福井縣嘅「鯖江」係世界著名嘅眼鏡生產地，喺日本眼鏡框市場佔有率更高達約95%，其中一個受歡迎嘅原因，係因為其高品質和舒適嘅穿戴感。今次，小編將會詳細介紹鯖江產眼鏡嘅魅力、知名度嘅由來，以及 「Made in Sabae」品牌嘅發展歷史。
鯖江眼鏡歷史：從起點到「Made in Sabae」之軌跡
鯖江嘅眼鏡製造始於1905年。當時，被雪覆蓋嘅鯖江，除咗農業之外幾乎沒有其他產業。為咗改善當地生活，増永五左衛門於農閒期間以副業形式著眼於製造眼鏡，並被稱為「日本眼鏡之父」。但由於鯖江缺乏製造眼鏡嘅職人，所以増永五左衛門從大阪和東京聘請眼鏡職人，讓鯖江當地年輕人學習眼鏡製造技術。
隨著時間推移，職人們開始進行分工化，整個城鎮逐漸成為一個眼鏡工廠。及後，隨著高度經濟成長時期到來，鯖江眼鏡產業亦持續成長。通過自動化提高生產效率、改善產品品質和技術開發，於1980年代成功開發全球第一個鈦合金眼鏡框。輕盈、耐用、唔易引起金屬過敏嘅鈦合金眼鏡框受到世界矚目。呢項發明更成為眼鏡框生產地嘅鯖江市提升其國際地位嘅催化劑。
從JR鯖江車站延伸約900米嘅「眼鏡街（Megane Street）」讓人感受到濃濃嘅眼鏡氛圍。街道上充滿各式各樣以眼鏡為主題嘅設計，例如眼鏡造型嘅沙井蓋（俗稱渠蓋）、長椅、裝置擺設等。你可以一邊行，一邊尋找隱藏於四周嘅眼鏡相關裝飾，轉眼間就會抵達「眼鏡博物館」。
鯖江眼鏡高品質&大受好評的原因
鯖江產眼鏡特點在於其耐用性和堅固性。此外，其設計風格融個性與功能性，提供卓越嘅舒適感和配戴感，因此受到高度評價。能夠生產出如此高品質嘅眼鏡，皆因鯖江採取特有嘅生產方式——產地內分工制度。
一般眼鏡嘅生產工序高達200多個，喺鯖江每個工序都由專業嘅職人或工廠負責。然後，通過精密組裝每個工序嘅零件，製作出高精度嘅眼鏡。而對於細節和磨削等較為複雜嘅部分，需要由熟練嘅職人以人手加工處理。因為擁有一班用心製作嘅職人，令鯖江產眼鏡得到高度評價。
福井縣眼鏡博物館「MEGANE MUSEUM」
「MEGANE MUSEUM」係一個可以一次過去哂「眼鏡博物館」、「體驗工房」和「眼鏡店」嘅場所。以下將會詳細介紹每一個區域。
眼鏡博物館
「眼鏡博物館」透過眼鏡製造歷史和技術嘅進化，向大眾傳達眼鏡嘅魅力。博物館除咗有展示海外眼鏡、日本江戶至昭和時代嘅眼鏡演變過程之外，仲有100多年前嘅眼鏡製造現場風景等精彩內容。即使現時機械化程度不斷提升，鯖江職人為追求最佳品質仍堅持承襲手作眼鏡工序，呢種堅持令大眾深深感受得到職人們嘅專業精神和情懷。
體驗工房
喺體驗工房嘅「眼鏡手作教室」可以從眾多選擇中揀選自己心儀嘅框架設計和材料，並學習製作原創眼鏡嘅步驟，仲會有專業嘅眼鏡職人耐心為你指導喔。而最後加工和需要特殊技巧嘅工序則交由熟練職人完成，眼鏡大約會於一個月後送達。體驗所需時間為5至7小時，費用為24,200日圓（含稅）。而「眼鏡de Collage」體驗，係可以使用眼鏡材料進行掛飾製作體驗，體驗所需時間為約1小時，費用為 2,000日圓（含稅）。
眼鏡商店
「眼鏡Shop」裡擺滿由福井縣內約50間製造商生產、超過3,000副最新款式嘅眼鏡。「Made in Sabae」嘅眼鏡款式多到令人花多眼亂喔！所有眼鏡框都承襲擁有110多年歷史，並加以進化而成現今嘅優秀職人技術。每一個眼鏡框都充分展現出職人匠心嘅魅力。店內仲會有認證眼鏡師，為你提供有關高質日本製鏡片嘅建議，亦可以選擇訂製由鯖江職人親手打造，獨一無二嘅訂製眼鏡喔。
咖啡店＆精選商品
你可以喺併設嘅「MUSEUM CAFE」內品嚐自家烘焙咖啡，以及從鯖江市內嘅西餅店所製作每週更換不同款式嘅甜品喔。另外，喺「Sabae Sweets」店內，除咗可以購買鯖江市內名產以及精選甜品，仲可以買到眼鏡繩、飾品等，應用了鯖江眼鏡加工技術嘅商品。
景點資訊
名稱：MEGANE MUSEUM
- 地址：福井縣鯖江市新橫江2-3-4 眼鏡會館
- 交通：JR鯖江站徒歩約10分鐘
- 營業時間：
- 眼鏡SHOP：10:00～19:00
- 體驗工房/眼鏡博物館/SabaeSweets : 10:00～17:00
- MUSEUM CAFE：10:00～16:00
- 休息日：毎週三、日本年末年始假期
- 入館費用：入場免費
Comments