日本福井縣推薦溫泉3選！千與千尋嘅神隱溫泉旅館原來就係呢度？！福井縣有多個魅力十足嘅溫泉區，有可以欣賞到大自然風光嘅溫泉鄉，又有源泉豐富兼極具風情嘅優美溫泉鄉。當中，更有溫泉設施係以電影《千與千尋》中出現嘅溫泉旅館為藍本所建造。今次，小編會為大家介紹福井縣必去溫泉及其他旅遊勝地，記得要Bookmark記低，下次去福井旅行可以大派用場，挑選出啱心水嘅溫泉鄉。
蘆原温泉：福井縣最大型溫泉鄉
福井縣嘅最大型溫泉「蘆原温泉」位於福井縣蘆原市。「蘆原温泉」係一個被寧靜田園風景環繞，有多間極具風情嘅溫泉旅館林立嘅溫泉街，每年都吸引唔少人去浸個靚溫泉。呢個溫泉起源於1883年，當時進行農業用水供應工程時，發現一個約80度且帶有鹽味嘅溫泉噴出，之後就發展成為溫泉鄉。蘆原温泉區擁有74個源泉，不同溫泉設施皆擁有不同源泉，因此每間旅館都可以享受到唔同泉質嘅溫泉，亦係此溫泉鄉魅力之一。另外，蘆原温泉更係溫泉治療師所推薦嘅名湯百選之一呢。
温泉設施
蘆原温泉嘅魅力之一，就係擁有數量豐富嘅源泉。因此，選擇旅館時，泉質亦可以係其中一種選擇因素呢。除提供住宿嘅旅館，仲有「Saintpia-Awara」等不帶住宿，只提供溫泉嘅設施。另外，部分旅館亦會提供不帶住宿，只跟餐，或含美容護理服務在內嘅當日溫泉套餐。你可以趁機喺唔同旅館或溫泉設施享受到多種唔同泉質嘅溫泉啦！
周邊景點
蘆原温泉周邊嘅旅遊景點和美食都非常豐富。除咗可以喺位於蘆原湯之町廣場、使用總檜木建造嘅「蘆湯」享受免費足湯之外，仲可以喺「湯煙橫丁」品嚐多款如拉麵、關東煮、法式料理等不同種類嘅屋台攤檔美食，大飽口福。另外，喺「傳統藝能館」可以體驗穿著藝妓服飾，搖身一變成為藝妓，仲可以體驗埋日本傳統「座敷」，深深感受藝妓文化。除此之外，亦推薦前往於開湯（開闢）時建立嘅「三座藥師堂」，「藥師三尊」進行參拜，祈願無病消災、延年益壽。
祭典
「蘆原温泉」一年會舉辦3個然祭典活動，分別係4月嘅「蘆原温泉春祭」、8月嘅「蘆原潑湯祭」，以及11月嘅「蘆原燈源鄉」。喺4月嘅春祭中，會有由藝妓表演舞蹈，以及以櫻花裝飾嘅櫻山車、太鼓山車、展示巨大武士人偶山車等三款山車巡遊溫泉街。8月嘅「蘆原潑湯祭」則以將溫泉水潑灑於神轎上為主要活動。11月嘅「蘆原燈源鄉」祭典中展示數之不盡，經精心裝飾嘅竹燈籠，並照亮晚上嘅整個街區，營造出柔和氣氛。
蘆原温泉（蘆原市）
- 地址：福井縣蘆原市溫泉
- 交通：從JR蘆原温泉站乘搭巴士約15分鐘即可抵達「蘆原温泉街」
三國温泉：可盡享東尋坊&海景的溫泉鄉
三國温泉係可以眺望得到以日本海夕陽美景襯托的旅遊名勝「東尋坊」嘅溫泉鄉，擁有「東尋坊溫泉」、「三國温泉第1號泉」、「三國温泉第4號泉」三個泉源。有別於單純溫泉嘅「東尋坊溫泉」，「三國温泉第1號」和「三國温泉4號泉」泉源皆含有氯化物，浸到暖入心，而且有效保濕肌膚。如果想享受溫泉巡禮嘅話，小編建議先從泉源為單純溫泉嘅東尋坊溫泉開始喔。喺度可以置身於露天浴池中邊嘆溫泉，一邊欣賞夕陽美景，一邊舒解日常生活中勞碌疲憊嘅身心。
温泉設施
三國温泉係擁有以3種溫泉源泉為主嘅溫泉街，你可以去「不帶住宿、只入浴」嘅旅館，或「Yourport」（ゆあぽ～と）等提供即日溫泉服務（日帰り温泉）嘅設施，享受溫泉巡禮，咁就可以一次過試勻3款溫泉源泉啦！除咗體驗不同源泉之外，亦可以享受各種各樣嘅浴池喔。
周邊觀光景點
溫泉街周邊有東尋坊等多個觀光景點。到「越前松島水族館」可以透過巧妙嘅展示和互動體驗方式去觀察海洋生物。當中，最值得推薦嘅係可以通過透明地板望到熱帶魚們暢游其中，你可以除鞋進入該範圍，四周望望甚至瞓低，瞬間就好似漂浮於海面上一樣，充滿樂趣。另外，亦推薦你漫步三國湊町嘅懷舊街區，或參觀於1840年改建後保存下來嘅三國神社等等。
三國温泉（坂井市三國町）
- 地址：福井縣坂井市三國町
- 交通：越前鐵路福井站到三國站，或三國港站約50分鐘
三方温泉 KIRARA之湯：以《千與千尋》為靈感而建的天然溫泉
三方温泉 KIRARA之湯（みかた温泉 きららの湯）位於JR三方站徒步範圍內，係一個不帶住宿、只提供即日溫泉服務（日帰り温泉）嘅天然溫泉設施。館內外設計充滿純和風嘅懷舊氣息，設計靈感來自於動畫《千與千尋》中出現嘅「油屋」，玄關口更設有一條紅色橋，令人不自覺地會聯想起《千與千尋》中嘅動畫世界。
館内充滿懷舊氣息。從大堂望上去，會見到開放式嘅天花，以及散佈於各處嘅格子式樣設計，確實令人感受到一股濃厚嘅「油屋」氛圍。
温泉
館內有「縄文之湯」和「虹之湯」兩種不同浴場，男女浴場每週更換一次。喺「縄文之湯」可以享受以繩文時代嘅圓木筏為主題所設計嘅足湯、感受到木材柔和感嘅露天溫泉，以及室內浴場（石風呂）和遠紅外線桑拿。而喺「虹之湯」則可以享受到極具風情嘅露天岩石溫泉、室內浴場、以及和風鹽桑拿。你可以喺多種不同浴池中悠然放鬆、療癒身心。
餐飲
浸完溫泉後可以喺「三方温泉 KIRARA之湯」大嘆美味午餐。餐單上有烏冬、蕎麥麵、親子丼、豬排丼等豐富選擇，而小編推薦嘅係每天更換內容嘅「日替定食」喔。
館內設施、服務
館內提供充足休息區域，包括可免費使用嘅大廳、需額外收費嘅獨立休息室等，享受完溫泉之後都可以悠閒地休息一番。另外，館內有針灸院，讓客人享受更療癒嘅服務。仲有小店有賣當地若狹町特產嘅梅製加工品和零食糖果等，非常適合買返香港做手信喔。
三方温泉 KIRARA之湯（即日溫泉）（みかた温泉 きららの湯、日帰り温泉）
- 地址：福井縣三方上中郡若狹町中央1-6-1
交通：從JR小浜線三方車站步行約10分鐘即可抵達。
- 營業時間：10:00～22:00（最終入館時間 21:30) ※目前於20:00結束營業（最終入館時間為19:30)
- 費用：成人（中學生以上）650日圓、小童（小學生以下）300日圓、嬰幼兒（3歲以下）免費
- 官網：https://www.kiraranoyu.net/
相關文章
Comments