【免費日本旅行贈獎活動】與FUN! JAPAN會員同遊日本之旅Vol.1～溫泉街 熱海～

非常感謝各位平日對FUN! JAPAN嘅支持，除咗會睇文章之外，仲會留言畀我哋，萬分感激！我哋除咗會致力報導日本相關資訊，亦希望與FUN! JAPAN會員進行雙向交流。有見及此，FUN! JAPAN會定期舉辦「免費日本旅行贈獎活動」（Visit Japan Campaign，簡稱VJC），係一項邀請會員免費去日本旅行，並與FUN! JAPAN 工作人員同遊日本嘅活動。

本篇文章，會為大家介紹時隔大約3年，於2023年2月再次舉辦嘅「免費日本旅行贈獎活動」（VJC）嘅相關內容。另外，由於日後都會定期舉辦VJC，記得要期待兼唔好錯過下一次嘅舉辦啦！

VJC旅行嘅參加者們

由於疫情影響下，從2020年起中止舉辦嘅VJC，因日本於2022年秋天解除入境相關限制措施，時隔3年嘅VJC又再重新開始！今次共有5位FUN! JAPAN會員參加呢次舉辦嘅4日3夜行程。

圖片左起：Nurul（印尼）、Wen Nee（馬來西亞）、Momoko（台灣）、Fung（香港）、Sombat（泰國）

除咗上述FUN! JAPAN會員，另外仲有2位FUN! JAPAN嘅日藉員工，以及1位中文翻譯導遊參與。雖然國藉和語言都唔一樣，但大家都有一個共通點，就係喜愛日本。相信呢一趟旅程，一定會好開心喔！

旅行嘅主題係「再發掘日本」

今次嘅行程，係由FUN! JAPAN與日本大型旅行社JTB共同製作，揀選出以下3個地方，作為旅遊嘅目的地。

1. 靜岡縣熱海
2. 東京都澀谷
3. 東京都淺草

除咗有可以感受日本傳統和歷史嘅古老街道、寺廟等地方，亦會去近幾年誕生嘅最新澀谷景點朝聖，無論係第一次去日本，定係曾經到訪過日本嘅VJC參加者，都可以盡情享受今趟旅程。

前往溫泉之街——熱海！

第一日，先去東京品川嘅酒店放鬆身心，療癒乘搭飛機過後嘅疲勞。從第2日開始正式嘅觀光之旅，目的地係以溫泉而廣為人知嘅靜岡縣熱海市。喺前往熱海嘅包租巴士入面，初次見面嘅VJC參加者們各自進行自我介紹。當中，來自香港、好鍾意講笑話嘅Fung先生，更令現場氣氛變得十分高漲！

熱海係一個咩地方？

熱海係位於靜岡縣東部、面向相模灣嘅市鎮，以溫泉和美麗景觀而聞名。直至1990年左右為止，作為度假村吸引大批遊客到訪，但及後隨著日本經濟低迷，遊客亦相繼銳減。不過，近年由於熱海再生項目嘅啟動，全新嘅觀光設施、飲食店、酒店相繼誕生，作為旅遊景點其人氣亦再次高漲。有人將呢個復活過程稱為「熱海之奇跡」。從東京揸車出發約1個半小時，坐新幹線約35分鐘即可抵達，交通方便，非常適合從東京出發一日遊喔。

靜岡縣熱海市

喺飽覽海景嘅餐廳享用午餐

首先嘆個午餐去出發去熱海閒逛。今次，我哋喺可以眺望廣闊相模灣嘅海景餐廳「HARBOR’S W」，品嚐以當地食材製作嘅料理。食飯時，來自馬來西亞、識講5種語言嘅Wen Nee，成為我哋溝通橋樑嘅主力人員。要喺度再次講聲，唔該唒！

HARBOR’S W

• 地址：靜岡縣熱海市和田濱南町10-1
• 營業時間：11:00~23:30
• 交通：從熱海站乘坐的士，或開往ATAMI BAY RESORT KORAKUEN嘅接駁巴士，需時為10分鐘
• 官網(日文)：https://atamibayresort.com/izuichi/harbors/
  

去熱海人氣甜品店

食完午餐，決定去「熱海布甸」嘆個飯後甜品。店面唔單止有復古感，甜品樽身設計仲非常可愛，更成為社交媒體上嘅人氣熱話，亦係現時熱海大受歡迎嘅甜品店喔。即使係平日都排晒長龍。

布甸口感順滑，除咗原味之外，仲有抹茶味和士多啤梨味。印尼會員Nurul選擇原味，仲話 「非常好味道！」。

熱海布甸

• 地址：靜岡縣熱海市田原本町3-14
• 營業時間：10:00~18:00
• 交通：從熱海站徒步3分鐘
• 官網(日文)：http://atami-purin.com/
  

明明係2月，櫻花卻幾乎滿開！

2月初，櫻花卻已經滿開！「熱海櫻」嘅特徵，係比一般日本常見嘅「染井吉野櫻」早開花。 VJC參加者們完全無諗過可以喺呢個時期，欣賞到櫻花，因為意外驚喜而感到非常興奮！亦有人特登第二日早啲起身，享受一邊散步一邊賞花嘅樂趣。

熱海2月嘅平均最高氣溫為11度。為咗暖一暖喺街頭散完步嘅寒冷身軀，而去咗間叫做「MARUYA Terrace」嘅咖啡店，並揀咗款使用靜岡縣伊豆地區生產嘅茶葉「GURI茶」（ぐり茶）所沖泡嘅綠茶飲用。

MARUYA Terrace

• 地址：靜岡縣熱海市銀座町7-8
• 營業時間：12:00～20:00 星期二為定休日
• 交通：從熱海站徒步12分鐘
• 官網(日文)：https://guesthouse-maruya.jp/cafe-bar/
  

去行活力十足嘅商業街

喺熱海站附近嘅「熱海 平和通商店街」閒逛。熱海面向大海，而特產就梗係魚嘅乾製品啦！商店街上有賣竹莢魚、鰹魚、鯛魚等各種魚乾。

傍晚入住客房數目為熱海最多嘅「熱海新富士屋酒店」。大家一邊嘆自助餐晚餐，一邊分享有咩日本想去嘅地方，場面非常熱鬧。據聞泰國會員Sombat喺呢趟旅行結束後，會去栃木縣日光旅行，日籍員工仲溫馨提示Sombat「喺日光要注意野生馬騮出沒喔」。

晚飯過後，返去酒店浸溫泉，欣賞熱海夜景，悠閒地度過一個好時光。

熱海新富士屋酒店

• 地址：靜岡縣熱海市銀座町1-16
• 交通：從熱海站徒步15分鐘，或乘坐免費接駁巴士、的士約5分鐘
• 官網(日文)：https://www.itoenhotel.com/atami_newfujiyahotel/
  

相關文章:

• 【免費日本旅行贈獎活動】與FUN! JAPAN會員同遊日本之旅Vol. 2～節分＆澀谷～
• 【免費日本旅行贈獎活動】與FUN! JAPAN會員同遊日本之旅Vol. 3～淺草～