相信唔少人規劃去日本自由行嘅時候，都會揀東京作為首選目的地。可能大家都有去過東京以及其他關東地區旅遊，不過就未必知道，呢度其實仲有好多外國遊客未曾體驗過嘅有趣活動，值得大家親身前往體驗。例如位於日本關東地區嘅栃木縣，唔單止有世界遺產之一嘅「日光東照宮」、紅葉與溫泉相當著名嘅「鬼怒川溫泉」、仲有可以帶您穿越時空回到江戶時代嘅「日光江戸村」等，精彩位滿載。至於東京都內，除咗可以著住和服體驗茶道，仲可以體驗邊搭直升機邊欣賞東京夜景等活動。以下會為您逐一介紹，令人意想不到嘅東京、關東新玩法！
由日本國家旅遊局提出嘅「新日本 心體驗」行程，為咗令遊客感受重遊日本嘅樂趣，規劃咗日本各個地區嘅旅遊推薦路線。想要玩轉關東地區，就唔可以錯過今次我哋所推介嘅行程路線啦！
「關東地區」行程推介
| Day 1 | 東京站 ⇒ 宇都宮 ⇒ Mobility Resort Motegi茂木賽車場 ⇒ 宇都宮餃子⇒住宿宇都宮 |
| Day 2 | 宇都宮站⇒下今市站 ⇒ SL大樹 ⇒鬼怒川溫泉散步 ⇒享受鬼怒川溫泉 |
| Day 3 | 日光東照宮 ⇒ EDO WONDERLAND日光江戸村⇒住宿鬼怒川溫泉 |
| Day 4 | 鬼怒川溫泉站 ⇒ 新宿站 ⇒ 銀座站 ⇒ 和服＋茶道體驗 ⇒ 住宿新宿站附近 |
| Day 5 | 新宿站 ⇒ 豐洲市場 ⇒ 船橋直升機場 ⇒ 住宿新宿站附近 |
在空中飽覽紅葉美景
https://www.japan.travel/hk/hk/japan-activities/kanto/itineraries-3/
迎著風向前衝：Mobility Resort Motegi茂木賽車場
「Mobility Resort Motegi茂木賽車場」係一個適合大人與小朋友齊齊活動身體，兼可以玩得盡興嘅遊樂園。唔單止可以喺廣闊嘅自然林地體驗高空滑索，享受乘著風劃過半空嘅快感，仲有提供多個無論係一個人，抑或係一家大細都可以玩得不亦樂乎嘅設施。
大人無車牌想玩小型賽車？無問題！只要身高超過140cm並且通過簡單考試，就算係小學四年級以上嘅小朋友都一樣可以參加。同家人或者朋友一齊嚟嘅話，仲可以乘坐二人賽車，或者互相較量鬥快。只要揸住軚盤就會進入忘我狀態，感受好似賽車手一樣嘅快感！
Mobility Resort Motegi茂木賽車場
- 地址：栃木縣芳賀郡茂木町檜山120-1
- 前往方法：JR宇都宮站西口3號巴士站坐巴士前往（只有星期六日行駛）
簡直就係餃子主題樂園：宇都宮餃子「Kirasse本店」
栃木縣宇都宮嘅餃子非常出名，好多人甚至會專程嚟宇都宮食餃子𠻹。市內雖然有多間著名餃子店，但要慢慢揀真係好花時間。唔想煩？好似成間餃子博物館咁嘅「Kirasse本店」就最啱您！佢係由宇都宮餃子協會經營，裡面有兩個用餐區域，您可以選擇喺美食廣場區品嘗常駐店舖嘅餃子，亦可以喺舖頭入面享受30種以上每日換款嘅餃子。呢度好就好有多間店鋪嘅招牌餃子任君選擇，等客人可以自由自在地想點揀就點揀，仲可以邊食邊比較唔同款嘅餃子𠻹！
呢度可以品嘗到嘅餃子種類之多，遠遠超乎您想像！例如與醬汁完美搭配嘅「御好燒風味餃子」、唔單止可以大啖嘆餃子，仲可以嘆埋美味湯底嘅「擔擔湯底雞肉水餃」、「海帶湯底水餃」等多款豐富餃子。無論您係咪餃子愛好人士，嚟嘆返次餃子大餐，包您食完舐舐脷兼捧腹大滿足！
Kirasse本店
- 地址：栃木縣宇都宮市馬場通2-3-12 MEGA唐吉訶德LAPARK宇都宮 地下1樓
- 前往方法：東武宇都宮線「東武宇都宮」站徒步約10分鐘
光輝歲月再現：乘搭蒸汽火車「SL大樹」
行駛於栃木縣日光市下今市與鬼怒川溫泉之間嘅蒸汽火車「SL大樹」，係一架可以作為移動交通工具嘅觀光列車。50多年前，蒸汽火車駛經此地嘅風景絕不罕見。但隨著年月變遷，於往後數十年間，蒸汽火車曾一度退下火線。不過幸運嘅係蒸汽火車「SL大樹」，喺2017年夏天以全新面貌復活，重新出發為大家服務。
坐蒸汽火車嘅時候，車頭產生嘅蒸汽、車笛聲同行駛嘅聲音都充滿濃濃嘅懷舊風情。邊坐車邊欣賞窗外流動嘅風景，相信會成為您最幸福療癒嘅好時光！
被大自然包圍療癒身心：鬼怒川溫泉散步
鬼怒川溫泉係關東著名嘅紅葉名所，從鬼怒川溫泉街徒步即可抵達嘅「鬼怒楯岩大吊橋」，係一座高 37 米、全長 140 米嘅行人專用吊橋。身處喺吊橋上，可以瞭望得到鬼怒川急流與迷人嘅山巒景色，令人嘆為觀止。名勝「楯岩」最上面有一個觀景台，可以喺度欣賞到溫泉街嘅景色！
如果想更近距離感受鬼怒川嘅魅力，推薦您坐船順流而下！從船上仰望，可以欣賞到由自然界鬼斧神工創造出嘅奇岩怪石之餘，仲可以欣賞到迷人嘅紅葉絕景。如果水流夠快，坐起上嚟仲會增添幾分刺激感，相當過癮！
坐完船之後可以坐纜車上去「猴山」，除咗可以從山頂觀景台飽覽絕景，仲可以同超可愛嘅馬騮仔見面喔！
如果天氣凍凍地，最啱就係去「足湯espo」！大家可以一邊浸足湯，一邊欣賞眼前廣闊嘅景色，仲可以品嘗到店家嘅原創限定甜品，簡直係一舉三得！另外，呢度有款法式栗子蛋糕，係加入自家製嘅咖啡啫喱所製作，味道恰到好處毫不甜膩，食到最尾都唔會覺得太甜，好好味呀！
鬼怒川順流遊覽船
- 地址：栃木縣日光市鬼怒川溫泉大原1414
- 前往方法：東武鬼怒川溫泉站徒步約4分鐘
鬼怒川溫泉纜車
- 地址：栃木縣日光市鬼怒川溫泉滝834
- 前往方法：東武鬼怒川溫泉站坐的士約5分鐘
足湯espo
- 地址：栃木縣日光市鬼怒川溫泉大原1437-1 Hotel Sunshine鬼怒川1F
- 前往方法：東武鬼怒川溫泉站徒步約10分鐘
日光嘅代表名勝：日光東照宮
講到日光，就不得不提被列入世界遺產嘅「日光東照宮」。日光東照宮建於 1617 年，作為供奉德川家康嘅神社，唔單止係歷史上重要嘅建築物，其豪華又金碧輝煌嘅建築風格亦同樣引人注目。呢度好多建築物都被指定為國寶或重要文化財，絕對係精彩位滿載。當中，五重塔、陽明門，以及人氣雕刻「三猴」、「睡貓」等必睇位，就一定唔可以錯過。原來呢度除咗參拜之外，仲有咁多精彩位！記得要去悠閒散步一番啦！
日光東照宮
- 地址：栃木縣日光市山內2301
- 前往方法：喺JR日光站・東武日光站坐東武巴士日光往「中禪寺溫泉」或「湯元溫泉」方向，約5分鐘後喺「神橋」落車徒步約8分鐘。或者坐巴士約8分鐘後，喺「表參道」落車徒步約2分鐘。
穿越江戶之路由此起：EDO WONDERLAND日光江戸村
嚟到日光一於「穿越」去江戶時代，以五感體驗日本傳統文化啦！「EDO WONDERLAND日光江戸村」正如其名，係一座呈現江戶時代風格嘅主題樂園。除咗園區內嘅建築物皆以江戶風格所打造而成，連每一位員工都會穿著傳統服飾，令您喺踏入園內嘅瞬間，就好似唔覺意穿越咗去江戶時代嘅日本一樣！
呢度唔單止有忍者迷宮、手裡劍等體驗，仲有花魁遊行、時代劇劇場等表演，可以盡享各種豐富多彩嘅體驗活動。不過喺進行體驗之前，建議大家可以先變身，化身成江戶人會更加入戲！當中，有主君、公主、行商商人、新選組成員、武士等多種服飾任君選擇。漫步於古色古香嘅街道上所拍攝嘅相片，將會成為您帶返「現代」嘅最佳手信！
EDO WONDERLAND 日光江戸村
- 地址：栃木縣日光市柄倉470-2
- 前往方法：東武鬼怒川溫泉站3號巴士站坐路線巴士，或者喺日光東照宮坐免費接駁巴士
品嘗鮮度十足嘅壽司：豐洲市場（參觀＆午餐）
喺東京想食最新鮮嘅壽司，就去豐洲市場啦！自2018年起開業嘅豐洲市場，係處理日本各地漁獲、蔬果等，全日本最大型嘅綜合市場。拍賣會一大朝早就會開始，市場內各個賣場都擺放著大量嘅吞拿魚、海膽，仲有其他海鮮等漁獲，場內氣氛非常熱烈。如果早起身嘅話，不妨喺朝早5:30左右，前往參觀拍賣過程，一睹平時難得一見嘅珍貴「幕後花絮」。
場內有多間餐廳所提供嘅菜式，都係使用於豐洲市場拍賣返嚟嘅新鮮食材製作，有幾新鮮自然唔洗多講。今次小編就去咗超人氣嘅「大和壽司」，食咗個豪豪哋嘅「OMAKASE」午餐。吞拿魚油脂鮮甜、鮮蝦咬落彈牙味道香濃，海膽鮮味濃郁且入口即溶，由頭食到落尾都超級滿足！另外，市場內有唔少店舖會一大早就開門營業，亦有只營業至中午時段嘅店舖。小編溫馨提提您，無論想喺邊間餐廳食飯，記得都要早少少去現場拎定整理券或排隊等候喔！
豐洲市場
- 地址：
- 水產批發棟（７街區）： 江東區豐洲6-6-2
- 水產中介批發棟（６街區）：江東區豐洲6-5-1
- 青果棟（５街區）：江東區豐洲6-3-1
- 前往方法：東京臨海新交通臨海線（Yurikamome）「市場前站」落車前往
盡情享受日本傳統之美：「茶禪」和服茶道體驗
無論您本身鐘唔鐘意抹茶，只要嚟日本進行過抹茶體驗，都一定會變得更加喜愛抹茶！呢間可以體驗傳統茶道嘅正宗茶室，就係隱藏於銀座眾多商業購物設施，當中一座大廈入面嘅「銀座茶禪」。
行入店內，隨即會見到設置於茶室內嘅淨手設施「蹲踞」。另外，茶室特有小型出入口「躙口」比較狹窄，需要彎腰屈膝先可以穿到過去，呢個過程令參加者更投入於日本「和」之世界中。茶道體驗開始時，首先會由專業茶道老師為大家示範，然後再講解泡茶方法與茶道禮儀，學完之後，大家就可以開始點茶、飲茶、品嘗和菓子。
想更加投入「和」之世界，體驗茶道前不妨到茶室附近嘅和服店換返件靚靚和服啦。著住和服嚟散步，一定會更好玩更開心！
茶禪Chazen
- 地址：東京都中央區銀座4-12-17 銀座Apollo大廈5F
- 前往方法：地鐵東銀座站徒步約1分鐘
- 網址(日文)：https://www.chazen-co.jp/
穿著和服穿梭銀座街道 體驗傳統茶道
https://www.japan.travel/hk/hk/japan-activities/activities/461/
眺望地上嘅星星：船橋直升機場
好多人都鐘意嚟東京睇夜景，登上觀景台遠眺燈光明亮嘅都市景色，絕對係一件賞心樂事。最後要介紹嘅活動，係令您會重新定義「夜景」兩個字嘅「東京直升機之旅」。前往船橋直升機場乘坐直升機，用約30分鐘時間暢遊東京嘅夜空啦！
直升機首先會從千葉縣嘅船橋直升機場出發，途中會飛過新宿、澀谷、晴空塔同東京鐵塔等著名景點。換個角度去飽覽平時見慣見熟嘅觀光地，感覺超級新奇！直升機嘅最高飛行高度雖然高過晴空塔嘅634米，但係遠比飛機嘅飛行高度低，所以可以欣賞得到形狀清晰可見嘅建築物。從直升機裡面俯瞰嘅話，城中燈光更有如耀眼嘅銀河星光。相信眼前呢一幕醉人景色，絕對會深深烙印於您嘅腦海中，成為您一輩子嘅寶物喔！
船橋直升機場
- 地址：千葉縣船橋市金杉1-44
- 前往方法：從JR船橋站、京成船橋站坐的士約15分鐘
直升機翱翔東京觀光體驗
https://www.japan.travel/hk/hk/japan-activities/activities/449/
日本國家旅遊局提出嘅「新日本 心體驗」，會為大家介紹日本各地嘅魅力景點同體驗活動。期盼著再次訪日嘅大家，記得要留意以下官網嘅資訊啦！
在空中飽覽紅葉美景
https://www.japan.travel/hk/hk/japan-activities/kanto/itineraries-3/
新日本 心體驗
Comments