「御誕生寺」係一座位於日本福井縣嘅寺廟，並以多隻寺內自由生活嘅貓咪而廣為人知，更因此被稱為「貓寺」。喺御誕生寺除咗可以參拜和參加坐禪會之外，更加係一眾貓奴們會特意朝聖嘅地方。今次，小編除咗會為大家解說御誕生寺被稱為貓寺嘅原因，仲會介紹多個打卡位等，可謂精彩位滿載。當然，大家去到御誕生寺，準備向可愛貓咪們打招呼之前，記得要先向神明問好喔。（※上方照片拍攝於2015年）
被稱為貓寺嘅「御誕生寺」係何方神聖？
御誕生寺係位於福井縣越前市庄田町嘅曹洞宗禪寺，亦係建立於大本山總持寺嘅創建者「瑩山禪師」誕生之地嘅寺廟。喺寺內隨處可見自由自在地生活嘅貓咪們。被稱為貓寺嘅御誕生寺目前（截至2023年3月）有16隻貓咪居住，全部都係無家可歸、患病或受傷嘅貓咪。御誕生寺每週日都會舉行「星期日坐禪會」，之後更可以喺茶話會上與住持和修行僧一同靜修。
點解御誕生寺會有咁多貓咪呢？
於御誕生寺出現大量貓咪聚集嘅現象始於2002年建造小堂之時。當時住持喺寺內發現紙箱中有四隻被遺棄嘅貓仔開始便成為貓咪大量聚集嘅契機。住持為保護被遺棄紙箱中嘅貓仔，為牠們提供水和食物。其後，貓咪數量逐漸增加，亦有人會特登將貓咪遺棄於此，令寺內貓咪數量持續遞升。去到2012年，貓咪數量更一度達到80多隻。
此時開始進行保護貓隻和尋找領養者等正式活動，至今經已將大約300到400隻貓咪交到溫暖嘅領養家庭中成長。呢項活動忠於對生命嘅慈悲之心，但係只有一顆慈悲之心係無法解決所有問題，例如貓咪醫療費用等問題，而相關經費係靠捐款維持。希望可愛嘅貓咪們可以繼續得到大家嘅守護。
必去影相景點！充滿治癒感嘅美景滿載！
御誕生寺位置優越，到處都有可以拍攝得到貓咪置身於美景和充滿情調氛圍嘅景象。為免影響貓咪休息，記得入寺時要保持安靜喔！途中一定可以搵到扣人心弦嘅美麗場景。到時要準備定金睛火眼，唔好錯過良機啦！
佛像身上出現貓咪踪影，實在罕見！
呢座寺廟嘅本堂前方，有一尊佛像左右膝蓋上有貓咪坐著。呢尊佛像嘅尺寸喺戶外石佛中為北陸地區最大型。右膝上，有一隻望落瞓得好舒服嘅貓咪；而喺左膝上，有一隻正在把玩大佛手臂嘅貓咪，場景令人深深感受到呢座寺廟慈悲為懷之美。
寺院四周為廣闊嘅大自然和稻田，氛圍寧靜和諧。隨著四季變遷更可拍攝出各種不同風景嘅靚相。例如，從春天到夏天期間，呈現清新綠色嘅樹葉，到秋天則變成紅色或橙色，其動人景致猶如染上一片秋色地氈一樣，令人目不暇給。此時再加上貓咪們輕鬆悠閒嘅姿態，簡直就好似一幅色彩繽紛嘅畫作一樣，相當迷人。當被白雪覆蓋時，有貓咪會喺雪上走動，留下一個又一個嘅貓腳印，亦有貓咪會選擇將身體蜷縮成一團，靜靜地眺望雪景。喺充滿季節風情嘅景色中，可以欣賞到各種不同性格嘅貓咪喔。
貓咪&御神籤結緣之地
「招財貓御神籤」呢個位，亦係相當推薦嘅影相景點。皆因除咗會見到貓咪喺御神籤嘅箱上面瞓晏覺之外，仲會遇見走入箱裡面嘅貓咪姿態，相當療癒！呢度經已成為貓咪人氣嘅休息場所！呢個「招財貓御神籤」共有28種小招財貓設計，分為七種顏色，每種招財貓都代表著唔同嘅祈願。究竟會與邊一種招財貓結緣呢？不禁令人超級期待去打開神籤喔！喺綁上御神籤、掛繪馬嘅地方，仲可以見到木雕嘅貓掌裝飾，相當吸睛。
仲有一般繪馬係馬嘅圖案，但呢間寺廟畫嘅係貓咪喔。而御守和御朱印本上亦有貓咪圖案嘅出現，令人有種貓咪能夠促進各種緣分誕生嘅感覺呢！
另外，御神籤、繪馬、御守等收益會用於上述有關醫療和照顧貓咪嘅經費上，因此可當作慈善捐獻嘅回禮。而雖然每樣物件都有標明價格，但可以支付超過標價嘅金額且並無上限，可多多益善喔。
貓咪用餐時間
貓咪食飯嘅時間有時會因應日子而有所不同，但通常係一日兩次，分別係早上8點和下午3點半。貓咪們會齊齊整整地排成一行，享用放喺以雨樋作餐盤嘅貓糧，超級可愛。另外，寺廟已顧慮到貓咪健康因素進行喂食，因此禁止訪客向貓咪餵食零食以預防肥胖問題，保持貓隻健康。為咗貓咪嘅健康著想，千祈唔好餵佢哋，用愛心去代替零食為貓咪們送上滿滿嘅愛啦！
去御誕生寺的交通方式
從JR東京站乘坐新幹線到「金澤」站約2小時50分鐘，再乘坐JR電車到「武生」站約1小時，於「大手」巴士站落車後，步行約6分鐘即可到達。
景點資訊
- 名稱：御誕生寺
- 地址：福井縣越前市庄田町32丁目1-1
- 營業時間：08:00-17:00
- 門票：免費
Comments