位於日本本州中央地區嘅區域，被稱為「中部」地區。喺中部嘅石川縣同福井縣，擁有鄰接日本海嘅優勢，唔單止可以欣賞無敵海景，亦可以品嚐各種海鮮美食。另外被群山包圍嘅岐阜縣，擁有充滿原始感嘅鄉郊風景、靚到令人忘記呼吸嘅世界遺產白川鄉等精彩位，值得大家仔細欣賞，好好遊覽一番。
日本國家旅遊局所推動嘅「新日本 心體驗」行程，挑選出日本全國各地嘅旅遊推薦路線，令遊客可以感受重遊日本嘅樂趣。今次會介紹可以一次過玩哂石川、福井、岐阜縣嘅5日4夜推薦行程。金澤嘅歷史同傳統工藝、福井嘅自然絕景同溫泉、岐阜嘅文化同特色美食……由呢三個縣交織形而成嘅獨特魅力，相信一定會深深吸引每一位遊客。如果您仲未嚟過中部地區，或者想喺重遊之際探索更多新玩法，就一定要參考今次介紹嘅推薦行程啦！
「中部」地區推薦路線
Day 1 | 東京站或大阪站⇒金澤站⇒住宿金澤站周邊酒店 |
Day 2 | 金澤站⇒作田金銀製箔總店⇒近江町市場⇒金澤KIRARA&人力車體驗 |
Day 3 | 金澤站⇒白川鄉巴士一日遊⇒住宿金澤站周邊酒店 |
Day 4 | 金澤站⇒石川縣金澤武士以及町民文化體驗⇒金澤站⇒蘆原溫泉站⇒東尋坊&遊覽船⇒湯煙橫丁晚餐⇒住宿蘆原溫泉周邊酒店 |
Day 5 | 蘆原湯之町站⇒福井站⇒恐龍博物館&發掘化石體驗⇒永平寺座禪體驗⇒住宿蘆原溫泉周邊酒店 |
走進被白雪覆蓋的冬日夢幻世界
https://www.japan.travel/hk/hk/japan-activities/chubu/itineraries-6/
新日本 心體驗
https://www.japan.travel/hk/hk/japan-activities/
作田金銀製箔總店：璀璨輝煌嘅貼金箔體驗
嚟到金澤，可以見到金箔護手霜、貼住成塊金箔嘅雪糕等，多款使用金箔製造嘅產品。其實，金澤由文祿年間（1592～1596年）就開始製造金箔。直至今時今日，金澤嘅金箔產量更占日本99%以上，係名副其實嘅金箔著名產地！
經過重重工序加工而成嘅金箔每片只有0.02克重，而厚度更只有1萬分之1毫米，每一片都稱得上係巧奪天工嘅藝術品。嚟到「作田金銀製箔總店」，大家除咗可以購買各種金箔產品，仲可以進行貼金箔體驗。先喺鏡、盒或者碟等選項入面揀出您心儀嘅一款，再喺貼紙上畫上您鐘意嘅圖案，用𠝹刀小心𠝹出圖案，再將金箔貼喺物件上就完成喇！從唔同角度欣賞成品都都閃爍著金光，閃令令咁非常耀眼奪目。想要獨一無二嘅金澤紀念品，就一定要嚟呢到喇！
作田金銀製箔總店
- 地址：石川縣金澤市東山1-3-27
- 交通：從金澤站搭北陸鐵道巴士或JR巴士，喺「橋場町」落車行約5分鐘
近江町市場：品嚐鮮甜美味海鮮美食
位於金澤站徒步約15分鐘位置嘅「近江町市場」，擁有超過300年嘅歷史，唔止係代表金澤嘅觀光景點，更係金澤市民日常購買食材同開餐嘅「市民廚房」。市場入面有約170間店舖，販賣新鮮嘅海產品、當地嘅蔬果同加工食品等等，種類多到令人目不暇給。當中最受遊客歡迎嘅，絕對就係可以即開即食、鮮度滿分嘅海鮮。整齊排放喺舖頭前面嘅蟹同帆立貝等等，淨係用對眼睇已經令人流哂口水！
另外，市場入面都有唔少提供壽司或者係海鮮丼嘅餐廳，午餐時間嚟到，可以揀返間坐低慢慢嘆。如果喺冬天嚟到嘅話，千祈唔好錯過喺日本海捕獲嘅冬季限定雪蟹！雄性雪蟹「加能蟹」係喺石川縣內捕獲嘅特別品種，唔單止肉質緊實、味道纖細，蟹香仲會令人一食難忘。而同品種嘅雌蟹「香箱蟹」，蟹身雖然細細但就有住飽滿嘅蟹肉，一打開仲有超多蟹黃𠻹！由於捕獲期短，每年只有11月初至12月底呢短短幾十日可以食得到，如果撞啱日子嚟到嘅話記得唔好錯過！
近江町市場
- 地址：石川縣金澤市上近江町50
- 交通：從金澤站行15分鐘
金澤KIRARA：著和服搭人力車，穿梭東茶屋街
東茶屋街一帶保留著江戶時代（1603～1868年）嘅建築風格同懷舊氣息，係金澤一個好吸引嘅旅遊景點。想要完美融入呢條老街嘅氛圍當中，可以考慮先換上一身傳統和服服飾。「金澤KIRARA」有提供多款唔同嘅和服，大家可以根據當日嘅心情同喜好嚟挑選。今次我試著嘅和服係屬於「懷舊」款式，成熟中帶幾分可愛感覺！
想玩得更投入，推薦您試吓搭人力車。拉人力車嘅車夫會充當起導遊嘅角色，為大家介紹東茶屋街嘅歷史同不為人知嘅小故事。好似係建築物嘅「格子窗」設計，唔單止美觀，原來仲有防犯同保護隱私嘅作用㗎！一邊坐人力車一邊聽車夫嘅講解，再慢慢遊覽影相，相信會有另一番唔同嘅印象！
金澤KIRARA
- 地址：石川縣金澤市東山1-3-18
- 交通：從金澤站搭北陸鐵道巴士或JR巴士喺「橋場町」落車行約5分鐘
穿上日本傳統服飾 漫遊金澤
https://www.japan.travel/hk/hk/japan-activities/activities/243/
白川鄉與飛驒高山嘅一日巴士遊：欣賞世界遺產同古都名勝
1995年12月，位於岐阜縣嘅白川鄉同位於富山縣嘅五箇山合掌式村落獲聯合國教科文組織認定為世界文化遺產。呢兩個地方嘅民家屋頂以茅草建築成尖尖嘅形狀，具備讓冬天積雪自然落下嘅實際功用。由於望落好似雙手合十咁款，因此呢種建築形式亦被稱為「合掌造」。呢種承傳自300多年前嘅傳統建築，到咗而家仍然受到村民們嘅用心保護。喺白川鄉，您可以感受時間靜靜流動，而呢度原始又純樸嘅風情，絕對可以令您忘記日常生活嘅煩惱。
要搭公共交通工具去白川鄉參觀一啲都唔難，但最方便嘅方法，就係參加即日來回嘅巴士團，朝早喺金澤站出發，傍晚返到金澤站解散。成個行程都會有精通英文嘅導遊帶領同解說，就算唔識日文都無問題。到咗白川鄉後，大家會有充足嘅時間喺聚落慢慢散步。不過去之前，導遊會先帶大家到可以睇到超靚風景嘅荻町城跡展望台，等大家可以將好似畫一樣嘅美景刻印喺回憶中。
食完午餐後，巴士會前往岐阜縣另一個著名景點「飛驒高山」。江戶時代，作為城下町同商人町而榮極一時嘅高山市中心地帶「三町通」，係由上一之町至上三之町等多個地區組成，現時被指定為國家重要傳統嘅建築物群保存地區。擁有多個完好保留，極具歷史價值嘅建築物，行行吓會令人有穿梭時空返咗去江戶時代嘅錯覺。老街上仲有好多傳統工藝品同特色手信店，另外都有唔少餐廳同販賣輕食嘅店舖，好啱大家嚟買吓嘢食吓嘢。由於擁有飛驒山脈融雪水同優良氣候等條件，飛驒地區唔單止可以種出好米，仲可以製作出優質日本酒，自古就有著深厚嘅造酒文化。喺呢度您會好易搵到門口掛起「杉玉」嘅老酒藏，部分仲有提供試飲服務，不妨飲多幾間嚟比較一下！
喺行程嘅最後，導遊仲會帶大家去煎餅專門店買手信，體驗手作煎餅。時間嚟到傍晚時分，將肚仔最後一吋空間填滿過後，就用滿滿嘅手信同回憶結束美好嘅一日啦！
世界文化遺產的白川鄉 觀賞建築智慧
https://www.japan.travel/hk/hk/japan-activities/activities/249/
四十萬谷本舖：石川縣金澤武士以及町民文化體驗
想品嚐金澤先有嘅特色美食，又想進行獨一無二嘅難忘體驗，推薦您嚟四十萬谷本舖！1875年創業嘅漬物發酵食品專門店「四十萬谷本舖」，銷售著深受當地人喜愛嘅傳統鄉土料理「蕪菁壽司」。另外，使用發酵漬物、味噌、酒粕製作嘅意式雪糕同樣係必食商品！
其實呢度並唔止係一間普通嘅舖頭，由於當家四十萬谷正久先生係日本武士嘅後代，所以呢間傳統日本大宅入面，仲完好收藏咗5把由祖先留下嘅家傳之寶日本刀。日本刀被認為係全世界最鋒利嘅刀，職人會以進行折返鍛鍊同鍛造等工序，將金屬中最高品質嘅部分鍊成日本刀。日本刀唔止係可以殺敵護身嘅武器，作為美術品同樣擁有好高嘅價値。由工匠喺刀刃上留下嘅獨特刃紋，即使歷經數百年嘅時光仍然無損其細膩美態。嚟到一定要近距離仔細欣賞呢五把由武士所傳承，既珍貴又有高價值嘅日本刀！
喺四十萬谷先生嘅說明同指導下，體驗參加者可以換上一身袴服變身成武士，並親手拎起呢啲曾經實際被使用過嘅寶刀嚟影相留念。另外，大家甚至可以學吓點樣拔刀同揮刀，最後仲可以欣賞擁有「居合道」2段資格嘅四十萬谷先生，以仿製刀嚟斬斷稻草柱（用草蓆卷起嘅柱）。現場表演緊張感滿分之餘，仲相當震撼，簡直係精彩到連眼都唔記得眨！
四十萬屋本舖 總店
- 地址：石川縣金澤市彌生1-17-28
- 交通：從金澤站搭北陸鐵道巴士喺「沼田町」落車行約5分鐘
古都金澤 細嚐百年漬物
https://www.japan.travel/hk/hk/japan-activities/activities/250/
東尋坊：搭遊覽船同登上遊覽塔，用唔同角度欣賞東尋坊絕景
面向日本海嘅「東尋坊」，係個由高低起伏輝石安山岩柱狀節理形成、長達約一公里嘅名勝景點。好似垂直插喺海面上嘅懸崖峭壁，高度超過20公尺，喺上面行走唔單止富有刺激感，仲會被大自然嘅鬼斧神工所震驚。咁動人心魄嘅景色，一定要用多個角度好好欣賞。搭遊覽船嘅話，可以更近距離欣賞柱狀節理嘅層次。而登上東尋坊塔向下俯瞰，就可以將東尋坊同日本海嘅景色同時盡收眼底。當然，無論從邊個角度觀賞，都會被東尋坊無與倫比嘅獨特魅力同美態所深深吸引。
東尋坊
- 地址：福井縣坂井市三國町東尋坊
- 交通：從JR蘆原溫泉站搭京福巴士東尋坊線，喺「東尋坊」落車直達
蘆原溫泉：住宿特色酒店、喺湯煙橫丁享用特色屋台晚餐
位於福井縣北部蘆原市嘅「蘆原溫泉」被稱為「關西嘅後花園」，每年都吸引好多遊客到訪。蘆原溫泉區最大嘅特色係擁有幾十個唔同嘅源泉，大家可以享受每間旅館唔同泉質同功効嘅溫泉。另外，喺蘆原湯之町站附近嘅免費足湯「蘆湯」，唔止有充滿懷舊溫泉旅館氛圍嘅外觀，裡面仲有多達5個唔同種類嘅足湯浴池，非常推薦大家嚟度過最放鬆嘅時光！
如果訂酒店時無訂到晚餐，或者係想體驗一下日本嘅「屋台文化」，推薦大家可以前往「湯煙橫丁」用餐。區域內有10間檔仔，提供炸串、鐵板燒、關東煮等日本當地美食。喺紅燈籠搖曳嘅昭和氛圍中，一邊飲酒一邊嘆美食，再一邊同朋友慢慢傾計，氣氛超開心！
嚟到蘆原溫泉，要唔要試吓入住可以體驗「非日常感」嘅旅館呢？有興趣嘅朋友，推薦您可以入住「格蘭蒂亞芳泉酒店」！酒店嘅房型選擇非常多，除咗有超可愛嘅恐龍主題房，仲有附設露天溫泉等房型，無論男女老幼都可以住得開心又舒適。晚餐仲可以大嘆福井縣嘅和牛「若狹牛」！若狹牛有豐富油脂，肉身柔滑入口即溶，口感令人難以抗拒！
蘆原溫泉屋台村 湯煙橫丁
- 地址：福井縣蘆原市溫泉1-207
- 交通：從越前鐵道三國蘆原線「蘆原湯之町」站行路直達
格蘭蒂亞芳泉酒店
- 地址：福井縣蘆原市舟津43-26
- 交通：JR蘆原溫泉站搭接送巴士※要預約
- 網址：https://www.g-housen.co.jp/lg_en/access/
永平寺：喺曹洞宗大本山進行坐禪體驗
由曹洞宗嘅宗祖「道元」喺1244年創建嘅永平寺，係一座用於坐禪修行嘅道場。作為曹洞宗大本山嘅寺院，永平寺喺日本擁有崇高地位，吸引好多信眾嚟參拜。永平寺雖然對外開放，但至今仍然保留供僧侶坐禪和修行嘅「禪道場」作用。為咗令更多人了解坐禪嘅奧妙，永平寺每日都會提供三次坐禪體驗。試吓瞇埋雙眼、調整好姿勢同呼吸，重新審視心靈深處嘅自己，重設身心狀態吧！
體驗完之後，大家可以沿迴廊參觀參拜。佛殿、法堂、山門等多個寺院部分，都被列入國家重要文化財。另外，天花板上裝飾著230幅畫嘅傘松閣，夠晒美麗壯觀，絕對有參觀嘅價值！
永平寺
- 地址：福井縣吉田郡永平寺町志比5-15
- 交通：從越前鐵道勝山永平寺線永平寺口站，轉搭開往永平寺門前或永平寺嘅京福巴士，喺終點站落車行約5分鐘
恐龍博物館：投入恐龍世界，挑戰掘化石！
喺福井縣嘅勝山市由於曾經出土過好多恐龍化石，因此成為全國著名嘅「恐龍勝地」。嚟到福井縣，當然要去恐龍博物館朝聖，尋找恐龍嘅身影啦！圓拱形嘅館內有分唔同區域，展示面積達4,500平方米。展示區入面無任何柱嘅阻隔，廣闊嘅空間感加上無處不在嘅恐龍骨架、化石、標本、模型展品，會令人有行咗入電影世界嘅錯覺！
想更投入恐龍嘅世界，就要去博物館旁邊嘅「勝山恐龍公園」，展開一場大冒險啦！園內44件實物原大恐龍模型，當中部分仲識郁識叫，震撼感十足！唔只小朋友，相信連大人都一樣會超興奮！另外，呢度仲有提供「掘化石體驗」，用專用工具敲開實際喺挖掘現場運嚟嘅石頭。就算掘唔出化石，嗰種令人充滿期待嘅興奮感覺，相信已經係最大嘅寶物啦！
福井縣立恐龍博物館
※預定休館至2023年夏天
- 地址：福井縣勝山市村岡町寺尾51-11 勝山恐龍公園內
- 交通：從越前鐵道勝山永平寺線勝山站搭開往Gururin中部嘅巴士，喺「恐龍博物館」落車
日本國家旅遊局所推動嘅「新日本 心體驗」行程，介紹日本各地充滿魅力嘅體驗活動。期待再次重遊日本嘅遊客們，記得要留意以下官網嘅資訊喇！
走進被白雪覆蓋的冬日夢幻世界
https://www.japan.travel/hk/hk/japan-activities/chubu/itineraries-6/
新日本 心體驗
Comments