擁有著名琵琶湖嘅滋賀縣，除咗盛產新鮮魚之外，仲有聞名全國嘅近江牛、蔬菜、水果等美味食物。今次介紹嘅係滋賀縣鄉土料理——蔬菜豆腐泥包糰子（おあえ団子）。使用豆腐、青菜、米粉等材料所製作嘅糰子，食落除咗會感受到豆腐、蔬菜等清爽口感，再加上味噌等調味料更添美味。再者，呢道菜色使用大量蔬菜作食材，既健康又好味道，下次不妨跟住以下食譜，試吓親手整啦！
喺介紹食譜之前，首先了解一下滋賀縣鄉土料理——蔬菜豆腐泥包糰子吧！
日本鄉土料理係？
鄉土料理係指活用各地區嘅當地特產，結合當地風土民情所烹煮出來，並經過長年累月於該區廣泛地傳承下來嘅當地特色料理。唔單止係日本人嘅靈魂食物，亦係日本旅行必食嘅人氣美食。
關於蔬菜豆腐泥包糰子
蔬菜豆腐泥包糰子（おあえ団子）係滋賀縣守山地區、野洲地區自古流傳至今嘅鄉土料理。使用豆腐、冬菇、青菜、紅蘿蔔等食材，混合調味成豆腐泥拌菜（白和え）後，再將其混合於使用米粉製作嘅糰子。呢款利用一年四季都非常容易入手嘅豆腐、蔬菜等食材製作而成嘅豆腐泥拌菜，再混合米粉糰子而成嘅菜色，雖然係一款主要喺法事時享用嘅料理，但亦會作為一般日常料理，出現喺餐檯上面喔。
另外，使用青菜和味噌混合而成嘅青菜味噌泥包糰子，被稱為「くき団子」。
滋賀縣嘅蔬菜豆腐泥包糰子相關介紹就到此為止，即刻去睇睇呢款糰子嘅製作方法吧！
食譜影片請參考（附有CC字幕）👇👇👇
蔬菜豆腐泥包糰子嘅材料（2人份）
- 米粉…50g
- 糯米粉…50g
- 紅蘿蔔…25g
- 木棉豆腐…150g
- 味噌…25g
- 小松菜…小1.5束
- 冬菇…1隻
- 水…90ml
- 芝麻…10g
- 味醂…7g
- 砂糖…25g
蔬菜豆腐泥包糰子嘅製作方法
- 於容器中加入米粉和糯米粉，倒入水，搓揉至猶如耳垂般硬度嘅糰狀。
- 將米粉糰搓成約3㎝大小嘅圓盤狀，放入已沸騰嘅熱水中烹煮。當糰子煮至浮起，撈起冷卻後，米粉糰子便完成。
- 豆腐瀝乾水份，用廚房紙印走多餘水份。
- 將冬菇、紅蘿蔔、小松菜切成2㎝左右嘅長度，於鍋中加入鹽，煮熟後瀝乾水份。
- 於容器中加入味噌、砂糖、芝麻、味醂，攪拌混合後，再加入瀝乾水份嘅豆腐，攪拌均勻。
- 放入瀝乾水份嘅冬菇、紅蘿蔔、小松菜，攪拌混合後，蔬菜豆腐泥便完成。
- 然後將米粉糰子包入蔬菜豆腐泥中，即大功告成！
Comments