滋賀縣除咗擁有日本面積最大古代湖（持續超過100萬年歷史的湖泊）嘅「琵琶湖」之外，仲有多個既可愛又時尚嘅人氣打卡景點。而家就即刻跟住小編，出發去一趟尋找滋賀縣吸睛景點之旅吧。
Biwako Valley：有多個可飽覽天空絕景嘅景點！
從琵琶湖畔海拔1108米嘅打見山，到海拔174米嘅蓬萊山，都係「Biwako Valley」所佔範圍。兩個山頂上各有可以俯瞰琵琶湖美景嘅琵琶湖觀景台「The Biwako Terrace」，可以乘搭以全面透明玻璃設計嘅纜車上山，一邊移動一邊欣賞美景。
位於打見山山頂，廣闊嘅觀景台區域「The Main」內，有一個採用3段式構造嘅寬敞木板露台，並搭配著具透明感嘅藍色水池觀景台「Grand Terrace」。琵琶湖根據唔同地方，風景亦會隨之變化，可以按照個人不同構思，去拍攝出各種打卡靚相，亦係考驗攝影師實力嘅好地方。
「The Main」另一個觀景台「North Terrace」設有收費席「Infinity Lounge」，可以喺梳化和椅子上優雅地放鬆休息，眺望與水池成一體化嘅琵琶湖，以及腳下廣闊嘅絕美山稜線。
「The Main」有咖啡店和餐廳，可以喺充滿藝術感嘅吧檯嘆返杯吸睛雞尾酒。
如果要去另一座山，即蓬萊山山頂嘅「Café 360」區域嘅話，可以選擇徒步行約30分鐘，邊欣賞雄偉景色邊行走；亦可以選擇乘坐吊椅，享受約20分鐘嘅空中散步。而且，喺木板露台除咗可以欣賞到眼前一片廣闊嘅琵琶湖，仲可以欣賞得到360度全景嘅群山風景，非常雄偉。晴天時，可以喺可遮光、以貝殻型設計嘅梳化上悠閒地眺望美景。3個觀景台都可以欣賞到各具不同規模感嘅絕景。
Biwako Valley
- 地址：Map
- 交通：從JR志賀站乘搭巴士約10分鐘
- 官網：https://www.biwako-valley.com/tw/
琵琶湖箱館山：猶如珠寶箱一樣色彩繽紛嘅景點
「琵琶湖箱館山」在冬天作為滑雪場相當熱鬧。於綠油油嘅季節會化身成一個五彩繽紛嘅吸睛打卡景點。首先，小編要推薦嘅係位於「看得見琵琶湖之山丘」（びわ湖のみえる丘）嘅「風鈴蘆葦小徑」（風鈴のよし小道）。喺用蘆葦做成嘅小徑上，裝飾著882個五彩繽紛嘅風鈴，演奏出既凉快又動聽嘅樂章，係一條令人感到非常療癒嘅小徑。
穿過小徑隧道泉，就會見到夢幻嘅「彩虹窗簾」（虹のカーテン）。利用擁有200多年歷史嘅傳統織物「高島縮」呈現色彩繽紛嘅窗簾隨風飄揚嘅美景，簡直就好似置身於夢幻世界一樣。兩者皆以彩虹配色排列，整體上呈現出彩虹姿態。穿過彩虹窗簾，琵琶湖和湖畔風景等壯闊美景便呈現眼前。
夏天和秋天嘅花田各具不同姿態。當中，最不可錯過嘅係秋天。皆因只要一到秋天，掃帚草就會被染成一片紅，景色相當優美。根據不同季節花田上會有各種花卉盛開。
而咖啡店方面，餐單有多款美食任君挑選。小編最推薦嘅係「芭菲專門店LAMP」嘅巴菲，因為可以品嚐得到放入煤油燈裝飾器皿並閃閃發光嘅芭菲喔。當然，唔單止夠晒吸睛，仲非常好味道。店內亦掛有燈飾，環境相當浪漫。
除此之外，仲有面向天空搖擺嘅天空韆鞦、4個展望台等，有多個不可錯過嘅打卡位。簡直係一個猶如珠寶盒一樣嘅公園喔。
琵琶湖箱館山
- 地址：Map
- 交通：從JR近江今津站乘坐巴士約20分鐘
- 官網：https://www.hakodateyama.com/green/
英式花園ROSA & BERRY多和田：被玫瑰&當季花卉包圍的英國庭園
「英式花園ROSA & BERRY多和田」位於山中被豐富大自然環境包圍，擁有13公頃廣闊土地。進入園內瞬間，簡直就好似去咗英國一樣。喺呢個英國式庭園入面，種植約有400種，1000棵以上嘅玫瑰、一年四季都可以欣賞得到色彩繽紛嘅當季花卉，並與樹木和建築物相映照，景色相當夢幻。可以喺度一邊影相，一邊享受被大自然療癒。
喺擁有美麗景觀嘅山丘上，除咗有一個「親親羊牧場」（羊のふれあい牧場），可以近距離接觸放牧中嘅羊咩咩們，仲有「與妖精一起生活的村莊 妖精花園」（妖精と暮らす村 フェアリーガーデン），相當過癮。喺「Waku Waku農場」（わくわくファーム）可以見到原產於瑞士，頭黑黑身體白白好似成隻公仔咁嘅的「瓦萊黑鼻羊」（Valais Blacknose sheep），更被稱為世界上最可愛嘅羊羊添。
推薦乘搭位於園內，全長約1公里嘅ROSA鐵路SL「Milky Way」，可以一邊眺望美麗景色，一邊享受列車之旅。每年5月中至6月初都會出現「玫瑰隧道」（バラのトンネル），SL會於隧道下緩慢行駛，係影靚相嘅好時機。2023年春天開幕嘅「TEA PASTRIES」和位於中庭嘅咖啡店亦係一個絕佳嘅影相位，仲可以品嚐到有成200年歷史，英國湖水地區嘅英國紅茶和烘焙食品，更設置一架倫敦巴士，令大家可以感受到古老而美好嘅英國氛圍。
英式花園ROSA & BERRY多和田
- 地址：Map
- 交通：從JR米原站乘坐巴士約30分鐘
- 官網：https://www.rb-tawada.com/
紅杉樹林蔭大道：被四季美景所包圍
貫穿高島市「Makino農業公園Makino Pic Land」嘅縣道上，並列著約2.4公里長嘅紅杉樹林蔭大道。從春天到夏天會逐漸變綠，秋天可以欣賞到染成紅色一片嘅林蔭大道。去到冬天，樹木落葉後，裸樹的粗樹幹上長出纖細樹枝嘅姿態，呈現出仿如藝術品一樣，別有一番風味。而樹枝披著雪嘅模樣，就好似貴婦一樣。每個季節都會被不同美麗所包圍，盡享浪漫氛圍。
紅杉樹林蔭大道
- 地址：Map
- 交通：從JR Makino站乘坐巴士到「Makino Pic Land」巴士站，需時約10到20分鐘
MIHO MUSEUM：從夢幻景致走向藝術世界
收藏來自古埃及、希臘、羅馬、西亞、中國、日本等多個地區，約3000件收藏品嘅「MIHO MUSEUM」。從接待大樓前往美術館大樓嘅通道，係以中國詩人陶淵明嘅「桃花源記」中描繪嘅理想之鄉「桃源鄉」為設計主題。通往美術館大樓時經過嘅枝垂櫻林蔭大道、隧道、吊橋等路上有著相當夢幻嘅氛圍。
MIHO MUSEUM
- 地址：Map
- 交通：從JR石山站乘坐巴士到MIHO MUSEUM巴士站約50分鐘
Comments