擁有「日本第一兵」稱號嘅戰國武將「真田信繁（真田幸村）」，其生平於2016年被NHK改編為堺雅人主演嘅大河劇《真田丸》，作為劇中舞台嘅長野縣「上田城」知名度瞬間急升。今次就跟著小編腳步，齊齊去認識呢個對「真田家」有著重要意義嘅城郭。
真田家代表人物：「真田昌幸」與「真田信繁」
喺介紹上田城之前，一定要先認識建造呢座城嘅家族「真田家」。
真田家扎根於長野縣，原本係當時信濃國（現長野縣）嘅武家氏族，後來「真田幸隆（真田幸綱）」轉而服侍甲斐國（現山梨縣）嘅「武田信玄」，其子「真田昌幸」受武田信玄賞識，被收為武田家名門之一「武藤家」嘅養子擔任重責，甚至被譽為仕奉武田信玄嘅精銳武將「武田24將」之一。不過無幾耐，武田家勢力卻大為衰減，最後走上滅亡。武田家滅亡後真田昌幸為保身，喺短短半年內多次轉投織田信長、北条氏直、德川家康等強權鞏固勢力，踏上四處依附強權之路。
而真田家最出名嘅，就係「真田昌幸」大名鼎鼎嘅次子，被譽為「日本第一兵」嘅「真田信繁（*1）」，喺多個有關最受歡迎或最喜愛嘅戰國人物調查中，「真田信繁」都榜上有名。全因其生平最後一戰「大阪夏之陣」（1615年）率領2,000兵力對抗德川軍7,000兵力，以寡敵眾一度逼到德川家康準備切腹自盡，可惜最後被扭轉局勢，壯烈戰死。據聞就係因為呢場戰役嘅英勇表現，令當時未到場卻聽聞其事蹟嘅薩摩藩當家「島津忠恆」稱其為「日本第一兵」（日本一の兵）。
*1：真田信繁現時雖以真田幸村一名廣為人知，但從現存史料中，並無其本人在世時使用過「幸村」二字嘅資料，而係以「信繁」做署名。
呢個帶有悲劇色彩嘅英雄故事，深受日本人喜愛，被改編成無數動漫遊戲、小說戲劇作品，喺2016年NHK大河劇《真田丸》中，真田昌幸、真田信繁，與其兄「真田信之（真田信幸）」三人嘅互動，更再度掀起一股真田旋風。其家紋「六文錢」與真田幸村嘅象徵紅色甲冑裝飾，更以土產、周邊精品、旅遊手冊等形式遍佈上田市各地。
令到德川家康二戰二敗嘅長野縣「上田城」
上田城係真田昌幸於1583年受德川家康之命建造，選擇於上田盆地中央位置、面向千曲川支流嘅尼之淵所建，因此最初又稱為「尼之淵城」。上田城除咗南面有千曲川，北面與西面則係納入矢出澤川嘅護城河，令到敵軍如果要攻打上田城，就只可以從唯一可行嘅東面濕原地帶進軍，呢個配置令上田城變得易守難攻，就連原先下令建城嘅德川家康，都喺度打輸過兩場仗喔。
點解德川家康要攻打自己下令建造嘅城呢？前面提到，真田昌幸喺武田家滅亡後，四周圍依附強權，隨時見風駛艃，上一秒臣服北条家，下一秒即刻轉投德川家。上田城就係真田家喺德川旗下時，為進軍上杉景勝所建之城，但後來上田城建好之時，真田昌幸倒戈上杉，引發握手言和嘅德川與北条不滿，於是爆發第一次嘅上田合戰（1585年）與第二次上田合戰（1600年），兩次都係德川戰敗。
全日本亦只有上田城，擁有二戰二勝實戰經驗，係名符其實，難攻不落嘅城郭。因此唔單止係真田信繁嘅粉絲愛屋及烏，視上田城為聖地之一，日本城愛好者亦對上田城讚譽有加，喺多個日本城相關嘅排行搒上，都可以見到上田城嘅蹤影。
其實真田城總共有過三個家族擔任城主，而真田家係擔任時間最短嘅家族，只有40年歲月。但因為真田一家嘅故事太過精彩，以至於後來嘅城主仙石家與松平家光彩黯淡。1871年廢藩置縣，上田城喺1874年正式廢城。
重生嘅上田城，被賣又被買返嚟嘅城
喺廢城時，上田城7座櫓中2座被買走、僅留低1座（即現時嘅西櫓），其他則被解體。其後喺上田市民們懇求下，由當時市議區長組成嘅「上田城址保存會」終於將被賣走嘅2座櫓（南櫓與北櫓）買返返嚟，並於1949年喺上田城內完成復原工序。希望上田城能重返原貌嘅聲音並未停止。2018年更有匿名市民提供10億日圓，希望能復原剩下4座櫓，或者我哋真係有機會，能夠見到完全復活嘅上田城。
現時嘅上田城係日本國定史蹟、長野縣寶、日本100名城之一，亦被規劃為城跡公園。雖然春櫻、秋紅葉美景皆有，但始終係紅色楓葉風情，最適合紅色甲冑嘅真田兵。
前往「上田市立博物館」與「真田神社」更加了解真田家
上田城昔日嘅本丸位置，現時為「真田神社」，祭祀真田家、仙石家、松平家歷代城主，相關周邊皆以真田家家紋「六文錢」為主；城跡公園範圍內嘅「上田市立博物館」，擁有唔少關於真田家嘅資料，仲有「信州上田OMOTENASHI武將隊・真田幸村與十勇士」會不定期現身上田城內。如果遇到活生生嘅六文錢武將，千祈咪怕醜，記得要上前打招呼，等武將親自為你介紹呢座日本名城！
上田城・上田城趾公園
- 地址：長野縣上田市二之丸6263番地イ
- 開放時間：隨時可自由參觀
- 交通：JR上田站徒歩約12分鐘
上田市立博物館
- 地址：長野縣上田市二之丸3-3
- 開放時間：09:00~17:00（最終入場16:30）
- 入場費：成人300日圓、高中生以上嘅學生200日圓、中學生以下嘅學生100日圓
定休日：每個星期三、年末年初12月29日～1月3日、公眾假日隔日（如果星期三係公眾假日則開館，順延至隔日休館）
- 交通方式：JR上田站步行約12分鐘
※上田城櫓另外收取300日圓入場費，亦可考慮購買「上田市立博物館・上田城櫓觀覽」套票（500日圓）。要留意，上田城櫓於11月中旬至3月期間（部分日子除外）休館，有關休館日詳情請參考官方網站。
Comments