推（推し）」和「推活（推し活）」。即使你係第一次聽到呢兩個詞語都唔緊要，只要睇完呢篇文章，就可以完全理解呢兩個喺日本成為人氣熱話嘅詞語喔！
「推し」係咩意思？「推し」嘅對象定義又係咩呢？
「我推（推し）」呢個詞語源自於偶像歌手粉絲圈子中嘅「專業術語」，最初係粉絲們用於稱呼自己喜愛嘅偶像成員，將佢哋稱為「我推成員（推しメン）」（意思為最推崇嘅成員）。從2000年代中期開始，包括AKB48等偶像團體和不同藝人開始推出名為「推し」嘅日語詞彙歌曲。最近，2021年長篇小說《推し、燃ゆ》（中文譯作：本命，燃燒）更獲得日本最具威望嘅文學獎——芥川獎。現時，「推し」經已成為一個被廣泛使用嘅日語詞彙。
呢個日語詞彙原本只會喺偶像迷粉絲圈子中通用，但現時經已被廣泛地用於真實存在嘅人物、虛構角色、以及非人類嘅事物等各種不同領域和對象上。現時，只要你對某人、某事物抱有喜歡之心，兼抱有「想支持！」、「想向身邊嘅人推薦！」等心情，無論對象屬人屬事或物，都可以稱之為「推し」。
「推し」例子
| 實際存在嘅人物 | 創作物 | 人類以外嘅事物 |
| 歌手 | 漫畫 | 動物 |
| 偶像 | 動漫角色 | 鐵路 |
| 運動選手 | 縣廳吉祥物 | 佛像 |
| 戰國武將 | 虛擬歌手 | 食物 |
根據JR東日本公司所進行嘅調查「我推活動、應援廣告調查2022（*1）」（推し活・応援広告調査2022）資料顯示，10~40歲受訪者中有57.4％回答表示「有『推し』嘅存在」。當中，約70％為10~20歲女性、60％以上為10至20歲男性，可見呢個詞彙已被年輕人廣泛認知。。
*1：
調查對象：居住於東京都、神奈川縣、埼玉縣、千葉縣嘅男女，年齡為15～49歲，共17,226人
調査時期：2022年12月16日～2023年1月5日
調查機構：JR東日本公司企劃jeki應援廣告事務局「Cheering AD」
調查方法：網路問卷
支持「推し」的「推し活」係咩意思？
當談論到「推し」時，「推し活」（亦被稱為「推事（推し事）」）亦係不可或缺嘅話題。
關於「推し活」定義，可謂眾說紛紜，但通常被描述為，支持所有「推し」對象嘅活動。以下係常被提及作為「推し」對象嘅代表性例子：
「推し」的其他「推し活」（例子）
| 偶像 | 購買CD、參加演唱會或握手會 |
| 演員 | 觀看電視劇或電影 |
| 動畫 | 聖地巡禮、動畫場景巡遊 |
| 鐵路 | 參觀鐵路博物館、乘坐觀光列車 |
| 動物 | 參觀動物園或水族館 |
相關文章：
根據消費者廳所公佈嘅「令和3年度消費者意識基本調査（*2）」結果顯示，回答「會花費金錢於支持名人或角色人物等活動」嘅比例約為10.3%，而回答會花費金錢參加音樂節或演唱會等體驗性，或活動性較強等活動嘅比例則約為14.6%。兩個項目嘅年齡層都係以10代後半（15〜19歲）和20代（20~29歲）年輕世代佔第一和第二位，隨著年齡增長，比例呈下降趨勢。
*2：
調查對象：全國15歲以上、日本國籍男女共5,493名
調査時期：2021年11月8日～11月23日
調查機構：消費者廳
調查方法：郵寄問卷（網絡回答亦可）
全新旅遊方式！「推し活」相關業務正式進入旅遊業界
隨著「推し活」嘅經濟效應逐年遞增，除咗受到疫情打擊嘅旅遊業界，亦有其他業界發現「推し活」嘅商機喔。以下會為大家介紹兩個旅遊業界嘅相關例子。。
東京巨蛋酒店：將演唱會聖地盡收眼簾嘅「推し活宿泊プラン」（我推活動住宿套餐）超受歡迎！
喺無法參加聚集多人數大型活動嘅疫情期間，酒店便成為體驗小型旅行氛圍嘅新勝地。
粉絲們會喺「推し」嘅生日或其他紀念日時租借酒店房間，觀賞用投影機放映嘅影片、按照個人喜好為房間進行裝飾等，盡情享受人氣熱話嘅「推し活宿泊プラン」（我推活動住宿套餐）。當中，由於東京巨蛋酒店所提供嘅房間仲可以欣賞到「演唱會聖地」——東京巨蛋嘅全景，因此廣受粉絲們歡迎。據聞喺推出期間因為太受歡迎，一直處於客房爆滿嘅狀態之餘，該住宿方案仲不斷延長受理時間，呢股「推し」旋風可謂勢不可擋。
相關文章：
JR東海：以動物園和車站為主題嘅「推し旅」（我推旅行）報名人數激增
JR東海於2021年所推出嘅「推し旅アップデート」（我推旅行升級版），為專注於「推し活」嘅旅行商品並備受矚目。
例如，可以成為愛知縣嘅動植物公園飼育嘅大象嘅「象主」旅遊計劃，即使每人需支付高達30萬日元嘅高昂費用，仍然有成46人申請，人氣頗高。另外，喺最後一班列車行駛結束後，可以參觀京都車站後方嘅夜間導覽「Backyard Tour」，報名人數更超出名額十倍，係「我推車站（駅推し）」嘅熱門行程喔。
相關文章：
「推し活」為日本職場帶來變革。甚至出現「我推假期（推し休暇）」！
「推し活」嘅普及經已開始改變日本職場嘅環境。例如，位於北海道札幌市某保育園設立「我推假期（推し休暇）」制度。除咗法定嘅有薪假期之外，仲會提供長達10日嘅有薪假期供「推し活」使用喔。
另外，負責製作電視廣告嘅公司「株式會社Hiroro」亦採用類似嘅「我推休假制度（推し休制度）」，唔單止允許員工請假去睇演出和參與相關活動，甚至出現突發性活動時，允許員工於當日早退前往活動現場喔。另外，如果員工參加國內或國外演唱會嘅話，最高更可獲得10,000日圓津貼！越來越多企業引入令員工可以更輕鬆地參加「推し活」嘅制度呢。
相關文章：
「推し活」能帶來許多心理上嘅好處！
「推し活」除咗對經濟和工作環境產生影響之外，另一個優點係能夠滿足進行「我推活動」一方嘅心理需求。
根據「FineToday Co., Ltd資生堂」所進行嘅「推しのいる生活に関する実態調査（*3）」（關於擁有我推人士的生活實際調查），約有九成進行「推し活」嘅經驗者表示「為生活增添樂趣」或「生活變得豐盛」。唔少人認為擁有「推し」後，令佢哋感到每天生活更加充實，感受到更多正面情緒。
另外，亦有腦內科醫生表示，「推し活」亦有助促進大腦活性化，喺醫學層面上亦有好處。適度地享受嘅話，可以成為心靈營養素和活力來源喔。
*3：
調查對象：年輕為15至59歲，擁有「推し」的男女、共500名
調査時期：2022年4月28日～5月2日
調查機構：FineToday Co., Ltd資生堂
調査方式：網路問卷調查
現時日本掀起一股「推活（推し活）」熱潮。包括FUN! JAPAN編輯部團隊嘅小編們，除咗努力工作之外，亦擁有唔少音樂家、城堡等「我推（推し）」對象。香港係咪都有類似嘅「推し」或「推し活」文化呢？記得留言同小編分享喔！
Comments