東京嘅淺草地區，唔單止有日式料理和西式料理店，仲有唔少甜品和鹹味小食等，可以邊漫步邊享受嘅美食，絕對稱得上係一個美食寶庫！
本篇文章除咗會為大家介紹近期人氣嘅「掃街」美食精選，仲有超過70年受當地居民和名人們愛戴嘅喫茶店（日式咖啡店）。下次嚟東京覓食時，記得要參考一下本篇文章再出發啦！
淺草寺、雷門、仲見世通觀光同時享受美食！淺草「掃街」美食推薦
當你穿著浴衣或和服去淺草觀光嘅話，點少得「一路行一路食」！
當中，經典甜品系列有可麗餅和色彩繽紛嘅糰子，而咸味系列小食則有熱騰騰嘅煎餅和炸肉餅等選擇。
今次，小編揀選出好幾款特別適合著住浴衣或和服觀光時，絕對要「相機食先」，放上社交媒體可以「呃Like」嘅吸睛街頭美食！
「淺草花月堂」的巨型蜜瓜包 – 引起各大媒體嘅轟動！淺草美食中嘅經典之王
淺草花月堂嘅巨型蜜瓜包，有著比手掌大嘅巨大尺寸，加上外層酥脆內裡鬆軟嘅口感，係不可錯過嘅街頭美食之一。另外，淺草花月堂知名度極高，經常出現喺淺草特輯等電視節目中，而其標誌性商品巨型蜜瓜包，已經成為淺草名物之一，每日更賣出3,000個呢。
除此之外，夾上雲呢拿、抹茶雪糕嘅蜜瓜包，非常適合夏天享用！該店位於淺草寺左面，西參道入口，即使係平日都會大排長龍。
淺草花月堂總店嘅所在地西參道，係人氣嘅打卡勝地。建議可以著住和服或浴衣，並以參道上紅白色風車圖案牆壁為背景，盡情自拍大影特影！
另外，西參道上仲有最近人氣嘅淺草製作所「天婦羅脆片」、蕨餅飲品店、日本祭典上常見嘅撈金魚和射擊等一年中都可以玩嘅攤位遊戲店舖，相當過癮。
無論係想影打卡靚相、嘆美食、定係體驗活動，想充分享受淺草嘅話，就一定要去呢度行個圈喔！
- 淺草花月堂本店
- 地址：東京都台東區淺草2-7-13
- 定息日：無
- 營業時間：【平日】11:00〜巨型蜜瓜包售完即止，【公眾假日】10:00〜巨型蜜瓜包售完即止
- 交通方式：從銀座線、都營淺草線淺草站1號出口步行10分鐘，從筑波快線淺草站A1號出口步行3分鐘
「淺草莓座」的士多啤梨大福＆士多啤梨冰沙 - 使用宮城産美味士多啤梨，品嚐奢華好滋味！
講到日本水果嘅美味代表，士多啤梨就一定榜上有名。淺草莓座嘅特色係使用宮城自家農園收穫嘅「甘熟」士多啤梨所製成嘅士多啤梨大福。呢款大粒士多啤梨一般流通於用作送禮市場，用其製成嘅和式甜品望落就好似士多啤梨坐咗喺皇帝椅上咁，畫面衝擊力十足，相當吸睛！
傳統嘅士多啤梨大福，通常係將士多啤梨包裹喺糯米糍裡面，但呢款甜品完全係以士多啤梨為主角。除咗普通嘅豆沙餡之外，仲有朱古力、覆盆子、開心果餡等不同口味，建議可以品嚐各種口味，去比較一番喔。
如果口渴嘅話，推薦以冷凍後將美味凝結濃縮於一身嘅士多啤梨同牛奶製作而成——味道濃郁嘅士多啤梨沙冰喔。另外，店外可以望到東京晴空塔，不妨喺度以晴空塔為背景，影返相打卡靚相！
- 淺草莓座
- 地址：東京都台東區淺草2丁目1-3
- 定休日：不定休（如有臨時休業，將會於社交媒體公告）
- 營業時間：11:00〜18:00
- 交通路線：從都營地下鐵淺草線、東京Metro銀座線1號出口步行2分鐘，從筑波快線淺草站步行6分鐘
淺草仲見世通和傳法院通周邊嘅商店街，原來係「禁止邊行邊食」？
喺淺草正確嘅飲食禮儀係？
介紹完有關淺草嘅邊行邊食美食之後，要同大家分享一個重要資訊！就係現時，淺草仲見世通及其周邊商店街，實施「禁止於街道上邊行走邊飲食」措施。
為咗遵守呢項措施，唔少店舖提供店內用餐區，而喺仲見世通等空間較小嘅店舖，則設置立食區或於店外設置特定用餐區。
如果你喺淺草購買可手拎嘅輕食或甜品嘅話，請務必遵守當地嘅飲食禮儀喔！
位於淺草70年！「純喫茶Mountain」的絕品拿坡里意粉&忌廉梳打
位於淺草雷門通嘅「純喫茶Mountain」係一間老字號喫茶店（日式咖啡店），現由第三代女店主經營，已經擁有約70年歷史，係淺草極具代表性嘅名店之一。
店內到處都貼滿名人嘅簽名和相、各種和洋式風格嘅小物裝飾，營造出復古且舒適嘅氛圍。
呢間喫茶店最吸引人嘅地方，當然係擁有豐富日本特色嘅餐單。
喫茶店美食嘅代表——拿坡里意粉（將洋蔥、青椒、煙肉等配料炒熟，加上利用蕃茄醬製成嘅醬汁，與意粉攪拌混合而成嘅美食），唔單止配料豐富，麵條口感仲非常彈牙，相當好味道。另外，仲可以品嚐到御好燒、文字燒、日式炒麵等多款日本料理。
甜品和飲品類亦相當受歡迎喔！當中，充滿氣泡爽快感嘅炭酸飲品，搭配上份量十足嘅軟雪糕忌廉梳打，好味到令人回味無窮！
另外仲有超大份量嘅布甸、使用自家製餡料製作嘅忌廉餡蜜等，多款人氣甜品任君挑選。如果去淺草旅遊嘅話，記得要親身去品嚐一番啦。
- 純喫茶Mountain
- 地址：東京都台東區淺草1丁目8-2
- 定休日：第1週和第2週嘅星期一
- 營業時間：【平日】11:30～20:00,【週六、週日及公眾假日】11:30～21:00
- 交通：從淺草站步行5分鐘
Comments