日本最大嘅淡水湖「琵琶湖」位於滋賀縣，佔全縣1/6嘅面積。當中可以欣賞到琵琶湖千變萬化美麗景觀嘅名勝被選為「琵琶湖八景」。何謂琵琶湖八景？其實係指琵琶湖整體景觀中，根據「八景」（某一地區八處具代表性嘅風景）樣式，所選出嘅8個絕景。
另一方面，約500年前被定為「近江八景」嘅8個地方位於琵琶湖嘅南部，其絕景更被描繪於浮世繪中。如果去滋賀縣嘅話，記得要盡情享受美麗琵琶湖！今次，小編會為你介紹7種琵琶湖嘅有趣玩法。
乘坐觀光船周遊琵琶湖
遊覽琵琶湖可以乘坐琵琶湖觀光船。當中，「密西根號」遊覽船（ミシガンクルーズ）除咗可以從4樓嘅空中甲板飽覽琵琶湖嘅壯麗景色，仲可以喺船上享受美食、飲品、音樂表演等，相當過癮。運行路線係從「大津港」出發，經由「柳崎湖畔公園港」或「Nionohama觀光港」（におの浜観光港），再返回「大津港」。
另外，仲有可以登上琵琶湖八景之一「竹生島」嘅「竹生島觀光船」，亦相當受歡迎。仲可以巡遊埋寺廟、神社等能量景點充個電，提升氣場喔。除此之外，亦推薦「琵琶湖島嶼巡遊」觀光船行程，用1日時間巡遊琵琶湖4個島嶼。亦有從彥根港出港，巡遊竹生島和多景島嘅船隻定期航行。
喺餐廳、咖啡店欣賞琵琶湖景色
琵琶湖畔有多間可以眺望美麗景觀嘅餐廳和咖啡店。當中，絕不可錯過嘅係「The Biwako Terrace」（びわ湖テラス）。可以從有如置身於空中嘅高處俯瞰夢幻絕景。除咗可以喺餐廳和咖啡店享用美食，亦可以喺充滿藝術色彩嘅吧檯位，嘆返杯好飲又吸睛嘅雞尾酒。
琵琶湖海灘旁邊有間「R cafe」，係一間令人不其然感受到一股猶如置身於夏威夷沙灘上嘅咖啡店，可以一邊細聽海浪聲，一邊享用夏威夷漢堡飯、班戟等，多款豐富夏威夷菜式。
另外，「Chalet水之濱」（シャーレ水ヶ浜）係一間位於琵琶湖高台嘅咖啡店。可以從露台位置眺望美景之外，仲可以品嚐得到自家製牛肉咖喱，或者嘆返杯使用地下天然水沖嘅咖啡，相當寫意。
喺琵琶湖享受水上運動
簡直就好似喺夏威夷一樣？！
喺琵琶湖可以享受eFoil電動水上衝浪板、直立板（SUP）、腳划直立板、花式滑水（Wakeboard）、香蕉船等嘅水上運動。而且，清澈透明度高嘅琵琶湖水充滿一股夏威夷嘅氣息。呢度仲有提供唔少即使係水上活動新手都可以挑戰嘅戶外活動喔。
除此之外，亦推薦兩手空空即可參加附帶食材嘅BBQ和湖畔露營。傍晚時分，湖面上映照出嘅夕陽美景，亦係必睇絕景，場面相當浪漫。
從高處飽覽琵琶湖嘅戶外活動
琵琶湖周邊有多條可以享受健行和登山嘅路線。當中特別推薦，新手都可按照個人步伐攀登，海拔1174米嘅「蓬萊山」。小編推薦路線係，行經位於打見山嘅纜車山頂站，登上滑雪場嘅路線。當然，亦可以乘坐纜車到山頂站，登上滑雪場。置身於蓬萊山山頂，能以360 度欣賞廣闊嘅琵琶湖、群山稜線等宏偉景觀。
另外，如果想於空中俯瞰琵琶湖嘅話，推薦體驗滑翔傘。可與專業教練一齊飛，即使係初學者都夠晒安心。下次不妨化身成雀仔，於琵琶湖上空展翅飛翔，體驗一個空中之旅吧！
單車路線&自駕遊車河路線
小編要推薦嘅單車路線，係普通大眾都可以好好享受嘅「守山～近江八幡～彥根路線」。從有提供單車出租店舖嘅「第2NAGISA公園」（第2なぎさ公園）出發，經過琵琶湖畔，最後抵達彦根城嘅路線，令人心情舒暢。
另外，遊車河兜風嘅話，亦推薦可以享受琵琶湖畔景色嘅路線。先由租車店舖較多嘅大津站周邊出發，沿著湖嘅西側前進後，經過「琵琶湖大橋」，與踩單車路線一樣都以彥根城為終點站嘅路線。可以享受一個伴隨著琵琶湖畔美景嘅遊車河之旅。
無論係踩單車，抑或係揸車遊車河，沿途都會遇上唔少景點，如果有在意嘅地方都可以順便一遊。特別係遊車河路線中嘅「三井寺」、「浮御堂」等地，皆係必去名勝呢。
琵琶湖周邊嘅露營、Glamping、BBQ
琵琶湖周邊嘅高島市、大津市北部嘅湖西地區係有較多露營、豪華露營設施嘅地方。當中，有唔少可以眺望到琵琶湖，設於湖畔嘅營地設施。除咗可以自攜食材同工具、大嘆BBQ嘅露營體驗，亦可以選擇講究內部裝修嘅Glamping等設施，種類相當豐富。
當中，不得不提嘅係「Glamping Village滋賀今津濱」，唔單止設有游泳池、透明圓拱形設計嘅帳篷，仲有自助夜間酒吧，相當寫意！亦有提供以燒牛扒、琵琶湖產魚貝類、當地新鮮蔬菜組成嘅BBQ套餐，供住宿者選擇喔。相信大家一定可以搵到，好想體驗嘅露營設施喔！
喺酒店、旅館嘅湖景客房飽覽琵琶湖！
琵琶湖周邊有眾多遊客到訪，同時亦設有多間住宿設施。當中，小編想推薦嘅係擁有可以欣賞琵琶湖景色客房嘅住宿設施。
首先要介紹嘅係「琵琶湖萬豪酒店」，設有內附溫泉嘅客房，可以邊嘆溫泉邊眺望眼前廣闊嘅琵琶湖美景。除此之外，酒店內嘅設備亦相當充實，竟然仲有天象儀設備。
另一間要介紹嘅係「琵琶湖綠水亭」。旅館所有客房都可以眺望琵琶湖，並為客人提供引以為傲嘅料理。特別推薦內附露天溫泉嘅客房，可以邊浸溫泉邊欣賞琵琶湖美景。另外，仲有提供使用達到一定品質先會被認證為高質近江牛嘅「認證近江牛」所製作嘅料理。可以品嚐到屬於呢片土地嘅高質和牛喔。
Comments