揀手信向來都係日本旅遊嘅樂趣之一，但大家可能會因為唔知點揀好，而感到非常煩惱。
有見及此，小編今次撰寫繼京都篇後嘅手信推介文章，整理出可以喺羽田機場買到嘅精選甜品和零食，為大家進行詳盡介紹。記得要Bookmark定呢篇2023年最新版嘅東京手信介紹文，為你下個日本之旅做定功課啦！
※文中所提及商品及其價格(含稅)皆為2023年2月採訪時內容。因可能會出現變動，有關詳情請於各店家官方網站確認。
從羽田機場去「羽田機場花園 (Haneda Airport Garden)」掃獨特日本特產手信
如果想喺機場買手信，尤其係羽田機場嘅話，就千祈唔好錯過直通第三航廈嘅大型複合設施「羽田機場花園 (Haneda Airport Garden)」！
從2樓抵達大廳步行僅需1分鐘。於2023年1月全面開幕嘅羽田機場花園除咗零售店舖之外，仲有酒店、天然溫泉、巴士總站等多種配套，係東京嘅新旅遊熱點。唔單止適合一日遊，亦令旅客可以更充分利用等待航班或轉機嘅時間去享受美食和購物樂趣。
賣手信、特產嘅店舖大部分集中喺2樓嘅「日本長廊 (Japan Promenade)」和「羽田參道」等購物區，除咗有羽田機場限定商品之外，仲可以買得到來自全國各地嘅特產。以下落嚟，小編會分享去羽田機場花園採訪時精選嘅5款必買食品手信，大家記得記低啦。
羽田機場必買手信推薦2023①：米粉磅蛋糕（山古志本舖）
「米粉磅蛋糕」（各種、 2,000日圓）
首先介紹「山古志本舖」嘅招牌商品，使用新潟縣長岡市山古志地區嘅「種苧原米」所製作嘅「米粉磅蛋糕」。呢種米粉係以富含礦物質嘅雪山泉水灌溉種植，特徵係擁有濃郁甜味和具黏性。由於米粉本身已經擁有天然甜味，所以即使製作時無添加任何砂糖，食落都會感覺到淡淡甜味於口中擴散，再加上柔軟彈牙嘅口感，令人忍唔住咬完一啖又一啖，唔經唔覺就食晒成成個蛋糕，真係好味到停唔到口喔！仲有米糠、酒粕、綠茶、朱古力等各種口味，非常適合用嚟做3點3下午茶時間嘅小點心喔。
除咗招牌嘅磅蛋糕之外，仲有以「種苧原米」為原料製作嘅味噌、米餅、甘酒，以及由職人手工釀製嘅山古志本舖獨家日本酒。
山古志本舖
- 地點：羽田機場花園2F（羽田參道內）
羽田機場必買手信推薦2023②：白蝦撰（Sasara屋）
「白蝦煎餅Premium 白蝦撰」（6片裝：432日圓、10片裝：594日圓、18片裝：1,188日圓等）
位於北陸地區嘅富山縣係一個擁有優質水源和食材嘅縣市。當中，富山灣更加係全球唯一可以捕撈被稱為「富山灣寶石」白蝦之地而廣為人知。呢款「白蝦煎餅Premium」正正係使用富山「幻之食材」所製作。
薄脆煎餅嘅用料係使用100％富山縣產大米「Tentakaku」所製作，搭配上味道相當搶鏡嘅主角白蝦，食落就好似白蝦們喺小編口中旋轉躍動，繼而瀰漫著迷人香氣。鹹香味十足嘅調味與酥脆口感，風味絕佳！
外盒使用日本特有嘅和紙材質，加上可以選擇不同數量嘅款式，咁就可以按人頭計算購買所需數量，非常適合送畀同事和親戚好友喔。
Sasara屋（ささら屋）
- 地點：羽田機場花園2F（羽田參道內）
羽田機場必買手信推薦2023③抹茶菓菓（日本茶Kimikura）
「抹茶菓菓」：抹茶達克瓦茲蛋糕（Dacquoise）x 5 ＆ 抹茶奶油夾心餅 x 5個（2,480日圓）
講到日本旅行嘅經典手信，又點可以唔提抹茶點心呢！日本茶專門店「日本茶Kimikura」總店設於日本最大嘅茶葉產地——靜岡縣。除咗有賣使用自家製抹茶所製作嘅美味烘焙糕點之外，仲可以喺度搵到全國各地嘅高級茶葉。另外，店內亦有賣相當講究嘅茶具、藝術家創作嘅抹茶碗等物品。
如果你對於選購手信方面無咩頭緒嘅話，小編建議可以選擇放有2款經典西式糕點禮盒「抹茶菓菓」（抹茶菓々）。當中，抹茶達克瓦茲蛋糕（Dacquoise）以「外脆內軟」嘅口感聞名，抹茶奶油夾心餅則以濃郁抹茶奶油搭配香甜莓乾組合而成，令人陶醉嘅好滋味而廣為人知。無論係邊款糕點，都係抹茶愛好者必試佳品。
另外，併設嘅咖啡店區域亦有提供以嚴選茶葉製作嘅「抹茶鮮奶咖啡（650日圓）」，可以外賣拎走慢慢嘆。據聞呢款人氣飲品，喺週末期間一日就賣出200杯以上，魅力相當驚人。大家喺揀選手信嘅同時，不妨買返杯獎勵一下自己啦。
日本茶Kimikura（日本茶きみくら）
- 地點：羽田機場花園2F（日本長廊內）
羽田機場必買手信推薦2023④：福藏（Kuradukuri本舖）
「福藏」（３個裝600日圓、6個裝1,400日圓、 9個裝2,000日圓等）
羽田機場花園開幕時，當中有幾間名店係於東京開設嘅首家分店，當中尤其值得關注嘅係於1887年成立嘅「Kuradukuri本舖」（くらづくり本舖）。
呢間和菓子老店位於埼玉縣川越市，當中歷久不衰嘅長青商品「福藏」發售超過40年，每年銷售超過350萬個！羽田機場限定版本係絕不可錯過嘅手信之一！福藏係一款使用100％十勝紅豆所製成嘅餡料，搭配即搓即包嘅麻糬塊，再用香脆嘅日式餅殼「最中」包裹而成，咬落脆中帶軟，令人回味無窮。
呢款日式點心「最中」可以享受到紅豆、麻糬、大米等各種風味組合而成嘅好滋味，而且3個裝嘅售價僅為600日圓，真係好抵買啊。
另外，隨著羽田機場分店嘅開幕，更推出羽田機場限定版本。其包裝印有象徵川越市嘅藏造老街圖案，設計極具古典風情。
Kuradukuri本舖（くらづくり本舖）
- 地點：羽田機場花園2F（日本長廊內）
羽田機場必買手信推薦2023⑤：東博杏仁朱古力（TOBI・BITO SWEETS TOKYO）
東博杏仁朱古力（咖啡味、抹茶味、意大利芝士蛋糕「Tiramisu」味、2,160日圓）
如果想尋找東京特有嘅手信，以下使用印有日本畫嘅包裝、經「東京國立博物館」認證嘅商品，就絕不可錯過。
可以喺全國首次開設店舖嘅「TOBI・BITO SWEETS TOKYO」，購買得到。
寫上「東京國立博物館」字樣嘅銷售攤位上，會見到一排排與該博物館合作推出嘅和菓子、明信片等商品。印有浮世繪圖案嘅蝦煎餅、以富士山三十六景作主題設計嘅羊羹等，咁華麗嘅設計真係令人樣樣都好想帶返香港喔。另外，店內有一面牆放滿「Hi-Chew」和「KitKat」朱克力等商品，相當吸睛！小編推薦可以喺度大買特買！
（左）蝦芝士夾心餅（富士山三十六景、1,080日圓）
（右）東博 明信片（各種165日圓）
以上商品將「可欣賞的藝術」和「作為品嚐或送禮的藝術」融為一體，100%充滿日本風格。由於該商品只可以喺羽田機場購買得到，更增添「獨特」色彩。
TOBI・BITO SWEETS TOKYO
- 地點：羽田機場花園 2F
睇完小編所介紹嘅呢5款手信&商店精選之後，唔知你又有無搵到心儀手信呢？以上介紹只係「羽田機場花園」入面嘅冰山一角。如果你有機會去羽田機場嘅話，不妨去「羽田機場花園」行個圈啦！
羽田機場花園 (Haneda Airport Garden)（羽田エアポートガーデン）
- 地址：東京都大田區羽田機場2-7-1
- 營業時間：
- 【購物、服務】08:00～21:00
- 【餐廳・Café】08:00～23:00
※部分店鋪營業時間會有所不同。
※營業時間可能會有所變動。最新信息請查閱官方網站。 - 交通：從京濱急行、東京Monorail「羽田機場第三航廈」站可直達。
- 官方網站： https://www.shopping-sumitomo-rd.com/haneda/shopping/
相關文章
Comments